Search form

Ageini 38

Yuda kede Tamar

1I kare nono Yuda bin oko yai kibut imiegu mege di eko dak bedo kede icuo moro me Adulam kame bin nyinge Kira. 2Ki kuno Yuda bin oko neno nyako moro me Kanan kame oudo nying papa mere Sua. En bin eko nyome 3di eko mine eudo yie, eko nywalo atin awobi di eko cako nyinge Er. 4Bobo eko yac di eko nywalo atin awobi, eko cako nyinge Onan. 5En bobo eko medo nywalo atin awobi, di eko cako nyinge Sela. En enywalo atin noni di oudo Yuda tie Kesib.

6Yuda oko nyomo ne Er, en atin kao mere, dako kame nyinge Tamar. 7Do Er, kao ka Yuda, oudo ekite mere rac i nyim Rwot. Manono oko mino Rwot okwanyo kuo mere. 8Di do Yuda oko waco ne Onan be, “In but kede dako ka omini di iko timo ne gi dedede bala kame mitere kibut omin me cware; inywal idwe ne omini.” 9Do pien Onan oudo ngeo be idwe kame en enywalo kede dako nono likame bino bedo mege, en di do eko donyo onyo kwir mere me icuo piny i kare dedede kame en ebuto kede apuserut dako ka omin mere, me wek kur enywal idwe ne omin mere. 10Gikame en etimo nono oko bedo rac i nyim Rwot, omio Rwot oko neko eda. 11Di do Yuda oko waco ne ci wode Tamar be, “Dok i ot ka papa ni, iko dong di itie apuserut tuno di woda Sela odongo.” En ewaco kamano pien oudo etie kede lworo be Sela da bino to bala imiegu mege. Di Tamar oko dok bedo turgi.

12Ingei kare moro, dako ka Yuda, nyar ka Sua, bin oko to. Kakame kare ka Yuda me iturur otiek kede, en bin eko ot Timina but jo kame nyaro yer me romini mege, en karacel kede ngawote Kira me Adulam. 13Kakame bin oko waco ne kede Tamar be, “Papa me cwari tie ot Timina nyaro romini,” 14Tamar bin oko gonyo igoen mege me apuserut, di eko umo nyime, eko rwano egoe, di eko bedo piny i erute me Enaim, bomba kame tie i yongayo kame oto Timina. En oudo engeo be Sela do otieko dongo, do di likame oko mine bute pi en nyomere kede.

15Kakame Yuda bin onene kede, en eko paro be en oudo malaya, pien oudo eumo nyime. 16Yuda oko ot bute i nget yongayo kuno di eko waco ne be, “Bia, ango amito buto kedi.” Yuda owaco kamano pien oudo likame engeo be dako nono oudo bedo ci wode. Tamar di oko penye be, “Nyo kame in ibino mina ka ango ayei buto kedi?” 17Yuda oko gamo be, “Ango abino cwano ni atin diel kikom leini na.” En di eko waco be, “Ango abino yei kenekene ka in isingao na gimoro tuno in cwano atin diel nono.” 18Yuda oko penye be, “Nyo kame in imito be amii?” En di eko gamo be, “Miango gi me alama ni kame in iliero i nguti kede ausi mere, kede ebela kame in imako i cingi no.” Di en eko mine gi nogo. En eko buto kede, di Tamar oko udo yie. 19Tamar bin oko yai di eko ot gire, eko kwanyo egoe me umo nyime tenge, di eko ngapo igoen mege me apuserut.

20Kakame Yuda oko oro kede ngawote Kira kede atin diel, pi ot omo jamini kame bin esingao but dako nono, en likame bin eko karuno udo dako nono. 21En bin epenyo jo me kabedo nono be, “Malaya kame oudo bedo i nget yongayo kame oto Enaim nataman do tie tuai?” Do gin kiko gamo be, “Cako sek likame tie malaya moro kan.” 22En di eko dok but Yuda di eko waco ne be, “Ango likame aude; medo i wi manono jo me kuno waco be cako sek likame tie malaya moro kuno.”

23Yuda oko waco be, “Wek en eter jamini nogo. Wan likame omito be jo nyer wa. Neni, ango acwao ne atin diel noni, do in likame iko karuno ude.”

24Di do kare okato oromo bala dwete adek, bin oko waco ne Yuda be, “Ci wodi Tamar otieko timo tic me malaya, doko etieko yac pi tim mere me malaya nono.”

Di Yuda oko waco be, “Terenu ikounu wange paka to.”

25Di bin do oudo kotie tere ot wange, en eko cwano kop ne papa me cware be, “Won jamini gi en koyac nango. Akwai inen gi kiber, di iko ngeno won jamini nogi: gi me alama kede ausi mere, kede ebela.”

26Yuda bin oko ngeno gi nogo be mege, di eko waco be, “En etimo gi kopoore kalamo ango, pien ango likame amie but woda Sela.” Di Yuda likame bobo oko buto kede.

27Kakame do kare mere me nywal bin oko romo kede, oko ngere be bangi oudo tie i yie. 28Di bin en oudo etie do ramere me nywal, atin acel oko rwako bade oko; dako kame bin tie cole oko mako bad atin nono di eko tweno iye ausi akwar di ewaco be, “Man en kogeo wok.” 29Do en eko dwoko bade i yi toto mere, di do omin mere en oko geno wok. Manono oko mino ngat koudo cole oko waco be, “Mere epone nono en kame in iyabo kede yongayo ni tetek!” Pi mano, bin oko do cako nyinge be Peresi.w 30I cen mere di do oko nywalo omin mere di ausi tie i ngut cinge, di oko cako nyinge Seera.

Baibuli I Leb Kumam

© 2013 Bible Society of Uganda

More Info | Version Index