Search form

Ageini 40

Yosepu Ogonyo Dwong me Lek me Mabus Are

1Ceng moro acel, ngaik bwini me abaka me Misiri kede ngated mugati mere oko wango cuny abaka. 2Parao bin cunye oko wang kede jotic mege are nogi, 3di eko keto gi i otkol kame tie i ot me ngatel me isirikalen jodar paco me Parao, kakame oudo kotweo Yosepu iye. 4Ngatel me isirikalen bin oko mino Yosepu tic me gwoko gi, di gin kiko bedo i otkol tieko kare moro. 5Iwor moro acel, gin cuo are nogo, ngaik bwini kede ngated mugati me abaka me Misiri oko lek. Lek me ngat acelacel oudo pat, doko dwong gi da pat. 6Kakame Yosepu bin oko bino kede but gi odiko, en eko neno be gin oudo kitie kede par. 7Di en eko penyo jodongo me jotic ka Parao nogo, jo kame bin kotweo karacel kede en i ot me ngadwong mere be, “Pinyo bo komio wun tin itienu iturur kamano?” 8Gin di kiko gamo be, “Wan tin oleko, do likame tie ngatamoro kame romo gonyo ne wa dwong me lek nogo.” Yosepu oko waco negi be, “Mam Rubanga en kame mio jo twer me gonyo dwong me lek? Tatamunu nango lek nogo.”

9Di ngaik bwini me abaka oko tatamo ne Yosepu lek mere. En ewaco be, “Ango aleko be oudo olok tie i nyima; 10olok nono oudo tie kede jange adek. Di pwodi en elibo aliba, oyotoyot di ature mege wok, di anyakini mege da cek. 11Ango oudo amako ikopo ka Parao i cinga; di ako kwanyo anyakini me olok ako bino gi i ikopo ka Parao nono, di ako keto ikopo nono i cing Parao.” 12Yosepu oko waco ne be, “Dwong mere ine: ajange adek en ceng adek; 13Ingei ceng adek Parao bino woti ki otkol di eko dwoki i tic ni, di in iko bino keto i kopo ka Parao i cinge, bala kame lem in itimo di in oudo ibedo ngaik bwini mere. 14Do iyutuno ango da i kare kame itie kede kiber. Akwai itim na bero, iwac peko na but Parao, di iko konya awok ki kan. 15Pien i ateni ango bin kokwala akwala i lobo me Iburanian, doko ki kan da likame tie gimoro kame ango atimo kame mio koto kopoore keta i otkol.”

16Kakame bin ngated mugati me abaka oneno kede be dwong me lek me ngaik bwini me abaka oudo ber, en eko waco ne Yosepu be, “Ango da aleko be oudo atie yeno aditai adek me mugati. 17Adita me malo oudo tie iye mugati me epone dedede kame koiko ne Parao, do winy oudo tie camo gi ki adita kame oudo tie i wia.”

18Di Yosepu oko gamo be, “Dwong mere ine: aditai adek gin en ceng adek; 19ingei ceng adek Parao bino woti ki otkol di eko mino kongolo wi tenge di oko liero komi i epir di winy ko bino camo ringo komi.”

20Ceng me adek mere oudo obedo ceng kame konywalo iye Parao. En eko tedo ebaga ne jotic mege dedede, di eko woto ngaik bwini mere kede ngated mugati mere ki otkol, di eko kelo gi i nyim jotic mege. 21En eko dwoko ngaik bwini mere i wang tic mere, di en eko keto i kopo i cing Parao. 22Do ngated mugati mere en eko mino koliero i epir bala kame Yosepu oudo owaco. 23Do ngaik bwini me abaka likame bin oko yutuno Yosepu, wie oko wil i kome atwal.

Baibuli I Leb Kumam

© 2013 Bible Society of Uganda

More Info | Version Index