Search form

Ageini 45

Yosepu Onyutere but Imiegu mege

1- Di do Yosepu likame oko twero dino cunye i nyim jo dedede kame oudo tie cungo i ngete, en eko lelemo be, “Jotic dedede poore yai tenge.” Aso, likame ngatamoro oko dong but Yosepu kakame en enyutere kede but imiegu mege. 2En eko kok kede dwan amalo twatwal, omio jo me Misiri kame oudo tie i ngete kanono oko winyo, di kop nono oko tuno but jo me paco ka Parao da. 3Yosepu oko waco ne imiegu mege be, “Ango Yosepu. Benyo, papa na pwodi kuo?” Do imiegu mege likame oko twero dwoko ne kop moro, pien lworo oudo omako gi i nyime.

4Di Yosepu oko waco ne imiegu mege be, “Bianu i ngeta.” Gin kiko nyiko bute. En eko waco be, “Ango abedo ominu Yosepu kame bin wun icatunu i lobo me Misiri. 5Nan do kur ibedunu kede cwercuny amoto awangacuny pi kite kame icatanu kede kan; pien Rubanga en ocako cwanango kan di pwodi wun, pi lako kuo me jo. 6Pien kec nan otieko mwakini are i piny noni, do pur amoto kac pwodi likame oyaro bedo tie pi mwakini kany anyim. 7Rubanga oudo ogeo cwanango di pwodi wun pi mino ikwae wu dong tie i wi lobo, kede pi mino jo atot kibutu bwot. 8Aso, likame wun en kame icwaanu kan, do Rubanga en kocwaa; en etieko mina adoko ngat kame mio Parao tam kede ngat kame lo ode, bobo da ango apugo lobo me Misiri lung.

9- “Nan bunyunu ot but papa na ikounu waco ne be wode kame kolwongo be Yosepu owaco be, ‘Rubanga otieko mina adoko ngapug me Misiri lung, bia buta, kur igali. 10In ibino bedo i lobo me Gosen, doko ibino kio keda, in, idwe ni, ikwae ni karacel kede romini kede diegi, dok kede jame dedede kame itie kede. 11Ango abino mino wu cam kame mitere ne wu ki kuno, tetekeny kur ibedunu abongo cam, in kede jo me paco ni, karacel kede leini ni. Pien pwodi odong mwakini kany me kec.’ ”

12Yosepu oko meede be, “Nan wun, karacel kede in Benjamin, itiekunu neno be ango inononi Yosepu kame atie yamo kede wu. 13Poore iwacenu papa na dwongo kame ango atie kede i Misiri, kede da gi dedede kame wun itiekunu neno. Sunyunu ot ikelenu kan.”

14En eko gwako ngut omin mere Benjamin di eko donyo koko; Benjamin da oko donyo koko di gwake. 15Eko donyo gwagwako imiegu mege dedede di enoto gi di ekok. Ingei manono imiegu mege oko donyo yamo kede.

16Kakame kop otuno kede i ot ka Parao be imiegu ka Yosepu oudo obino, Parao kede jotic mege cuny gi oko bedo yom. 17Parao oko waco ne Yosepu be, “Wace imiegu ni ket yec i ngei pundan gi di kiko dok Kanan. 18Kioti kiko kelo papa gi kede jo me miere gi kane. Ango abino mino gi lobo aber kalamo i Misiri, kibino camo anyakini abeco me lobo noni. 19Wace gi da kiter cabalan ki Misiri ne idwe kede mon gi, di kiko kelo papa gi. 20Kur kibed kede par pi weko jame gi, pien jamini abeco me Misiri dedede bino doko mergi.”

21Awobe ka Yakobo oko timo bala kame kowaco negi. Yosepu oko mino gi cabalan bala kame Parao oudo owaco, di eko mino gi cam me acama i yongayo. 22En emio ngat acelacel kikom gi egoe anyen; do eko mino Benjamin igoen anyen kany kede sente akaya me siliba 300. 23Eko cwano ne papa mere gigi: pundan tomon kame yeo jamini abeco me Misiri, pundan amon tomon kame yeo cam, kede cam kame papa mere bino camo i yongayo. 24Yosepu oko cwano imiegu mege; kakame oudo kitie yai kede en eko waco negi be, “Kur ilokunu i yongayo.”

25Aso, gin kiko yai ki Misiri di kiko dok but papa gi Yakobo Kanan. 26Gin kiko waco ne papa gi be, “Yosepu pwodi tie kuo! Doko da en etie ngapug me Misiri dedede.” Wi Yakobo oko dubere; likame oudo etwero yei kop gi. 27Do kakame gin kitatamo ne kede kope dedede kame Yosepu oudo owaco negi, doko da di eko neno cabalan kame Yosepu ocwao ne pi tere kuno, cunye oko dwogo. 28Yakobo oko waco be, “Ayei do be woda Yosepu pwodi kuo. Miero aoti anene di pwodi akuo.”

Baibuli I Leb Kumam

© 2013 Bible Society of Uganda

More Info | Version Index