Search form

Jolebi 1

Giayala kame Kowango Dedede

1Rwot oko lwongo Musa di eko yamo kede i Eema me ariamakin kede en Rwot, di eko mine 2iswilia kame jo me Isirael poore lubo ka kitie mino giayala kaman:

Ka ngatamoro kibutu okelo le mere me giayala, poore ekel diang arabo oromo amoto diel.

3Ka dano tie mino giayala awanga me diang, miero ebed twon kame li kede peko moro i kome. Poore en etere i ekeko me Eema me ariamakin kede Rwot, tetekeny Rwot gam giayala nono kawang dano nono. 4Ngat nono poore cibo cinge i wi giayala awanga mere di Rwot ko bino gamo giayala nono pi kwanyo dub ka wone. 5En ebino ngolo twon nono kanono i nyim Rwot, di awobe ka Aaron, kobedo josaseredoti, ko kikiro remo mere i kom alutari i bad dedede, alutari kame tie i ekeko me Eema me ariamakin kede Rwot. 6Di do en eko yango le me giayala awanga nono di eko ngongolo en i adulion, 7di josaseredoti awobe ka Aaron ko napo yen i alutari di kiko moko mac. 8Di kiko napo i mac me alutari nono adulion me ringo nogo, ribo kiton wie kede kakamio mere da; 9do miero lwok amontena kede tiene. Di ngasaseredoti atie telo tic ko wango kom giayala nono dedede i wi alutari di yiro mere ko duny. Ngwece me giayala awanga nono yomo cuny Rwot.

10Ka dano tie mino giayala me oromo amoto diel, giayala nono poore bed ekoroi kame li kede peko moro i kome. 11En epoore ngole i bad tetu malo me alutari i nyim Rwot, di josaseredoti awobe ka Aaron ko kikiro remo mere i kom alutari i bad dedede. 12En eko bino ngongolo ringo nono i adulion, di ngasaseredoti atie telo tic ko napo ringo nono i mac me alutari, ribo kiton wie kede kakamio. 13Do miero lwok amontena kede tiene. Di ngasaseredoti atie telo tic ko wango kom giayala nono dedede i wi alutari di yiro mere ko duny. Ngwece me giayala awanga nono yomo cuny Rwot.

14Ka dano tie mino giayala awanga me winyo, miero winyo nono bed amam amoto eluke. 15Ngasaseredoti ko tere i alutari, eko mojoro ngute di eko wango wie i mac me alutari, di do eko biino remo mere cwer i nget alutari. 16En ebino kwanyo icukuliro me winyo nono kede gikame tie iye di eko uce i bad tetu kide me alutari, kakame oonyo iye buru. 17En ebino mako bwome di eko nyile epedere apeda do di likame eko mine ecot; di ngasaseredoti ko wango kom giayala nono i wi alutari di yiro mere ko duny. Ngwece me giayala awanga nono yomo cuny Rwot.

Baibuli I Leb Kumam

© 2013 Bible Society of Uganda

More Info | Version Index