Search form

Jolebi 11

Leini kame Kotwero Camo

(Iswilia 14.3-21)

1Rwot oko mino Musa kede Aaron iswilia 2amako jo me Isirael kaman: Kikom leini dedede abedo i wi lobo, ibinunu camo 3leini kame tie kede abelekek i tien gi di abelekek nono opokere, kede di engoko cam eko medo nyamo. 4-6Do kikom leini kame ngoko cam di kiko medo nyamo, likame ibinunu camo magi: aguragura, eles kede apuo. Gin kibedo leini me kwer, pien akadi bed bala kingoko cam di kiko medo nyamo, do likame gin kitie kede abelekek kopokere i tien gi. 7Likame ibinunu camo epege da, pien akadi bed bala etie kede abelekek kopokere i tiene, likame en engoko cam di eko bobo medo nyamo; en ebedo ne wu le me kwer. 8Likame ibinunu camo ringo gi, doko da likame ibinunu mulo kom gi kame kito; gin kibedo ne wu gi me kwer.

9Kikom giakuo abedo i yi pii, itwerunu camo magi: gi dedede kame tie kede abokoya kede isigigir i kom gi, di kibedo i yi name kede i yi isamai. 10Do kikom gi dedede kame bedo i yi name kede i yi isamai, likame ibinunu camo gi anyidinyidi kede giakuo apat mege kame li kede abokoya kede isigigir i kom gi. 11Giakuo nogo obedo ne wu gi me kwer, likame ipoorenu camo ringo gi, akadi mulo kom gi kame kito. 12Gi dedede kame bedo i yi pii di kili kede isigigir kede abokoya obedo gi me kwer butu.

13-19Kikom winy, likame ibinunu camo magi, pien kibedo ne wu gi me kwer: ekokom me egere apapat, acut kede winy ace kame cal kede, ebum, etori, agak, ekululu, ekeng me epone apapat, abong, etukiri me epone apapat, atudoi me nam, etolut kede winy ace kame cal kede, kede olikolik.

20Gimogo atitino apor kede bwom gi di kitie kede tien gi atot obedo gi me kwer butu, 21kwanyo kenekene atie kede tien gi kororopun di kitwero sosomo. 22Itwerunu camo obonyo kede apat kame cal kede gi, ojir kede apat kame cal kede gi, otwongo kede apat kame cal kede gi. 23Do gi atitino ace apat atie kede bwom gi di kiliao alia obedo gi me kwer butu.

24Ngat kame bino mako kom le me kwer oto bino bedo dano kopwokere tuno piny yuto. 25Doko da ngat kame bino yeno ringo gi poore lwoko igoen mege di eko dong di en dano kopwokere tuno piny yuto. 26Leini nogo gin ige: leini dedede kame tie kede abelekek i tien gi do di likame ekakarun, arabo likame engoko cam di eko medo nyamo obedo gi me kwer butu; ngat kame mulo gi bedo dano kopwokere. 27Leini dedede kame tie kede tien gi ongwon do di kitie kede lwet gi, obedo gi me kwer butu; ngat kame mulo kom gi ka kito bedo dano kopwokere tuno piny yuto, 28doko ngat kame yeo kom gi ka kito poore lwoko igoen mege, di eko dong di en dano kopwokere tuno piny yuto.

29-30Inunuk, iyoono me epone apapat, igwegwe me epone apapat, nyang kede agogou obedo gi me kwer butu. 31Ngat kame mulo gi, arabo kame mulo kom gi ka kito bedo dano kopwokere tuno piny yuto. 32Kame kito di kom gi oko poto i gimoro, gi nono doko gi kopwokere. Magonogi ribo jamini kame kopao ki kom yat, igoen, launi, ipukoi, arabo gimoro dedede kame kotio kede iepone moroni; kopoore rwako gi nono i yi pii, do di eko dong di pwodi epwokere tuno piny yuto. 33Kame moro kikom gi oko poto i yi agulu kame kocweo kede lobo, gi dedede kame tie i yi agulu nono doko gi kopwokere, doko miero nek agulu nono. 34Kame pii me akodi agulu nono oony i kom cam moro kame oudo poore acama, cam nono bino doko gi kopwokere; doko da kame gimoro kame poore amata odonyo i yi agulu nono, giamata nono da doko gi kopwokere. 35Ka kom gi oto nono opoto i gimoroni, akadi i keno amoto i tutuk me tedo, gi nono doko gi kopwokere; kopoore babaro en. 36Do atan arabo akong kame pii tie iye bedo gi kame li kede pwokere, bed bala gi atie iye koudo oriamakin kede kom gi koto dong di tie gi kopwokere. 37Kame kiko to di kom gi arabo dul kom gi oko poto i kom kodi kame oudo kopoko me acua, kodi nono likame bedo gi kopwokere; 38do ka kiko to di kom gi arabo dul kom gi oko poto i kom kodi kame kobido kede pii, kodi nono doko gi kopwokere.

39Ka le moro kame itwerunu camo oto, ngat kame mulo kom le oto nono doko dano kopwokere tuno piny yuto. 40Ka ngatamoro oko camo ringo me le nono, poore elwok igoen mege di eko dong di en dano kopwokere tuno piny yuto; doko da jo kame yeo kom le oto nono poore lwoko igoen gi di kiko dong di gin jo kopwokere tuno piny yuto. 41Gimogo anyidinyidi piny i wi lobo tie gi me kwer butu, likame ipoorenu camo gi, 42akadi bed bala kiliao aliaa kede kor gi, amoto kioto kede tien gi ongwon, arabo kitie kede tien gi atot atota. 43Kur icamunu gimoro kikom gi nogi di ikounu doko jo kopwokere. 44- Ango en Rwot Rubanga wu; lonyerenu ikounu bedo jokacil, pien ango ngat kacil. 45Ango en Rwot ngat kowoto wu ki Misiri tetekeny abed Rubanga wu; miero ibedunu jokacil piento ango da acil.

46Magonogi obedo iswilia amakere kede leini, kede winy, kede giakuo dedede abedo i yi pii, kede gikame nyidinyidi piny i wi lobo. 47Ipoorenu ngeno poko gikame kotero be opwokere kede kalikame opwokere, giakuo kame itwerunu camo kede kobedo me kwer.

Baibuli I Leb Kumam

© 2013 Bible Society of Uganda

More Info | Version Index