Search form

Jolebi 12

Lonyo Mon i ngei Nywal

1Rwot oko mino Musa iswilia 2amako jo me Isirael kaman: Ka dako oyac di eko nywalo atin awobi, dako nono bino bedo dano kopwokere pi ceng kanyaare bala i kare kame etie kede tuwo me mon. 3- I ceng me kanyauni di oko bino kepo kom atin me cuo. 4Di do en eko bino tieko ceng ot adek kiwie adek di etie lonyere pi remo kame eonyo; i kare nono likame en epoore mulo gimoro kobedo gikacil, akadi donyo i Eema kacil, tuno di ceng mege me lonyere otiek.

5Ka enywalo atin nyako, dako nono bino bedo dano kopwokere pi sabitin are, bala i kare kame etie kede tuwo me mon. Ceng mege me lonyere mere pi remo kame eonyo ko bino bedo ceng ot kanyape kiwie kanyape.

6Kame kare mere me lonyere otiek ingei nywalo atin awobi amoto nyako, en ebino tero ne ngasaseredoti i ekeko me Eema kacil atin romo me mwaka acel pi bedo giayala awanga, kede eluke amoto amam pi bedo giayala me kwanyo dub. 7Ngasaseredoti bino mino giayala ka dako nono but Rwot, di eko timo pwola me kwanyo pwokere mere, di eko doko dano kolonyere. Manoni en gikame dako poore timo kame enywal.

8- Ka en ebedo ngacan likame etwero kwanyo oromo, poore ekwany amam are amoto ilukei are; acel bino bedo giayala awanga kede acel bino bedo giayala me kwanyo dub; di ngasaseredoti ko timo pwola me kwanyo pwokere mere di en eko bino doko dano kolonyere.

Baibuli I Leb Kumam

© 2013 Bible Society of Uganda

More Info | Version Index