Search form

Jolebi 13

Iswilia amako Tuwo me Delkom

1Rwot oko mino Musa kede Aaron iswilia gi: 2Ka ngatamoro tie kede gimoro koluro i kome, arabo giakwoti, arabo karamoro akokolo, di gi nono twero nyai di eko doko tuwo arac me delkom, poore tere but ngasaseredoti moro kikom Aaron kede awobe mege. 3Ngasaseredoti bino ngico tuwo kame tie i kome nono; ka eko udo be yer me kakame tuwo nono omako odoko tar, doko di ecamo delkome paka donyo i yie, en ebino ngeno be manono obedo tuwo arac me delkom; ingei ngingico en, ngasaseredoti bino tuco kakaler be dano nono obedo dano kopwokere. 4Do ka buge nogo tar do di likame kingodo delkome, doko da di yer me kanono likame odoko tar, ngasaseredoti bino kong cego dano nono i ot pi ceng kanyaare. 5Di ngasaseredoti ko bino ngingico en i ceng me kanyaare; ka en eko neno be tuwo nono pwodi tie kede cal mere nono, di likame enyai, ngasaseredoti bino medo bobo cege i ot pi ceng kanyaare. 6Di ngasaseredoti ko bino bobo ngingico en i ceng me kanyaare; ka en eko udo be tuwo nono odok cen likame enyai i delkome, en ebino tuco kakaler be dano nono obedo dano kame li kede pwokere, pien udo manono obedo tuwo me buge kenekene. Di do dano nono ko bino lwoko igoen mege di eko bedo dano kame li kede pwokere. 7Do ka tuwo nono oko bobo cere i cen ngei ngasaseredoti waco kakaler be dano nono obedo ngat kame li kede pwokere, en miero bobo edok but ngasaseredoti ot ngingico en. 8Ngasaseredoti bino ngingico en; ka en eko udo be tuwo nono onyai i delkome, ngasaseredoti bino waco kakaler be dano nono obedo ngat kopwokere; manono udo obedo tuwo arac me delkom.

9Ka dano moro tie kede tuwo arac i delkome, kopoore tere but ngasaseredoti, 10di en eko ngingico en. Ka buge atatar di wang gi lit tie i kome, di kiloko yer me kakame kitie iye odoko tar, 11manono udo obedo tuwo arac me delkom. Ngasaseredoti bino tuco kakaler be dano nono obedo ngat kopwokere; likame ngasaseredoti bino cege i ot, piento en ebedo dano kopwokere. 12Do ka tuwo nono osarakin i kome dedede yai ki tiene tuno i wie, 13ngasaseredoti bino ngingico en bobo. Ka en eko udo be tuwo nono oromo kome lung, en ebino tuco kakaler be dano nono likame opwokere, pien udo kome lung odoko tar pi roc. 14Do ka buge atie i kome wang gi obalacar, dano nono bino bedo ngat kopwokere. 15Ngasaseredoti bino ngingico en; ka en eko udo buge mege wang gi obalacar, en ebino waco kakaler be dano nono obedo ngat kopwokere. Buge awang gi obalacar obedo tuwo arac me delkom; ngat atie kede gi udo en ebedo dano kopwokere. 16Do ka wang buge odoko tar, en ebino dok but ngasaseredoti, 17di en eko bino ngingico en. Ka en eko udo be wang buge nogo odoko tar kitie cango, ngasaseredoti bino waco kakaler be dano nono obedo ngat kame li kede pwokere.

18Ka dano moro tie kede karamoro i kome me giakwoti kocango, 19di bobo gimoro atar oko luro kanono, arabo gimoro akwakwar di tatar oko lukere kanono, dano nono bino ot but ngasaseredoti. 20Ngasaseredoti bino ngingico en; ka eko udo be kanono ongodaun, doko yer mege odoko tar, ngasaseredoti bino tuco kakaler be dano nono obedo ngat kopwokere; manono obedo tuwo arac me delkom kocakare kede giakwoti. 21Do ka ngasaseredoti ongingico en di eko udo yer me kanono likame odoko tar, doko da likame engodaun do etie tuo, ngasaseredoti bino cege i ot pi ceng kanyaare. 22Ka kanono oko medo camere, ngasaseredoti bino tuco kakaler be dano nono obedo ngat kopwokere; manono obedo tuwo arac me delkom. 23Do ka kanono likame oko medo camere, di eko dong adonga di etie apore kocango me giakwoti, ngasaseredoti bino waco kakaler be dano nono obedo ngat kame li kede pwokere.

24Ka mac owango dano moro, bur me mac nono oko doko tar arabo kwakwar di etatar, 25ngasaseredoti bino ngingico dano nono. Ka yer me kanono odoko tar di kanono ongodaun, manono udo tuwo me delkom en ocakere kanono; ngasaseredoti bino tuco kakaler be dano nono obedo ngat kopwokere. 26Do ka ngasaseredoti ongingico kanono di eko udo be yer mege likame odoko tar, doko da likame engodaun do etie cango, ngasaseredoti bino cege i ot pi ceng kanyaare. 27Ngasaseredoti ko bino ngingico en i ceng me kanyaare; ka eko udo kanono tie medo nyai, en ebino tuco kakaler be dano nono obedo dano kopwokere. Manono udo obedo tuwo arac me delkom. 28Do ka apore nono odong kamanono likame enyai, doko da di wange tie cango, manono udo obedo gi okokolo pi mac; ngasaseredoti bino tuco kakaler be dano nono obedo ngat kame li kede pwokere, pien manono mac en omio okokolo.

29Ka icuo amoto dako moro tie kede buge i wie amoto i tike, 30ngasaseredoti bino ngingico buge nogo. Ka buge nogo ongodaun di yer me kakame kitie iye tie bisali bisali di kiner, manono udo obedo tuwo arac me delkom; ngasaseredoti bino tuco kakaler be dano nono obedo ngat kopwokere. 31Ka ngasaseredoti ongingico buge nogo di eko udo be kakame kitie iye likame ongodaun, do kenekene yer me kanono likame kom gi yot, en ebino cege i ot pi ceng kanyaare. 32I ceng me kanyaare ngasaseredoti bino ngingico kakame buge nogo tie iye; ka eko udo buge nogo likame onyai, doko di kanono li kede yer abisali bisali, kede da di likame engodaun, 33dano nono bino lielo wie dedede kwanyo kenekene kakame buge nogo tie iye. Di ngasaseredoti ko bino bobo cege i ot pi ceng kanyaare. 34I ceng me kanyaare, ngasaseredoti bino ngingico kanono; ka eko udo buge nogo likame onyai, doko da kanono likame ongodaun, ngasaseredoti bino tuco kakaler be dano nono obedo ngat kame li kede pwokere. En ebino lwoko igoen mege di eko bedo dano kacil. 35Do ka buge nogo oko nyai i cen mere ingei tuco kakaler be en dano kame li kede pwokere, 36ngasaseredoti bino bobo medo ngingico en; ka eudo buge nogo bobo onyai, likame bobo en ebino paro ngino ka kanono tie kede yer abisali bisali; dano nono do udo tie dano kopwokere. 37Do ka en eneno di eko udo be buge nogo likame onyai, doko yer me kanono kom gi yot, udo buge nogo ocango, ngasaseredoti bino tuco kakaler be dano nono obedo ngat kame li kede pwokere.

38Ka icuo amoto dako moro tie kede gimogo kolukulukun di tar i kome, 39ngasaseredoti bino ngingico en; ka eudo kagonogo tie kede tar acocol, manono udo gwenyu en komake; dano nono udo likame opwokere.

40-41Ka icuo moro yer odore ki toke amoto ki nyime, udo bono en omake do likame udo epwokere. 42Do ka buge mogo owok i bono nono akwakwar di tatar, manono udo obedo tuwo arac me delkom. 43Ngasaseredoti bino ngingico en; ka buge atie i bono mere nono kwakwar di kitatar, di cal acala bala tuwo arac me delkom, 44ngasaseredoti bino tuco kakaler be en ebedo dano kopwokere, pien udo etie kede tuwo arac me delkom i wie.

45Dano atie kede tuwo arac me delkom poore ngapo igoen konyinyilun di eko weko wie di likame ekuro; doko da nakanaka epoore umo doge di elelemo be, “Ango apwokere, ango apwokere!” 46En ebino dong di epwokere nakanaka tek di pwodi en etie kede tuwo nono, doko da epoore bedo tenge me kimere, epoore bedo kene.

Iswilia amako Gikopurao

47Ka egoe opurao, bed bala en ebedo egoe kame kotimo kede yer me oromo arabo egoe moro aliamaliam; 48ka dul moro opurao me egoe aliamaliam, amoto me egoe kame kotimo kede yer me oromo, amoto ka etimere i kom emukule arabo gimoro kenekene kame kotimo kede emukule, 49ka eko doko lulum arabo kwakwar, manono udo obedo gikarac apurao, miero nyute but ngasaseredoti. 50Ngasaseredoti bino ngingico gi nono di eko ber kane pi ceng kanyaare. 51I ceng me kanyaare en ebino doko medo ngingico en; ka eko udo kakopurao nono omedo nyai, udo egoe arabo gi nono otieko doko gikame opwokere. 52Ngasaseredoti bino wange, pien udo etie kede gikarac atie nyai, kame poore wang kede mac.

53Ka ngasaseredoti ongingico di eko udo be gikopurao nono likame omedo nyai i kom egoe arabo i kom gi nono, 54en ebino mino kolwoke di oko ber doko kane pi ceng kanyaare. 55I ceng me kanyaare en ebino doko ngingico en; ka eko udo be gikopurao nono likame oloko cal mere, akadi di likame emedo nyai, udo gi nono otieko doko gikame opwokere, kopoore wange i mac, bed bala gikopurao nono tie i yie amoto i ooko mere. 56Do ka ngasaseredoti ongingico en bobo di eko udo be gikopurao i kom gi nono otieko kwanyere, en ebino nyilo tenge kakame oudo opurao nono. 57Ka gikopurao nono oko bobo dwogo di eko cako nyai, won gi nono poore wange i mac. 58Ka en elwoko gi nono di kanono oko rwenyo, en epoore lwoke bobo di eko bino bedo gimoro kame li kede pwokere.

59Manoni en iswil amako gikame purao i kom egoe, bed bala ebedo egoe kame kotimo kede yer me oromo arabo egoe moro aliamaliam; ka dul moro opurao me egoe aliamaliam, amoto me egoe kame kotimo kede yer me oromo, arabo i kom gikame kotimo kede emukule moro ace; manoni en epone me moko ka edoko gikame opwokere amoto li.

Baibuli I Leb Kumam

© 2013 Bible Society of Uganda

More Info | Version Index