Search form

Jolebi 14

Lonyere ingei Bedo kede Tuwo me Delkom

1Rwot oko mino Musa 2- iswilia amako pwola me lonyere me dano kame tuwo mere me delkom ocango kaman:

Kobino tere but ngasaseredoti, 3di ngasaseredoti ko tere tenge me kimere di eko ngingico en. Ka tuwo me delkom kame dano nono oudo tie kede ocango, 4ngasaseredoti bino mino kokelo pir ngat kame kotie lonyo nono winy akuo are kalikame obedo winy me kwer, kede yat seda, kede ausi akwar, kede emompir. 5Ngasaseredoti ko bino mino kongolo winyo acel i wi pii atie i agulu, pii kame kotwomo i atan amol. 6Di do eko bino tero winyo akuo kodong, kede yat seda, kede ausi akwar, kede emompir, di eko rwako gi i remo me winyo kame kongolo i wi pii atie i agulu. 7Di eko kikiro remo nono tien kanyaare i kom ngat kame kotie lonyo ki tuwo arac me delkom, di do eko bino tuco kakaler be dano nono likame opwokere, di eko jalakino winyo akuo nono por eoto obar. 8Di dano nono ko lwoko igoen mege, di eko lielo wie, di eko bol; di do en eko bino doko ngat kame li kede pwokere. Ingei manono en ebino dok kakame kimere tie iye, do ebino tieko ceng kanyaare di likame edonyo i eema mere. 9I ceng me kanyaare en ebino bobo lielo wie, tike, abukewange; en ebino lielo yer dedede atie i kome. Di en eko bino lwoko igoen mege di eko bol, di do eko doko dano kame li kede pwokere.

10I ceng me kanyauni en eko bino kelo romini are acuo, kalikame tie kede peko moro i kom gi, kede oromo akaale me mwaka acel kalikame tie kede peko moro i kome, kilo adek me alos kame konyongo kede mo me olibeti, kede mo me olibeti anoko dul lita. 11Ngasaseredoti atie timo pwola me lonyere bino cibo dano atie lonyere nono kede giayala nogi i ekeko me Eema me ariamakin kede Rwot. 12Di do ngasaseredoti ko bino kwanyo emerekek acel karacel kede mo anoko dul lita di eko yalo gi bala giayala me timo cul. En ebino kiarao gi malo i nyim Rwot. 13Ebino ngolo oromo nono kakame kongolo iye leini me giayala me kwanyo dub kede giayala awanga i kabedo kacil; pien giayala me timo cul, bala giayala me kwanyo dub da, dong ne ngasaseredoti; en ebedo gikacil twatwal. 14Ngasaseredoti bino kwanyo remo mogo me oromo nono di eko keto i yit dano kame kotie lonyo nono me bad tetu cam, kede i lwete adwong me cinge tetu cam, kede i lwete adwong me tiene tetu cam. 15Ngasaseredoti ko onyo mo mogo i yi cingen ngasaseredoti me tetu ngodal, 16di eko rwako iye lwete me cinge tetu cam, di eko kikiro mo mogo i nyim Rwot kanono tien kanyaare. 17Di eko bino kwanyo mo mogo kodong i yi cinge tetu ngodal, di eko kete i yit dano nono me bad tetu cam, kede i lwete adwong me cinge tetu cam, kede i lwete adwong me tiene tetu cam, kakame oudo koketo iye remo me giayala me timo cul. 18Mo apat kodong i yi cing ngasaseredoti en ebino keto i wi dano kame kotie lonyo nono. Epone noni en kame ngasaseredoti bino timo kede pwola me lonyere.

19Di do ngasaseredoti ko mino giayala me kwanyo dub pi ngat kame kotie lonyo ki pwokere mere nono. Ingei manono en ebino ngolo oromo me giayala awanga 20di eko yale karacel kede giayala me alos i wi alutari. Iepone noni, ngasaseredoti bino timo pwola me lonyo dano kopwokere di en eko doko dano kolonyere.

21Do ka en ebedo ngacan likame etwero kwanyo gigo dedede, en ebino kelo emerekek acel bala giayala me timo cul kame kobino kiarao, kilo acel kenekene me alos kame konyongo kede mo me olibeti pi bedo giayala me alos, kede mo anoko dul lita. 22Ebino kelo da amam are amoto ilukei are, di lubere kede kite kame en etwero kede; acel bino bedo giayala me kwanyo dub kede acel ko bedo giayala awanga. 23I ceng me kanyauni me lonyere mere en ebino tero gi but ngasaseredoti i ekeko me Eema me ariamakin kede Rwot, i nyim Rwot. 24Ngasaseredoti bino kwanyo oromo kede mo me olibeti di eko kiarao gi i nyim Rwot. 25Ngasaseredoti ko bino ngolo oromo me giayala me timo cul, di eko kwanyo remo mogo me giayala nono di eko keto i yit dano kame tie lonyere nono me tetu cam, i lwete adwong me cinge tetu cam, kede i lwete adwong me tiene tetu cam. 26Ngasaseredoti ko onyo mo mogo i yi cinge en ngasaseredoti me tetu ngodal, 27di eko rwako iye lwete me cinge tetu cam, di eko kikiro mo mogo i nyim Rwot kanono tien kanyaare. 28Di eko bino kwanyo mo mogo kodong i yi cinge tetu ngodal, di eko kete i yit dano nono me bad tetu cam, kede i lwete adwong me cinge tetu cam, kede i lwete adwong me tiene tetu cam, kakame oudo kokeketo iye remo me giayala me timo cul. 29Mo apat kodong i yi cing ngasaseredoti en ebino keto i wi dano kame kotie lonyo nono. Epone noni en kame ngasaseredoti bino timo kede pwola me lonyo dano kopwokere. 30Di do ngasaseredoti ko bino yalo amam arabo eluke acel, di lubere kede kite kame etwero kede, 31bala giayala me kwanyo dub, kede ocelu mere eko yalo bala giayala awanga karacel kede giayala me alos. Iepone noni, ngasaseredoti bino timo pwola me lonyo dano kopwokere. 32Manoni en pwola amako dano atie kede tuwo arac me delkom do di likame etwero kwanyo giayala kame mitere me lonyere.

Gikame Purao i Ude

33Rwot oko waco ne Musa kede Aaron kaman: 34Kame itununu i lobo me Kanan, en lobo kame ango amio wu pi doko meru, di ango ako keto gikame purao i ot ka ngatamoro, 35won ot nono bino ot but ngasaseredoti di eko waco ne kop i kom gi nono. 36Ngasaseredoti ko bino mino kokwanyo jame dedede atie i ot nono ooko, aso ka li, jamini nogo dedede kobino waco be opwokere. En eko bino donyo i yi ot 37di eko ngingico gikopurao nono. Ka eko udo kakalulum amoto akwakwar, di eneeno bala etieko roko apama, 38ngasaseredoti bino wok ooko di eko gono ot nono pi ceng kanyaare. 39Di en eko bino bobo dwogo i ceng me kanyaare di eko medo ngingico en. Ka eko udo gi nono omedo nyai i apama me ot, 40en ebino mino cik di oko tako ingaroi me apama kakopurao nono di oko ot uco gi kakopwokere ooko me bomba. 41Ingei manono en ebino mino kokiso apama me ot dedede kiber ki yie, di oko ot onyo gikame kokiso nogo kakopwokere tenge me bomba. 42Di oko bino lunyo keto engaro apat kawang kame kokwanyo noka, doko di oko medo puco ot kiber.

43Ka ot bobo oko cako purao ingei en tako ingaroi kede kikiso apama kede doko medo puce, 44ngasaseredoti bino ot di eko ngingico en; ka eko udo kakopurao onyai i ot, udo ot nono otieko pwokere. 45En ebino mino koreto ot nono, di oko tako ingaroi, ibaon kede apama mere dedede, di oko tero gi tenge me bomba kakopwokere. 46Ngatamoro kame bino donyo i ot kame kogengo pien epurao, ngat nono bino doko dano kopwokere tuno piny yuto; 47doko da jo dedede kame bino buto arabo cam i ot nono poore lwoko igoen gi.

48Ka ngasaseredoti obino di eko ngingico di eko udo be kakopurao likame bobo omedo neeno ingei puco ot nono, en ebino tuco kakaler be ot nono likame opwokere, gikopurao otieko kwanyere. 49Di do pi lonyo ot nono en ebino kwanyo winy are, yat seda, ausi akwar kede emompir. 50En ebino ngolo winyo acel i yi agulu kame tie kede pii kame kotwomo ki atan amol, 51di eko kwanyo yat seda kede emompir kede ausi akwar karacel kede winyo akuo mere, di en eko rwako gi i remo me winyo kame kongolo i wi pii ca. Di eko kikiro remo nono tien kanyaare i kom ot kame kotie lonyo nono. 52Epone noni en kame kobino lonyo kede ot kopwokere kede remo me winyo, kede pii me atan amol, kede winyo akuo, kede yat seda, kede emompir kede ausi akwar. 53En eko bino jalakino winyo akuo nono por eoto obar tenge me bomba. Iepone noni, ngasaseredoti bino timo pwola me lonyo ot kopwokere di en eko doko ot kolonyere.

54Magonogi en pwola amako tuwo arac me delkom; 55-56buge, giakwoti, gikame kokolo; kede gikame purao i kom igoen kede i ude. 57Iswilia nogi moko ka gimoro obedo gikame opwokere arabo li.

Baibuli I Leb Kumam

© 2013 Bible Society of Uganda

More Info | Version Index