Search form

Jolebi 17

Iswilia amako Remo

1Rwot oko waco ne Musa pi 2waco ne Aaron kede awobe mege karacel kede jo me Isirael dedede kaman: Man en gikame Rwot otieko ciko. 3Ka dano moro me Isirael ongolo diang arabo oromo amoto diel bala giamia but Rwot i tenge me kimere, 4akaka kele i ekeko me Eema me ariamakin kede Rwot pi mine bala giayala i nyim taberenakol ka Rwot, icuo nono bino bedo kede raco me onyo remo; udo en etieko onyo remo doko miero riame tenge kibut jo me Isirael. 5Iswil noni tie tetekeny jo me Isirael kel ne Rwot giayala me leini gi kame lem gin kiyalo i obar. Gin nataman do kibino kelo gi i nyim ekeko me Eema, but ngasaseredoti, di kiko neko gi bala giayala me nywak. 6Ngasaseredoti bino kikiro remo i kom alutari kame tie i nyim ekeko me Eema, di eko wango kakamio kame dunyo ngwece amit but Rwot. 7Jo me Isirael likame miero bobo mi giayala gi moro but jwogi acal bala diegi, kame oudo omio gi kibedo jo kalikame genere buta. Manoni en iswil kame gin poore kilubi pi kare lung me anyim.

8Dano moroni me Isirael arabo ngakumbor moro kame bedo kede gin, kame mio giayala awanga arabo giayala moroni, 9di likame en eko kele i ekeko me Eema pi yale buta, kobino riame tenge kibut jo me Isirael.

10- Ka dano moro me Isirael arabo ngakumbor moro kame bedo kede gin oko camo remo, ango abino dagi dano nono di ako riame tenge kibut jo mege. 11- Pien kuo me giakuo tie i remo; doko ango atieko mino wun remo pi wun timo kede pwola i wi alutari me kwanyo dub wu; remo en kame kwanyo dub piento en ebedo kuo. 12Pi mano, ango atieko waco ne jo me Isirael be likame tie ngatamoro kikom gin kame bino camo remo, akadi ngakumbor kame bedo kede gi.

13Ka dano moro me Isirael arabo ngakumbor kame bedo kede gin oko ot dwaro le arabo winyo moro kame ocamo, en ebino onyo remo mere piny di eko ume kede lobo, 14pien kuo me gi akuo dedede tie i remo. Manono en komio ango awaco ne jo me Isirael be gin likame kibino camo remo me giakuo moroni; ngat kame bino camo remo, kobino riame tenge kibut jo.

15Ngatamoroni, dano me Isirael arabo ngakumbor, kame camo ringo me le oto amoto ringo me le kame leini me obar oneko, en ebino lwoko igoen mege di eko bol kede pii, di eko dong kuro tuno otieno en amio eko doko cil. 16Do ka en likame eko lwoko igoen mege kede eko bol, raco mere bino bedo i wie.

Baibuli I Leb Kumam

© 2013 Bible Society of Uganda

More Info | Version Index