Search form

Jolebi 18

Tim kalikame Iswil Yei amakere kede Buto

1Rwot oko waco ne Musa pi 2waco ne jo me Isirael be, “Ango en Rwot Rubanga wu. 3Wun likame ibinunu lubo tim me jo me Misiri, piny kame oudo wun ibedunu iye, doko likame ibinunu lubo tim me jo me lobo me Kanan, lobo kame ango atie tero wu iye. Wun likame ibinunu lubo itok gin. 4Wun miero ilubunu iswilia nango di ikounu timo gikame ango aciko ne wu. Ango en Rwot Rubanga wu. 5- Miero ilubunu cik kede iswilia nango; ngat kame lubo gi bino kuo. Ango en Rwot.

6“Likame ngatamoro kikomu poore ot but dano kame obedo wad gi kiyapiyapi pi buto kede bala dako kede icuo. Ango en Rwot. 7Kur ibut kede toto ni di iko kelo ne papa ni lewic. En ebedo toto ni; in likame ibino buto kede. 8- Kur ibut kede dako ka papa ni. Manono kelo ne papa ni lewic. 9- Kur ibut kede amini; amini kame papa wu acel arabo amini kame toto wu acel, kame onywalo i paco acel kedi arabo konywale tenge. 10Likame ipoore buto kede nyar ka wodi arabo nyar ka nyari; manono kelo ni lewic. 11Likame ipoore buto kede amini kame toto ni kede mere obedo mon nyek; eda ebedo amini. 12Likame ipoore buto kede awa ni, amin me papa ni; en wad kiyapiyapi kede papa ni. 13Likame ipoore buto kede awa ni, amin me toto ni; en ebedo wad kiyapiyapi kede toto ni. 14Likame ipoore buto kede dako ka omin me papa ni; eda ebedo toto ni. 15- Likame ibino buto kede dako ka wodi; en ebedo dako ka wodi; in likame ibino buto kede. 16- In likame ibino buto kede dako ka omini; manono kelo ne omini lewic. 17- Likame ibino buto kede nyar dako kame in itieko buto kede, arabo nyar ka wode, arabo nyar ka nyare; gin kibedo joawade mege. Manono obedo gikarac twatwal. 18Likame ibino nyomo amin me dako ni di pwodi dako ni tie kuo.

19- “Likame ipoore buto kede dako di etie kede tuwo me duwe, pien udo etie kede pwokere. 20- Likame ipoore buto kede dako ka dano apat; manono bino mino imunaun. 21- Likame ibino mino atin ni moro pi bedo giayala but rubanga Molek, pien manono bino kelo acae i nyinga ango Rubanga wu. Ango en Rwot. 22- Likame ibino buto kede icuo wadu bala dako. Manono obedo gikame rac twatwal. 23- Likame ibino buto kede le moro di iko munaun kede, akadi dako moro da likame bino mino le moro buto kede; manono obedo tim arac twatwal.

24“Kur imunaununu kede tim nogo, pien tim nogo en kame atekerin kame ango atie riamo tenge ki lobo kame wun itienu ot iye oudo omunaun kede. 25Tim gin nogo oudo oko munao lobo; ango ako mino lobo alola pi dub gin, di ango ako riamo gi ki lobo nono. 26Do wun ibinunu lubo iswilia kede cik na di likame ikounu timo tim areco kame cal kamagonogo, wun jo me Isirael arabo jokumbor kame bedo kede wu, 27pien jo kame oudo bedo i lobo nono di pwodi wun likame idonyunu iye bin otimo tim areco nogo dedede di gin kiko mino lobo omunaun. 28Ka wun itimunu tim kame munao lobo nono, ango abino riamo wu tenge ki lobo nono bala kame oudo ariamo kede jo kame oudo bedo i lobo nono di pwodi wun. 29Ngatamoroni kame bino timo tim moro kikom tim areco nogi, kobino riame kibut jo me Isirael.

30“Aso, poore igwokunu gikame ango aciko ne wu di likame ikounu timo tim areco nogi, kame oudo jo kame bedo i lobo nono di pwodi wun otimo, doko kur imunaununu kede tim nogo. Ango en Rwot Rubanga wu.”

Baibuli I Leb Kumam

© 2013 Bible Society of Uganda

More Info | Version Index