Search form

Jolebi 19

Iswilia amako Bedo kede Tim Kopoore

1Rwot oko waco ne Musa 2- pi waco ne jo me Isirael be, “Bedunu jokacil, pien ango Rwot Rubanga wu, ango ngat kacil. 3- Ngat acelacel miero mi toto mere kede papa mere wor, doko miero igwokunu ceng Sabato na. Ango en Rwot Rubanga wu.

4- “Kur ilokerenu woro caljwogi arabo itimunu cal mogo kede nyonyo di ikounu woro gi. Ango en Rwot Rubanga wu.

5“Kame ingolunu le bala giayala me nywak, lubunu iswilia kame ango atieko mino wu tetekeny ango agam giayala nono. 6Ringo nono miero kocame i ceng kame koneko iye le nono, arabo i ceng kame lubo mere. Ringo moro kame bino dong tuno i ceng me adek miero kowange. 7Ka oko camo ringo moro kikom manono i ceng me adek, udo etie gi me kwer, ango likame abino gamo giayala nono. 8Ngatamoroni kame came bino udo alola, piento en udo likame enyuto wor i kom gikame komio but Rwot; ngat kame timo kamanono kobino riame tenge kibut jo me Isirael.

9- “Kame itienu kwanyo cam ki poti wu, kur ikwanyunu cam kame tie ilak poti, doko kur idokunu nyogao depo cam kodong i poti. 10Likame ibinunu ngwedo olok wu pitipit ki poti, arabo medo dok i poto me olok pi nyogao depo olok kame oudo opopoto; ibinunu weko gi ne jocan kede jokumbor. Ango en Rwot Rubanga wu.

11- “Kur ikwalunu gimorob ; kur iserunu jo; doko kur ingalerenu kenu kenu. 12- Kur ilairunu kede nyinga i kope kalikame tie me ateni, pien manono mio ipwokunu nyinga. Ango en Rwot.

13- “Kur iterunu jamini me jo wadu i yore arac arabo iyakunu gi. Kur idagunu culo jo kame imiunu tic; kur ibutunu kede cul gi tuno odiko. 14- Kur ilamunu edingo arabo iriunu isiki i nyim emuduk pi getaro en. Ipoorenu lwora; ango en Rwot.

15- “Likame ipoorenu ngolo kop kalikame tie kakare; likame ibinunu bedo kede apokapoka but jocan arabo lworo joabar, do ibinunu ngolo ne jo kop kakare. 16Likame ipoorenu sarakino kope me abe i kom ngatamoro, doko kur imiunu ijura me abe i kom kop kame kelo ne dano to. Ango en Rwot.

17- “Kur idingerenu kede wade wu, do wacenu gi raco gi i nyim gi, ka li, wuda ibinunu bedo kede raco. 18- Likame ibinunu timo onyanga arabo mako ading kede dano wu moro, do ibinunu maro dano wadu bala kame imarerenu kede kenu. Ango en Rwot.

19- “Ibinunu gwoko cik nango. Likame ibinunu mino leini me epone apapat kwarere; likame ibinunu cuno kodere me epone are apapat i poto acel. Doko likame ibinunu ngapo igoen kame konyanyalo timo kede ausin me epone are.

20“Ka icuo moro obuto kede nyako apasoit kame oudo kotieko cikere pi mino but icuo apat, akadi bed bala icuo apat nono oudo pwodi likame otimo cul me lake, nyako apasoit nono kede icuo kobuto kede poore mii gin dedede alola. Gin likame kobino neko gi pien oudo pwodi likame kogonyo apasoit nono; 21do icuo bino kelo emerekek i ekeko me Eema me ariamakin kede Rwot pi bedo giayala me cul. 22Di ngasaseredoti ko bino timo pwola kede oromo nono pi kwanyo dub kame icuo nono oudo otimo; di Rubanga ko bino sasiro en ki dub nono.

23“Kame wun ikounu tuno i lobo me Kanan di ikounu pito yen kame kocamo anyakini gi, ibinunu tero anyakini nogo bala gikame kokwero ne wu. Likame ibinunu camo gi tieko mwakini adek kame geo. 24I mwaka me ongwon mere anyakini dedede kobino mino buta bala giayala kame nyuto pwoc wu buta, ango Rwot. 25Do i mwaka me kany mere wun do ikounu karuno camo anyakini me yen nogo. Ka itimunu kamano, yen wu bino nyak twatwal. Ango en Rwot Rubanga wu.

26- “Likame ibinunu camo ringo moro kame remo pwodi tie iye. Likame ibinunu timo tim me jwok. 27- Likame ibinunu kebo yer me wi wu arabo lielo tiku. 28Likame ibinunu teteo komu arabo cwicwinyo komu pi timo alama moro me koko jo oto.

29- “Kur ikelunu acae i kom anyira wu i yore me mino gi bedo imalayan me tempulo;c ka ikounu timo kamanono, ibinunu lokere woro rubangan apat di tim areco ko bino nyai i lobo nono. 30- Ibinunu gwoko Sabato na, di ikounu mino kabedo na kacil wor. Ango en Rwot.

31- “Kur ilokerenu ot mono tam kibut imuroko lango arabo jojwogi, pien gin kibino munao wu. Ango en Rwot Rubanga wu.

32“Nyutunu wor but jo oti, winyunu kop gi; doko ibinunu lwora. Ango en Rwot.

33- “Likame ibinunu tero kirac jokumbor kame bedo kede wu i lobo wu. 34Ibinunu tero gi bala jo wadu me Isirael. Ibinunu maro gi bala kame imarerenu kede kenu kenu, pien wuda oudo ibedunu jokumbor i lobo me Misiri. Ango en Rwot Rubanga wu.

35- “Kur itimunu gi kalikame tie kakare, i yore me pimo boro me jamini kirac, pimo peko me jamini kirac, amoto pimo rom me jamini kirac. 36Ibinunu tic kede misanin kame tie kakare, kide me ateni me pimo peko me jamini, ikopon kame tie kakare me pimo kal, kede jamini me pimo mo kame tie kakare. Ango en Rwot Rubanga wu, ngat kame okwanyo wu ki lobo me Misiri. 37Ibinunu gwoko iswilia kede cik nango dedede, doko miero ilubunu gi. Ango en Rwot.”

Baibuli I Leb Kumam

© 2013 Bible Society of Uganda

More Info | Version Index