Search form

Jolebi 21

Josaseredoti Poore bedo Jokacil

1Rwot oko waco ne Musa pi waco ne josaseredoti, awobe ka Aaron be, “Likame tie ngatamoro kikom josaseredoti kame miero mul kom wad gi moro oto di eko munaun, 2kwanyo ka dano nono obedo toto mere, papa mere, wode, nyare, omin mere, 3arabo amin mere kalikame onyomo, kame en egwoko. 4Likame ebino munao kome ka ore moro oko to.c

5- “Josaseredoti likame bino lielo kakamogo i wi gi di ko dong ler, arabo ngolo yer me tik gi, amoto teteo kom gi pi nyuto iturur. 6Gin kibino bedo jokacil but ango Rubanga gi, doko likame kibino kelo acae i nyinga. Pien gin kimio giayala awanga me cam buta, gin poore kibed jokacil. 7Gin likame kibino nyomo mon kame otieko timo malaya arabo kame kotieko buto kede gi, amoto kame cwog gi oriamo gi, pien gin kibedo jokacil but Rubanga gi. 8Jo poore ter gi bala jokacil, pien gin kimio giayala me cam but ango Rubanga wu. Ango Rwot abedo ngat kacil, doko alonyo jo na kibedo cil. 9Ka nyar ngasaseredoti moro oko doko malaya, en ekelo ne papa mere acae; kobino wange paka to.

10“Ngasaseredoti kame oko tingo ne dwongo kikom jowote, en ngat kame kowiro kede mo, di oko kwere pi ngapo igoen me ngasaseredoti, likame ebino weko yer wie bedo di likame ekuro, akadi nyinyilo igoen me kome bala dano kame tie koko ngat oto. 11En likame ebino ot kakame dano oto tie iye; en likame ebino munao kome akadi di ngat oto nono obedo papa mere arabo toto mere. 12En likame ebino yai ki Kabedo Kacil di eko ot kakame dano oto tie iye, pien manono bino mino ekelo acae Kabedo na Kacil; piento en kotieko kwere buta di owire kede mo na. Ango en Rwot. 13En ebino nyomo dako kame icuo moro pwodi likame obuto kede. 14En likame ebino nyomo apuserut, dako kame cware oriame, arabo dako kame kotieko buto kede, amoto malaya. En ebino nyomo nyako me ekeko kame en ewok kiye, 15tetekeny kur emi idwe mege bed jo kopwokere kikom jo mege; pien ango en Rwot ngat kame alonye.”

16Rwot oko waco ne Musa 17be ewace Aaron be, “Likame tie akwari moro kame tie kede angwal moro, kame bino noka pi mina giayala awanga me cam. Manoni tie pi kare lung me anyim. 18Likame tie dano moro kame tie kede angwal moro kame bino noka pi mina giayala: emuduk arabo engwalas, icuo kame tuo odudubo nyime, arabo kame tie kede peko moro i kome; 19icuo kame cinge arabo tiene ongwalo; 20arabo dano kame ngee oguraun, amoto dano acecek twatwal, arabo icuo kame tie kede tuwo me wang amoto kame buge arabo gwenyu omako kome, arabo icuo moro kame ilem me mane odudubun. 21Likame tie akwar Aaron ngasaseredoti moro, kame tie kede angwal moro, kame bino noka pi mina giayala awanga; piento en etie kede angwal, en likame ebino noka pi mino ango Rubanga mere giayala me cam. 22En ekaruno camo cam dedede kame komio but ango Rubanga mere, cam kacil kede kacil kalamo. 23Do piento en etie kede angwal, en likame ebino noko egoe me isenge akadi alutari, tetekeny kur epwok kabedo na kacil; ango en Rwot ngat kame alonyo gin.” 24Aso, Musa oko yamo kope nogo ne Aaron kede awobe mege kede but jo me Isirael dedede.

Baibuli I Leb Kumam

© 2013 Bible Society of Uganda

More Info | Version Index