Search form

Jolebi 22

Giayala but Rubanga Poore bed Gikacil

1Rwot oko waco ne Musa pi 2waco ne Aaron kede awobe mege be, “Wun poore igwokerenu i kom giamia kacil kame jo me Isirael mio buta, tetekeny kur ikelunu lewic i nyinga kacil. Ango en Rwot. 3Ka icuo moro kikom ikwae wu oko noko giamia kacil kame jo me Isirael omio buta, di en epwokere, dano nono likame bobo miero bin tic i alutari na. Manoni tie pi kare lung me anyim. Ango en Rwot.

4“Likame tie akwar Aaron moro kame tie kede tuwo arac me delkom arabo kame tie kede tuwo kame mio kome me cuo cwer, kame bino camo giayala kacil moro tuno di en edoko cil. Ngasaseredoti moro kame bino mulo gimoro kame kom dano oto opwoko, arabo ka en eonyo kwir me icuo, 5arabo ka emulo le moro arabo dano moro kalikame cil, 6ngasaseredoti kame mulo gikame cal kamanono bino dong di epwokere tuno otieno, doko en likame ebino camo giayala kacil nogo kwanyo di etieko bol. 7Kame ceng otieko donyo en ebino doko cil; di do en eko karuno camo giayala kacil, pien gin kibedo cam mege. 8En likame ebino camo ringo me le moro kame oto atoa arabo kame le me obar oneko, pien manono bino mine epwokere. Ango en Rwot.

9“Josaseredoti bino lubo gikame ango awaco ne gin, tetekeny gin kur kibed kede raco moro di kiko to i kabedo kacil pi kelo acae iye. Ango en Rwot, ngat kame lonyo gin.

10“Dano moro apat likame bino camo giayala kacil kame jo omio buta, akadi welo kobino but ngasaseredoti, amoto jotic mege kame en epango apanga. 11Do ka ngasaseredoti oko wilo epasoit, arabo ka oko nywalo epasoit ture, epasoit nono karuno camo giayala kacil kame jo omio. 12Ka nyar ka ngasaseredoti oko nyomere kede dano apat, nyako nono likame bino camo giayala kacil kame jo omio. 13Do ka nyar ka ngasaseredoti oko doko apuserut, arabo ka cware oko riame, doko di en eli kede idwe, di do en eko dok bedo kede papa mere bala bin i kare me aponga mere, en ekaruno camo cam ka papa mere. Likame tie dano moro apat kame bino camo giayala kacil kame jo omio.

14“Ka icuo moro oko camo giayala kacil kame jo omio, di en likame etimo me akaa, en ebino culo wang gikame en ecamo nono di emedo iye acel i kom kany me gi nono, di eko mino but ngasaseredoti. 15Josaseredoti likame bino bedo abongo wor i kom jamini kacil kame jo omio buta; 16kur gin kimi ngatamoro bed kede raco pi camo jamini kacil nogo, di eko poore mino giayala me timo cul. Ango en Rwot ngat kame lonyo gin.”

17Rwot oko waco ne Musa pi 18mino Aaron kede awobe mege karacel kede jo me Isirael dedede iswilia gi: Kame dano moro me Isirael arabo ngakumbor kame bedo kede gin omio giayala, akadi pi cobo kwongere kame oudo en etimo arabo bala giayala me bercuny, 19ango abino game ka ebedo twon, emerekek arabo ekoroi, kame li kede peko moro i kome. 20- Likame ibinunu mino giayala me le moro kame tie kede peko moro i kome, pien likame kobino game. 21Ka ngatamoro oko mino giayala me nywak buta, pi cobo kwongere kame en oudo etimo arabo bala giayala me bercuny, ango abino game ka likame etie kede peko moro i kome. 22Likame ibinunu mino giayala kame cal bala mage but ango Rwot: le kame wange oto, le kame oturo tiene arabo kame aporeso tie i kome, amoto kame tut mol ki kome, arabo kame gwenyu omako, amoto kame tuwo opapaco kome. Likame ibinunu mino moro kikom gin i wi alutari bala giayala awanga. 23Twon arabo oromo moro kame tiene bocoboco twatwal, arabo kame tiene cegocego twatwal wun ikarununu mino gi bala giayala me bercuny; do ka pi cobo kwongere, ango Rwot likame abino game. 24Likame ibinunu yala kede le moro kame kogelemo arabo kame nyige mane oloi amoto owanakin. Likame ibinunu timo gikame cal kamanono i lobo wu.

25Doko likame ibinunu gamo le kame cal kamanono kibut ngakumbor pi mine bala giayala but ango Rubanga wu, pien gin kongongolo kom gi; manono omio gin kitie kede peko i kom gi. Ango likame abino gamo gi.

26-27Ka oko nywalo atin twon arabo atin oromo amoto atin diel, en ebino bedo kede toto mere pi ceng kanyaare, do cako i ceng me kanyauni kokaruno mine bala giayala awanga buta. 28Do likame ibinunu ngolo le moro kede atin mere i ceng acel. 29Ka imiunu giayala me pwoc buta, ibinunu lubo iswilia kame mitere tetekeny ango ako game. 30Ibinunu came i ceng nono; likame ibinunu weko moro buto. Ango en Rwot.

31Pi mano, wun ipoorenu gwoko cik na di ikounu lubo gi. Ango en Rwot. 32Likame ibinunu kelo lewic i nyinga kacil, tetekeny jo me Isirael ngei be ango en ngat kacil. Ango en Rwot ngat kame lonyo wu; 33doko ango en kame bin akwanyo wu ki lobo me Misiri pi doko Rubanga wu. Ango en Rwot.

Baibuli I Leb Kumam

© 2013 Bible Society of Uganda

More Info | Version Index