Search form

Jolebi 27

Iswilia amako Giamia but Rwot

1Rwot oko waco ne Musa be, 2“Wace jo me Isirael be ka dano moro okwongere pi mino dano but Rwot di eko mito mino sente akaka dano nono, kobino timo cul kaman: 3cuo me mwaka ot are tuno i ot kanyape kobino culo sekel ot kany me siliba pirgi, di lubere kede gipim me kabedo kacil; 4mon kobino culo sekel ot adek me siliba pirgi; 5joatino me mwaka kany tuno i ot are, kobino culo sekel ot are me siliba pi awobe, kede sekel tomon me siliba pi anyira; 6idwe me duwe acel tuno i mwaka kany kobino culo sekel kany me siliba pi idwe awobe, kede sekel adek me siliba pi idwe anyira; 7jo me mwaka ot kanyape kede kalamo kobino culo sekel tomon kiwie kany me siliba pi cuo, kede sekel tomon pi mon.

8“Ka dano moro kame oudo okwongere but Rwot can odio omio likame ekaruno culo wel nogi, en ebino tero i nyim ngasaseredoti dano nono kame oudo en ekwongere pi mino, di ngasaseredoti ko bino ngolo ne wel kame tie pipiny di lubere kede gikame en ekaruno culo.

9“Ka kwongere nono oudo kotimo i kom le kame kokaruno mino bala giayala but Rwot, giamia nono kame kotieko mino but Rwot udo tie gikacil. 10Likame kobino sese arabo lunyo wange iepone moroni dedede, akadi kede le kame ber kalamo kame oudo komio. Ka oko lunyo wang le moro kede ace, leini nogo are dedede bino doko me ka Rwot. 11Do ka kwongere nono oudo mako le kame iswil gengo likame kokaruno mino but Rwot bala giayala, kobino tero le nono but ngasaseredoti. 12Ngasaseredoti bino ngolo wel mere di lubere kede bero arabo raco mere, di manono en kame ko bino bedo wel mere. 13Ka komito lake, ngat nono miero cul wel kame ngasaseredoti oudo ongolo, di bobo eko medo iye acel i kom kany me wel nono.

14“Ka ngatamoro omio ode but Rwot, ngasaseredoti bino ngolo wel me ot nono di lubere kede bero mere arabo rarac mere, di manono en kame ko bino bedo wel mere. 15Ka ngat nono komio ode but Rwot mito lake, en miero ecul wel kame kongolo nono di bobo eko medo iye acel i kom kany me wel mere.

16“Ka ngatamoro oko mino but Rwot poto kame en elunyo alunya kibut jonywal mege, kobino ngolo wel mere di lubere kede rom me kodi kame poto nono tero; siliba tomon pi kilo ot are me mawele. 17Ka ngat nono oko mino poto mere but Rwot i mwaka me dwoko jamini, wel mere bino bedo bala kame kotieko ngolo. 18Do ka oko mino poto nono di mwaka me dwoko jamini otieko kato, ngasaseredoti bino maro wel me poto nono di lubere kede wel me mwakini kodong pi tuno i mwaka me dwoko jamini bobo, di en eko bino dwodwoko wel mere. 19Ka ngat komio poto nono but Rwot mito lake, en miero ecul wel mere bala kame ngasaseredoti oudo ongolo di eko medo iye acel i kom kany me wel nono. 20Do ka ngat komio poto nono but Rwot likame oko lake, arabo ka en eko bobo cato poto nono but dano ace, en do ekei twero mere me lako poto nono. 21Do ka mwaka me dwoko jamini oko tuno, poto nono bino doko gikacil kame komio but Rwot; en ebino doko me josaseredoti.

22“Ka ngatamoro oko mino poto mere kame en ewilo awila but Rwot, poto kalikame en elunyo alunya kibut jonywal mege, 23ngasaseredoti bino maro wel mere di lubere kede wel me mwakini kame pwodi odong pi tuno i mwaka me dwoko jamini, di ngat nono ko bino culo sente mere i ceng nono; sente nono obedo gikacil kame komio but Rwot. 24I mwaka me dwoko jamini poto nono kobino dwoke but wone me agege, kame oudo kowile kibute, arabo but ikwae mege.

25“Wel dedede kobino ngolo di lubere kede gipim me kabedo kacil.

26“Akadi kamanono da, atin me agege kame le nywalo tie cuto me ka Rwot, likame ngatamoro karuno mine bute bala giamia me bercuny; akadi roya, atin oromo, arabo atin diel. 27Ka ebedo le kame iswil gengo bedo giayala but Rwot, wone karuno lake di eculo wel me sente kame kotieko ngolo, kede emedo iye acel i kom kany me wel nono. Ka likame oko lake, kobino cate but dano ace i wel kame kotieko ngolo nono.

28- “Do likame tie gikame dano ojalo but Rwot kikom jamini mege, akadi dano, le arabo lobo, kame kokaruno cato arabo lako; gikame kotieko jalo but Rwot obedo mere atwal. 29Likame tie dano moro kame kotieko jalo but Rwot kame kokaruno lako; en miero koneke.

30- “Acel i kom tomon me cam dedede kame kokwanyo ki lobo obedo gikacil, cam anyige arabo anyakini, obedo me ka Rwot. 31Ka dano moro mito lako acel me tomon me cam mere, en miero ecul wel me sente kame kotieko ngolo di eko medo iye acel i kom kany me wel nono. 32Acel i kom tomon me leini dedede, dok, diegi kede romini, obedo me ka Rwot. Kame kitie sirito di omaro wel gi, acel me tomon me leini kame ngolo nyim ngat kame tie maro gi obedo me ka Rwot. 33Won leini likame poore lokoloko gi be tetekeny arecoreco en kame bedi acel me tomon, doko likame ebino seso moro; ka en eko seso le moro, leini nogo are dedede bino doko me ka Rwot, doko likame oko karuno lako gi.”

34Magonogi en cik kame Rwot oudo omio Musa ki wi moru me Sinai pi en mino jo me Isirael.

Baibuli I Leb Kumam

© 2013 Bible Society of Uganda

More Info | Version Index