Search form

Jolebi 3

Giayala me Nywak

1Ka dano tie mino giayala me nywak, miero ebed diang kame li kede peko moro i kome. 2En ebino cibo cinge i wi diang nono di eko ngole i dog ekeko me Eema me ariamakin kede Rwot, di do awobe ka Aaron josaseredoti ko kikiro remo i kom alutari i bad dedede. 3Di do ngat nono ko mino giayala awanga me gigi but Rwot: mo kame umo amontena, 4engalur are kede mo kame umo gi, kede lak emany. 5Di awobe ka Aaron josaseredoti ko wango gi nogi i alutari karacel kede giayala awanga ace, di yiro gi ko duny. Ngwece me giayala awanga nono yomo cuny Rwot.

6Ka dano tie mino oromo amoto diel bala giayala me nywak, ekaruno bedo ekoroi amoto diel adako, do miero ebed abongo peko moro i kome. 7Ka dano tie mino oromo bala giayala mere, miero etere but Rwot 8di eko cibo cinge i wie, di eko ngole i nyim Eema me ariamakin kede Rwot. Di do awobe ka Aaron josaseredoti ko kikiro remo mere i kom alutari i bad dedede. 9Di do ngat nono ko mino giayala awanga me nywak but Rwot; ebino mino gigi: kakamio me giayala nono, yibe lung di kongole iyapi kede egura mere, mo kame umo amontena, 10engalur are kede mo kame umo gi, kede lak emany. 11Di ngasaseredoti atie i wang tic ko wango gi nogi dedede i wi alutari bala giayala awanga but Rwot di yiro gi ko duny.

12Ka dano tie mino diel bala giayala mere, miero etere but Rwot 13di eko cibo cinge i wie, di eko ngole i nyim Eema me ariamakin kede Rwot. Di do awobe ka Aaron josaseredoti ko kikiro remo mere i kom alutari i bad dedede. 14Di do ngat nono ko mino giayala awanga me nywak but Rwot; ebino mino gigi: mo kame umo amontena, 15engalur are kede mo kame umo gi, kede lak emany. 16Di ngasaseredoti ko wango gi nogi i wi alutari bala giayala awanga but Rwot, di ngwece mere ko yomo cuny Rwot. Kakamio dedede bedo me ka Rwot. 17Ebino bedo iswil kame bedo nakanaka i kabedo dedede but ikwae kede ikwae be: likame jo me Isirael poore camo kakamio amoto remo.

Baibuli I Leb Kumam

© 2013 Bible Society of Uganda

More Info | Version Index