Search form

Jolebi 4

Giayala pi Dub kalikame Dano Otimo Akaa

1Di Rwot oko waco ne Musa 2pi ot yamo ne jo me Isirael be, ngat kame turo cik ka Rwot di eko dubo, do di udo likame etimo akaa, en ebino timo gi acel kikom magi:

3Ka Ngatel me Josaseredoti en odubo di eko kelo raco i wi jo, en ebino kwanyo twon kame li kede peko moro i kome, di eko yale but Rwot pi dub mere. 4En ebino tero twon i nyim Rwot, i ekeko me Eema me ariamakin kede Rwot, di en eko cibo cinge i wi twon nono, di eko ngole i nyim Rwot. 5Ngatel me Josaseredoti bino kwanyo remo me twon nono di eko tere i yi Eema me ariamakin kede Rwot. 6En eko bino gwelo remo nono di eko kikiro en tien kanyaare i nyim Rwot, i nyim esuka apoko Kabedo Kacil. 7En eko bino keto remo mogo i iswonge me isondana me alutari me wango odok angwe kur, kame tie kanono i yi Eema me ariamakin kede Rwot. Remo apat mere en ebino onyo piny i dud alutari me wango giayala, kame tie i nget ekeko me Eema me ariamakin kede Rwot. 8En ebino waro kakamio dedede ki kom twon me giayala me kwanyo dub, kede mo dedede kame tie i amontena mere, 9kede engalur are kede mo kame umo gi, kede lak emany, 10di cal acala bala kame kotimo i kom le kame koneko bala giayala me nywak. 11Do en ebino mino kotero lau mere, ringo mere, wie, tiene, amontena mere kede we mere, 12jamini ace dedede me kom twon nono en ebino mino kotero kabedo kalikame opwokere kame tie ooko me kimere, i oduru me buru, di en eko wango gi kunono kede mac kame komoko.

13Ka jo dedede me Isirael en odubo i yore me turo cik ka Rwot abongo ngatamoro niang iye, di kiko bedo tie kede raco, do di oudo likame kitimo akaa; 14cucuto ka dub nono ongere, jo dedede poore kwanyo twon pi bedo giayala me kwanyo dub di kiko tere i nyim Eema me ariamakin kede Rwot. 15Joadongo me ekodet ko cibo cing gi i wi twon nono i nyim Rwot, di oko ngolo twon nono kanono i nyim Rwot. 16Ngatel me Josaseredoti ko tero remo mogo me twon nono i Eema me ariamakin kede Rwot. 17En eko bino gwelo remo nono di eko kikiro en tien kanyaare i nyim Rwot, i nyim esuka apoko Kabedo Kacil. 18En eko bino keto remo mogo i iswonge me isondana me alutari me wango odok angwe kur, kame tie kanono i yi Eema me ariamakin kede Rwot. Remo apat mere en ebino onyo piny i dud alutari me wango giayala, kame tie i nget ekeko me Eema me riamo kede Rwot. 19Di do eko waro kakamio mere dedede di eko wange eduny yiro i wi alutari. 20Ebino timo i kom twon nono gikame cal acala bala kame kotimo i kom twon kobedo giayala me kwanyo dub. Iepone noni, ngasaseredoti mio giayala me kwanyo dub kame jo otimo, di Rubanga ko sasiro gi ki dub gi. 21Di do en eko bino tero twon nono tenge me kimere di eko wange, bala kame ewango kede twon kame en eyalo pi dub mere; manono obedo giayala pi dub me jo.

22Ka ngatel en odubo, i yore me turo cik moro kikom cik ka Rwot di eko bedo kede raco, do di likame etimo manono akaa, 23cucuto ka en eko niang i dub mere nono, en ebino tero giayala me ekoroi ali kede peko moro i kome. 24En ebino cibo cinge i wi ekoroi nono di eko ngole i kakame kongolo iye giayala awanga i nyim Rwot. Manoni obedo giayala me kwanyo dub. 25Ngasaseredoti bino gwelo remo me ekoroi nono di eko kikiro en i iswonge me isondana me alutari, di eko onyo remo ace kodong piny i dud alutari me giayala awanga. 26Di do en eko waro kakamio mere dedede di eko wange eduny yiro i wi alutari, bala kame kowango kede kakamio me giayala me nywak. I yore noni, ngasaseredoti bino mino giayala me kwanyo dub me ngapug nono, di Rubanga ko sasiro en.

27- Ka dano adana moro en odubo, i yore me turo cik moro kikom cik ka Rwot di eko bedo kede raco, do di likame etimo manono akaa, 28cucuto ka en eko niang dub mere nono, en ebino tero giayala me diel adako ali kede peko moro i kome. 29En ebino cibo cinge i wi diel adako nono di eko ngole i kakame kongolo iye giayala awanga. Manoni en giayala me kwanyo dub. 30Ngasaseredoti ko bino gwelo remo me diel nono di eko kikiro en i iswonge me isondana me alutari, di eko onyo remo ace kodong piny i dud alutari. 31Di do en eko waro kakamio mere dedede, bala kame kokwanyo kede kakamio me giayala me nywak, di ngasaseredoti ko wange eduny yiro i wi alutari, di ngwece mere ko yomo cuny Rwot. I yore noni, ngasaseredoti bino mino giayala me kwanyo dub me dano nono, di Rubanga ko sasiro en.

32Ka dano otero oromo pi bedo giayala akwanyo dub, poore ebed oromo adako kame li kede peko moro i kome. 33En eko bino cibo cinge i wie i kakame kongolo iye giayala awanga. 34Ngasaseredoti ko bino gwelo remo me giayala me kwanyo dub nono di eko kikiro en i iswonge me isondana me alutari me wango giayala, di eko onyo remo ace kodong piny i dud alutari. 35Di do en eko waro kakamio mere dedede, bala kame kokwanyo kede kakamio me oromo kobedo giayala me nywak, di ngasaseredoti ko wange eduny yiro i wi alutari, di ngwece mere ko yomo cuny Rwot. Iepone noni, ngasaseredoti bino mino giayala me kwanyo dub me dano nono, di Rubanga ko sasiro en.

Baibuli I Leb Kumam

© 2013 Bible Society of Uganda

More Info | Version Index