Search form

Jolebi 5

Tim atao Mino Giayala Akwanyo Dub

1Tim atao mino giayala akwanyo dub ige:

Ka kolwongo ngatamoro i ekiko pi mino ijura, di do en eko gire dagi tuco gikotimere, bed bala en oudo eneno doko engeo gikame otimere, dano nono poore udo alola.

2Arabo ka dano omulo gimoro me kwer, bala kom le me obar oto, amoto le moro oto me paco, amoto kom gimogo abwote nyidinyidi di kiko to, do di likame oudo emulo akaa, udo dano nono otieko pwokere, doko udo etie kede raco.

3Ka dano omulo gimoro me kom dano, gi me kwer apwoko dano, do di oudo likame emulo akaa, cucuto ka en eko niang iye, udo en etie kede raco.

4Ka dano moro ocore lairo atatai di likame etamo pire, bed bala ilair nono tie pi gikame rac amoto gikame ber, en ebedo tie kede raco cucuto ka en eniang i tim mere nono.

5Ka dano ongeo be etie kede raco moro i kom magonogo, poore etuc dub kame etimo i nyim jo. 6Di do pi kwanyo dub kame en etimo, en eko tero but Rwot diel amoto oromo adako bala giayala me kwanyo dub. Di ngasaseredoti ko mino giayala me kwanyo dub ka dano nono.

7Do ka dano nono ngacan likame etwero kwanyo oromo amoto diel, en ebino tero ne Rwot pi kwanyo dub mere amam are arabo ilukei are. Acel pi bedo giayala me kwanyo dub kede acel pi bedo giayala awanga. 8En ebino tero gi but ngasaseredoti, di ngasaseredoti ko mino winyo acel me agege bala giayala me kwanyo dub. En ebino mojoro ngute di likame eko coto wie. 9Ebino kikiro remo mogo me giayala me kwanyo dub i kom alutari. Do remo apat en ebino biino piny i dud alutari. Manono obedo giayala me kwanyo dub. 10Winyo me are mere en ebino mino bala giayala awanga di elubo iswil bala kame mitere. Iepone noni, ngasaseredoti mio giayala me kwanyo dub kame dano otimo, di Rubanga ko sasiro en.

11Do ka dano ngacan likame esobolo kwanyo amam are amoto ilukei are, en ebino tero kilo acel me alos kame konungo kiber bala giayala mere me kwanyo dub. Likame ebino keto iye mo me olibeti amoto odok angwe kur, pien manono obedo giayala me kwanyo dub. 12En ebino tere but ngasaseredoti, di ngasaseredoti ko juko alos nono i cinge pong, di eko wange i wi alutari di yiro mere ko duny. Dul atitidi nono nyuto be akadi kodong da kotieko yalo but Rwot. Manoni obedo giayala me kwanyo dub. 13Iepone noni, ngasaseredoti bino mino giayala me kwanyo dub kame dano nono otimo, di Rubanga ko sasiro en. Bala kame kotimo kede i giayala me alos, alos ace kodong bedo me ka ngasaseredoti.

Giayala me Timo Cul

14Rwot oko waco ne Musa iswilia gi: 15Ka ngatamoro odubo, i yore me dagi culo but Rwot gikame poore mine, do di likame etimo akaa, dano nono poore tero ne Rwot bala cul, emerekek amoto ekoroi kame li kede peko moro i kome. Rom mere kobino poro kede wel kame kotieko moko. Manoni obedo giayala me timo cul. 16Doko da en eko mino cul kame oudo en ebedo kede ajajalun timo, di doko eko medo i wi cul nono acel i kom kany mere, di eko mino ngasaseredoti. Ngasaseredoti ko bino mino le nono bala giayala me kwanyo raco, pi kwanyo dub kame dano nono otimo, di Rubanga ko sasiro en.

17Ka dano moro odubo i yore me timo gikame cik ka Rubanga likame yei, do di likame etimo akaa, udo etieko timo raco, doko poore eud alola. 18En epoore tero but ngasaseredoti emerekek amoto ekoroi kame li kede peko moro i kome bala giayala me timo cul. Ngasaseredoti ko bino mino giayala pi kwanyo dub kame dano nono otimo do di likame etimo akaa, di Rubanga ko sasiro en. 19Manoni obedo giayala me timo cul pi dub kame en etimo but Rwot.

Baibuli I Leb Kumam

© 2013 Bible Society of Uganda

More Info | Version Index