Search form

Jolebi 6

1- Rwot oko yamo kede Musa di eketo iswilia gi: 2Dano poore mino giayala ka etimo dub but Rwot i yore me dagi dwoko ne dano ngawote alibon kame komie, arabo gikame osingao ne, arabo ka ekwalo gimoro kibute amoto ka esere, 3arabo ka eyamo kop me abe i kom gimoro korwenyo di en eko udo, di elairo ilair me abe i kom dub acal kamagonogi kame en etimo. 4-5Ka dano odubo i yore nogi, di en eko ngeno dub mere, poore ecul gikame oudo en eudo i yore arac nono, arabo gikame en elairo ilair me abe i kome nono; miero en ecul gi nono di doko eko medo acel i kom kany me gi nono i wi cul nono. Epoore mino cul nono but won gi nono. 6Ingei cul, di do en eko tero but ngasaseredoti oromo arabo ekoroi kame li kede peko moro i kome pi bedo giayala me cul. 7Ngasaseredoti ko bino mino giayala me kwanyo dub kame dano nono otimo, di Rubanga ko sasiro en.

Giayala kame Kowango Dedede

8Rwot oko yamo kede Musa di ecike 9pi mino Aaron kede awobe mege iswilia amako giayala awanga kaman: Giayala awanga poore buto i wi alutari iwor kiakia, di mac tie liel abongo to. 10Di do ngasaseredoti ko ngapo epale acek aliamaliam me yie kede ekanso aliamaliam di eko jobo buru me giayala kowang i wi alutari nono, di eko kete piny i nget alutari. 11Di do en eko loko igoen ace di eko tero buru nono kakalikame opwokere tenge me kimere. 12Mac me alutari poore dong di liel nakanaka. Odiko acelacel ngasaseredoti medo isikin i mac nono, di eko napo kiber i wi mac nono giayala kame kotie wango, di eko wango kakamio me giayala me nywak. 13Kopoore mino mac bed liel nakanaka i alutari abongo to.

Giayala me Alos

14Magi en iswilia amako giayala me alos: Awobe ka Aaron ngasaseredoti bino mino alos but Rwot i nyim alutari. 15Ngasaseredoti bino juko pong cinge alos kame konungo kiber nono kede mo, karacel kede odok angwe kur dedede atie iye, di en eko wange i wi alutari. Dul atitidi nono nyuto be akadi kodong da kotieko yalo but Rwot. Ngwece me giayala awanga nono yomo cuny Rwot. 16-17Di do josaseredoti ko tero alos kodong me acama gi. Gin kibino timo mugati kede alos nono abongo arup iye, di kiko came i kabedo kacil, en diakal me Eema me ariamakin kede Rwot. En ebedo gikacil twatwal, erom aroma kede giayala me kwanyo dub kede giayala me timo cul. 18I kare dedede me anyim cuo kobedo ikwae ka Aaron bino camo cam noni, bala iner gi me kare dedede me giayala me cam awanga but Rwot. Ngatamoro kame bino mulo giayala me cam awanga nono bino udo peko, piento en ecil.

19Rwot oko yamo kede Musa di eko mine iswilia 20amako wiro dano me ekeko ka Aaron pi doko ngasaseredoti kaman: i ceng me wire doko ngasaseredoti, en ebino mino giayala me kilo acel me alos but Rwot (kame rom aroma kede giayala me alos kame koyalo ceng dedede), ebino yalo dul mere odiko di bobo eko yalo dul mere otieno. 21En ebino nyonge kede mo di eko tede kede itatany di eko ngingido en, di do eko wange pi yalo kede Rwot; ngwece mere yomo cunye. 22I kare dedede me anyim buli akwar Aaron kame kowiro pi doko ngasaseredoti poore mino giayala noni. Giayala noni kopoore wango dedede pi yalo kede Rwot. 23Giayala me alos kame ngasaseredoti mio kopoore wango dedede, likame kopoore poko kiye moro me acama.

Giayala me Kwanyo Dub

24Rwot oko ciko Musa 25pi mino Aaron kede awobe mege iswilia amako giayala me kwanyo dub kaman: Le kobedo giayala me kwanyo dub kobino ngolo i nyim Rwot kakame kongolo iye giayala awanga. En ebedo giayala kacil twatwal. 26Ngasaseredoti komio giayala nono bino came i kabedo kacil, en diakal me Eema me ariamakin kede Rwot. 27Ngatamoro arabo gimoro kame bino mulo giayala me cam nono kame komio but Rwot bino udo peko, piento en ecil; doko da ka remo mere okire i kom egoe amoto i kom gimoro, kopoore ot lwoke i kabedo kacil. 28Agulu kame kotedo kede ringo nono kopoore neko, do ka kotede kede sepula, kopoore kikiso sepula nono di oko lwoke kiber kede pii. 29Cuo ace kobedo anywali me ude me josaseredoti da bino camo ringo nono; en ebedo gikacil twatwal. 30Do ka kotero remo me le nono i yi Eema me ariamakin kede Rwot pi timo pwola me kwanyo dub, likame kopoore camo ringo mere; kobino wange awanga kede mac.

Baibuli I Leb Kumam

© 2013 Bible Society of Uganda

More Info | Version Index