Search form

Jolebi 9

Aaron Omio Giayala

1I ceng me kanyauni, Musa oko lwongo Aaron kede awobe mege kede joadongo me Isirael. 2En eko waco ne Aaron be, “Kwany twon etobait kede emerekek kame li kede peko moro i kom gi; twon etobait bino bedo giayala me kwanyo dub, do emerekek bino bedo giayala awanga. 3Di iko waco ne jo me Isirael pi kwanyo ekoroi pi bedo giayala me kwanyo dub, kede roya me mwaka acel kede atin romo me mwaka acel kame li kede peko moro i kom gi pi bedo giayala awanga. 4Kikwany da twon kede emerekek pi bedo giayala me nywak. Gin kipoore yalo gi karacel kede giayala me alos kame konyongo kede mo, pien Rwot bino neeno but gi i ceng me tin.”

5Gin kiko tero gi dedede kame Musa ociko negi i nyim Eema me ariamakin kede Rwot, di jo dedede oko cokere i nyim Rwot pi wore. 6Musa oko waco be, “Manoni en gikame Rwot ociko be itimunu, tetekeny rieny me deyo ka Rwot ko bino nyutere ne wu.” 7- Di eko waco ne Aaron be, “Nyiki i alutari di iko mino giayala ni me kwanyo dub kede giayala ni awanga pi kwanyo dub ni kede me jo; yal giayala kame jo okwanyo di iko kwanyo dub gi, bala kame Rwot ociko.”

8Aaron oko noko alutari di eko ngolo twon etobait kobedo giayala meren me kwanyo dub. 9Awobe ka Aaron oko mine remo, di en eko gwelo remo nono kede lwete di eko kikiro en i iswonge me alutari, di eko onyo remo apat piny i dud alutari. 10Do kakamio, engalur, kede lak emany me giayala me kwanyo dub en eko wango gi i wi alutari, bala kame Rwot oudo owaco ne Musa. 11Do ringo kodong kede lau en eko ot wango gi tenge me kimere.

12Di do eko ngolo giayala awanga. Awobe ka Aaron oko tero ne remo di en eko kikiro remo nono i kom alutari i bad dedede. 13Di do gin kiko mine wie kede adulion apat di en eko wango gi i wi alutari. 14Eko da lwoko amontena mege kede tiene di eko dokakino gi i kom giayala awanga ace i wi alutari.

15Ingei manono, en eko mino giayala kame jo omio. En ekwanyo diel koudo obedo giayala me jo me kwanyo dub, eko ngole di eko yale iepone kame en emio kede giayala mere me kwanyo dub. 16Doko da eko mino giayala awanga di elubo kite kame iswil mito be time kede. 17Eko bobo da mino giayala me alos, di eko juko alos pong cinge di eko wange i wi alutari, manoni oudo tie medo i wi maca kame kowango ceng dedede odiko.

18- En eko ngolo twon kede emerekek bala giayala me nywak ka jo. Awobe ka Aaron oko mine remo di en eko kikiro en i kom alutari i bad dedede. 19En eko kwanyo kakamio me twon kede me oromo, yibe ibatalal, mo me amontena, kede engalur kede mo kame umo gi, kede lak emany, 20di eko ber keto gi i kom kapumito di eko tero gi i wi alutari. En eko wango kakamio i wi alutari, 21do kapumito kede amuro me bad tetu cam en eko kiarao gi i nyim Rwot bala kame Musa oudo ociko.

22- Kakame en etieko mino kede giayala nogi dedede, Aaron oko tingo cinge malo tetu kakame jo tie iye di eko mino gi winyo, di do eko wok piny. 23Musa kede Aaron oko donyo i Eema me ariamakin kede Rwot di kiko wok, di kiko mino jo winyo, di do rieny me deyo ka Rwot oko neeno ne jo dedede. 24Mac oko wok kibut Rwot di eko wango giayala awanga dedede karacel kede kakamio kame oudo tie i wi alutari. Kakame jo oneno kede manono, gin kiko icelakin di kiko riebere piny.

Baibuli I Leb Kumam

© 2013 Bible Society of Uganda

More Info | Version Index