Search form

Wel 10

Agwarai kame Kotimo kede Nyonyo Siliba

1Rwot oko waco ne Musa be, 2“Tim agwarai are me nyonyo siliba; ibino teto gi ateta kede enyondo. Tic gi bino bedo me lwongo jo i cokere kede me mino jo tako kimere di kiko cako ot. 3Kame kokuto agwarai are nogo dedede, jo dedede bino cokere buti i ekeko me Eema me ariamakin keda. 4Do ka kokuto acel kenekene, jotel me jo me ikekon apapat me ateker me Isirael bino cokere i nyimi. 5Kame kokuto agwara acel kenekene kede dwan me yi, jo me kimere me bad tetu kide bino yai cako ot; 6kame oko kuto agwara tien me are kede dwan me yi, jo me kimere me bad tetu piny bino yai cako ot. 7Do ka jo poore cokere, kobino kuto agwara, do likame kede dwan me yi. 8Awobe ka Aaron kobedo josaseredoti en kame bino kuto agwarai; cik me kuto agwarai bino bedo cik kame mako kiton ikwae wu me kare dedede.

9“Ka itienu ot yi i lobo wu kede jokwor adio wu, ibinunu kuto agwarai kede dwan me yi di ango Rwot Rubanga wu ako bino yutuno wu, di ako lako wu kibut jokwor wu. 10Doko da i ceng kame itienu kede kilel, i ceng kame komoko me kwero ibagai wu i agege me por duwe, ibinunu kuto agwarai i wi giayala awanga kede i wi giayala me nywak, manono bino mina ayutuno wu, ango en Rwot Rubanga wu.”

Jo me Isirael Oyai ki Sinai

11I ceng me ot are me duwe me are me mwaka me are, edou oko yai ki wi Eema ka Rwot. 12Di jo me Isirael oko cako ot lubo edou di kikokobo akokob yai ki wi tim me Sinai, di edou oko ot cungo i wi tim me Paran.

13Manoni en oudo tien me agege me Musa mino jo cik ka Rwot di kiko yai. 14Jo dedede koudo tie i imendera me jo me ekeko ka Yuda en oko cako yai, ikodeta kede ikodeta di kilubere aluba. Nakason wot ka Aminadab en koudo telo gi. 15Netanel wot ka Suar en oko telo ekodet me jo me ekeko ka Isakar, 16kede Eliab wot ka Kelon en oko telo ekodet me jo me ekeko ka Sebulun.

17Di oko tako Eema ka Rwot piny di jo me ekeko ka Gereson kede jo me ot ka Merari oko yene di kiko cako ot.

18Alubo mere, jo dedede koudo tie i imendera me jo me ekeko ka Ruben en oko yai, ikodeta kede ikodeta di kilubere aluba. Elisur wot ka Sedeur en koudo telo gi. 19Selumiel wot ka Surisadai en oko telo ekodet me jo me ekeko ka Simeon, 20kede Eliasap wot ka Dewel en oko telo ekodet me jo me ekeko ka Gad.

21Di Jolebi me ot ka Kokat kame oudo tic gi yeno jamini me woro Rwot oko gida yai. Bin oko gero Eema ka Rwot i kabedo me kimere anyen di pwodi likame gin kituno kunono. 22Alubo mere, jo dedede koudo tie i imendera me jo me ekeko ka Epuraimu en oko yai, ikodeta kede ikodeta di kilubere aluba. Elisama wot ka Amikud en koudo telo gi. 23Gamaliel wot ka Pedasur en oko telo ekodet me jo me ekeko ka Manase, 24kede Abidan wot ka Egidioni en oko telo ekodet me jo me ekeko ka Benjamin.

25Alubo mere, jo dedede koudo tie i imendera me jo me ekeko ka Dan en oko lubo kicen, ikodeta kede ikodeta di kilubere aluba. Gin oudo kigwoko jo ki asura kame twero wok kicen ngei gi. Akieser wot ka Amisadai en koudo telo gi. 26Pagiel wot ka Akeran en oko telo ekodet me jo me ot ka Aser, 27kede Akira wot ka Enan en oko telo ekodet me jo me ekeko ka Naputali. 28Manoni en epone kame bin jo me Isirael osirito kede, ikodeta kede ikodeta, i kare kame kiyai kede.

29Musa owaco ne Kobab dano me Midian, en papa me dako mere be, “Wan otie yai ot i kabedo kame Rwot oudo owaco be, ‘Abino mine butu.’ Upere kede wa, wan likame obino teri kirac; pien Rwot ocikere timo gikaber ne jo me Isirael.”

30Do Kobab oko dwoko ne Musa be, “Ango likame abino upere kede wu, do ango abino dok i lobo na amaka but joe na.”

31Musa doko oko waco ne be, “Kur iwek wa, pien in ingeo kakame wan opoore gero iye kimere i wi tim, manono mio ibino bedo bala ngat kame nyuto ne wa yongayo. 32Doko medo i wi manono da, ka in iupere kede wa, gi dedede aber kame Rwot bino timo ne wa wada obino timo nin.”

Jo Oyai Ot

33Aso, jo me Isirael oko yai ki moru ka Rwot. Gin kiko ot sapali me ceng adek, di Jolebi kame oudo yeo Sanduku me Isikan ka Rwot en oudo telo negi yongayo, pi mono kakame kipoore wei iye.34Kame gin oudo kitie kobo, edou ka Rwot oudo bedo i wi gi i esawa me iceng.

35- Tek kame oudo kocako yeno Sanduku me Isikan pi kobo, Musa oudo waco be, “Rwot, yai iko bwono jokwor ni di iko mino gi kiringi kisasarun.” 36Doko da kame jo oudo otuno kakame kipoore gero iye kimere pi wei, en oudo ewaco be, “Rwot, dwog but jo tutumian kede tutumian me Isirael.”

Baibuli I Leb Kumam

© 2013 Bible Society of Uganda

More Info | Version Index