Search form

Wel 13

Kocwao Ibegai Kanan

(Iswilia 1.19-33)

1Rwot oko waco ne Musa be, 2“Cwai cuo mogo ot begao lobo me Kanan, en lobo kame ango abino mino jo me Isirael; kwany ngatel acel ki buli jo me ekeko acelacel me ateker me Isirael di iko cwano gi.” 3Aso Musa oko cwano jotel me jo me Isirael nogo yai ki wi tim me Paran di lubere kede kite kame Rwot ocike kede. 4-15Nying jo nogo gin ige:

Samua wot ka Sakur me ekeko ka Ruben,

Sapat wot ka Kori me ekeko ka Simeon,

Kaleb wot ka Jepune me ekeko ka Yuda,

Igal wot ka Yosepu me ekeko ka Isakar,

Kosea wot ka Nun me ekeko ka Epuraimu,

Palati wot ka Rapu me ekeko ka Benjamin,

Gadiel wot ka Sodi me ekeko ka Sebulun,

Gadi wot ka Susi me ekeko ka Manase,

Amiel wot ka Gemali me ekeko ka Dan,

Setur wot ka Emikairi me ekeko ka Aser,

Nakabi wot ka Boposi me ekeko ka Naputali,

Geuel wot ka Maki me ekeko ka Gad.

16Magonogi en nying jo kame Musa oko cwano ot begao lobo me Kanan. Musa oko loko nying Kosea wot ka Nun odoko Yosua.

17Kakame Musa ocwao gi kede ot begao lobo me Kanan, en ewaco negi be, “Otunu paka tuno Negeb, di ikounu kato paka i piny kobedo imukuran. 18Ngingicunu epone kame piny nono cal kede, rom me jo kame bedo kunono, kede teko gi. 19Ngingicunu da ka lobo gi nono ber amoto erac, kede ka bomban kame gin kibedo iye kocelo kede apamai atek amoto li, 20kede da ka lobo gi nono mio amoto li, kede kame yen tie iye amoto li. Bedunu kede nwangcuny di ikounu kelo anyakini mogo ki kunono.” Manono oudo obedo kare me olok cako cek. 21Aso, gin kiko ot di kiko begao lobo nono cako ki wi tim me Sin tuno Rekob, i nget Lebo Kamat. 22Gin kong kioto paka Negeb, di kiko tuno Keburon, kakame Akiman, Sesai, kede Talamai oudo bedo iye, gin ikwae me jo kame kolwongo be Anakim. (Keburon bin kogero mwakini kanyaare cen di pwodi likame kogero Soan i Misiri.) 23Di kiko tuno i aditot me Esikol, di kiko tongo ki kanono ajange me olok kame anyakini onur iye, di kiko kode i yat kame jo are oudo diedielo. Kiko tero da anyakini mogo me pomagurunet kede me epigi. 24Bin oko donyo lwongo kabedo nono be aditot me Esikolb pi abunge me olok kame jo me Isirael otongo ki kanono.

Kop kame Ibegai Odwoko

25Ingei ceng ot ongwon, ibegai oko dwogo ki ngingico lobo me Kanan. 26Gin kioto but Musa kede Aaron kede but jo dedede me Isirael i Kades i wi tim me Paran. Gin kikelo negi kop amako lobo nono kede da kiko nyuto negi anyakini mogo me kunono. 27Gin kiko waco ne Musa be, “Wan ooto i lobo kame in icwao wa iye; en ebedo lobo amio adikinicel, anyakini mogo kame okelo kiye ige. 28Do jo kame bedo i lobo nono tek adikinicel, doko da bomban gi lac twatwal di kocelo gi kede apamai atek. Do arac do kalamo, oneno ikwae me jo abocoboco kame kolwongo be Anakim da kunono. 29Medo i wi manono jo Amalek bedo Negeb; jo Kiti, jo Yebu, kede jo Amor bedo i piny kobedo imukuran; kede jo Kanan da bedo i dog nam me Mediterania kede i dog ecilet me Yorodan.”

30Kaleb oko mino jo kame oudo tie kede ingungur but Musa oling, di eko waco negi be, “Wan ootunu osurunu lobo nono di okounu donyo bedo iye, wan otwerunu mano lobo nono.” 31Di do cuo kame bin oupere kede oko waco be, “Wan likame otwerunu ot yi kede joka, gin kitek kibwono wa.” 32Aso, gin kiko donyo sarakino kope me abe amakere kede lobo nono di kiwaco be, “Lobo kame wan ooto ngingico bala ibegai nono likame ceko cam atwero pito jo mege, doko da jo kame wan oneno kunono bocoboco twatwal. 33- Wan oneno jo abocoboco kunono, gin ikwae me jo Anak. Wan do oko bedo titino kibut gi ineno bala otwongo, manono en epone kame gin oudo kineno wan kede.”

Baibuli I Leb Kumam

© 2013 Bible Society of Uganda

More Info | Version Index