Search form

Wel 14

Jo Ongunguro

1Jo dedede oko kok kitek iwor kiakia. 2Jo dedede me Isirael oudo tie kede ingungur but Musa kede Aaron; jo owaco negi be, “Oudo koto eber ka oudo wan oto Misiri arabo i wi tim kan! 3Pinyo komio Rwot tie tero wan i lobo no? Kobino neko wan i yi di oko bino mamako mon wa kede idwe wa. Mam oudo koto eber ka odokunu Misiri?” 4Aso, gin kiko donyo yamo ken gi ken gi be, “Oyerunu ngatel wa di wan okounu dok Misiri.”

5Di Musa kede Aaron oko riebere piny i nyim ekodet me jo me Isirael. 6Di Yosua wot ka Nun kede Kaleb wot ka Jepune, koudo obedo jo are kikom jo kame oudo ooto begao lobo nono oko nyinyilo igoen gi pi cwercuny, 7di kiko waco ne ekodet dedede me jo me Isirael be, “Lobo kame wan oudo ooto begao obedo lobo aber adikinicel. 8Ka Rwot cunye yom i kom wa, en ebino tero wa di eko mino wa lobo amio nono. 9- Kenekene kur ijemunu ne Rwot, doko da kur ilworunu jo me lobo nono, pien kibut wa gin kitie bala pii apia. Rwot tie keda wan, doko en etieko bwono rubangan kame gwoko gin; kur ilworunu gi.” 10Jo oudo tie do mito didipo Musa kede Aaron kede kide paka neko gi, do deyo ka Rwot oko neeno ne jo dedede me Isirael i Eema ka Rwot. 11Rwot oko waco ne Musa be, “Jogi bino meede bedo kede acae i koma tuno awene? Doko da kibino meede dagi bedo kede gen buta tuno awene, bed bala ango atieko timo gianena atot i diere gi? 12Ango abino cwano negi aumpuli di ako wearo gi, di ango ako bino mini idoko papa me ateker alac di tek kalamo gin.”

13- Do Musa oko waco ne Rwot be, “In en ikelo jogi yai ki Misiri kede twer nin. Kame jo me Misiri owinyo gikame in itimo ne jo ni, 14gin kibino waco ne jo kame bedo i lobo noni kop nono. Jo me lobo noni otieko winyo be in Rwot itie i diere wan, doko da be wan otieko neni wang i wang. Gin kitieko winyo kite kame in ibedo telo kede jo ni kede epir me edou iceng, kede epir me mac iwor. 15Do ka nan in ineko jo ni wange acel, atekerin apat koudo owinyo kop i komi bino waco be, 16‘Rwot oneko jo mege i wi tim pien oudo likame etwero tero gi tuno i lobo kame oudo ecikere pi mino gi.’ 17Aso, Rwot nan ango akwai i nyut ne wa teko ni di iko timo ne wa gikame oudo icikere iye di iwaco be, 18- ‘Ango Rwot likame asunyo doko ger, ango apong kede amara kalikame lokere; ango asasiro dub me jo kede gikareco gi, do likame aweko mino alola but idwe kede ikwae me lwak me agege tuno but ikwae kobedo lwak me adek kede me ongwon pi dub ka jonywal gi.’ 19Rwot, nataman ango akwai isasiro dub ka jogi di lubere kede dwong me amara ni kalikame lokere, bala kite kame oudo ibedo sasiro gi kede cako gin yai ki Misiri.”

20Di Rwot oko waco be, “Ango abino sasiro gi bala kame in ikwao, 21- do akwongere kitek be, 22likame tie ngatamoro kikom jogi kame bino donyo i lobo nono. Jo nogi oneno deyo nango kede gianena kame ango atimo i Misiri kede i wi tim, do gin kibedo tama tien kede tien di kiko dagi lubo kop na. 23Gin likame kibino donyo i lobo kame ango bin acikere pi mino joakwari gi. Likame tie ngatamoro kikom jo kame obedo kede acae buta kame bino neno lobo nono. 24- Do pi kite kame ngatic na Kaleb tie kede cuny apat, doko da ebedo lubo kop na kede cunye dedede, ango abino tere tuno i lobo kame bin en eoto begao nono, di ikwae mege ko bino donyo bedo iye edoko mergi. 25Aso, nan pi kite kame jo Amalek kede jo Kanan bedo kede i aditoto me Kanan, diki lokerenu idokunu i wi tim di ilubunu yongayo aoto i Nam Akwar.”

Rwot Omio jo Alola pi Ingungur gi

26Rwot oko waco ne Musa kede Aaron be, 27“Jo areco gi bino meede bedo kede ingungur buta tuno awene? Winyo ingungur gi i koma do otieko roma! 28Wace gi be, ‘Ango akwongere kitek be abino timo ne wu gikame awinyo di iwacunu: 29- liele wu bino more i wi tim noni. Pi kite kame ingungurunu kede i koma, likame tie ngatamoro kikomu me mwakini ot are ot malo 30kame bino donyo i lobo kame ango oudo akwongere pi mino wu bedo iye, kwanyo kenekene Kaleb wot ka Jepune kede Yosua wot ka Nun. 31Do idwe wu, kame wun oudo iwacunu be kobino mamako, abino mino gi kidonyo i lobo kame wun itiekunu dagi nono. 32Do wun liele wu bino more i wi tim kane. 33- Idwe wu bino neno can wire kwat i wi tim kan pi mwakini ot ongwon pi dub wun, tuno di dano me ajikini kikomu otieko to. 34Ibinunu neno can pi dub wu pi mwakini ot ongwon, mwaka acel pi buli ceng acel kikom ceng ot ongwon kame wun itiekunu mamano kede lobo noni di ibegaunu en, di do ikounu bino ngeno be ateteni ango likame cunya yom. 35Ango Rwot atieko waco; ateteni abino timo manoni ne ekodet me jo areco kocokere i koma noni. Wun dedede ibinunu to i wi tim kanoni.’ ”

36-37Rwot oko mino aumpuli opeto cuo kame Musa oudo ocwao ot begao lobo me Kanan, di bin gin kiko dwoko kop me abe di kiko mino jo ocako bedo kede ingungur bute. 38Do Yosua wot ka Nun kede Kaleb wot ka Jepune kenekene en oko dong kuo kikom cuo koudo ooto begao lobo me Kanan.

Tien me Agege me Tamo Suro Kanan

(Iswilia 1.41-46)

39Kakame Musa oko waco ne kede jo kope kame Rwot oudo owaco, jo oko bedo kede iturur atek. 40Oru mere odiko sek, gin kiko yai di do kiko cako yai ot i wi imukuran me Kanan, di kiwaco be, “Wan ige; wan obino ot paka kakame Rwot oudo omio wa cikere pire; wan ongeo be odubo.”

41Do Musa oko waco negi be, “Pinyo komio itienu meede bedo kede abwone but Rwot. Iik wu nono likame bino cobere. 42Kur iotunu malo kuno, pien Rwot likame tie kede wu, jokwor wu bino bwono wu. 43Pien jo Amalek kede jo Kanan bino yi kede wu di kiko bwono wu; likame Rwot bino bedo tie kede wu, pien wun itiekunu dagi winyo kop mere.”

44Do gin kiko kanyo kop kioto i piny me imukuran, bed bala Sanduku me Isikan kede Musa da oudo odong kakame kimere oudo tie iye. 45Di do jo Amalek kede jo Kanan kame bedo i piny me imukuran nono oko wok piny di kiko yi kede jo me Isirael paka bwono gi, di do kiko donyo wapo gi paka tuno Koroma.

Baibuli I Leb Kumam

© 2013 Bible Society of Uganda

More Info | Version Index