Search form

Wel 15

Iswilia Amako Giayala

1Rwot oko waco ne Musa pi 2mino jo me Isirael iswilia me aluba amakere kede giayala ka gin kituno i lobo kame en oudo ebino mino gi di kiko donyo bedo iye. En ewaco be, 3“Ibinunu donyo mina giayala me twonin, imerekekin, romini kede diegi bala giayala awanga, arabo bala giayala me cobo isikan, arabo bala giayala me bercuny, arabo bala giayala me ceng adongo me edini; ngwece me giayala awanga nogi bino yomo cunya.

4-5“Ngat kame bino mina giayala nogi bino mina gin karacel kede giayala me alos; buli giayala awanga acelacel me atin oromo kobino yalo karacel kede kilo acel me alos kame konungo di konyonge kede mo me olibeti lita acel, karacel kede lita acel me bwini.

6-7“Kame kotie mina giayala me emerekek, kobino yale karacel kede kilo are me alos kame konungo di konyonge kede mo me olibeti lita acel kede dul. Kobino da onyo i wi alutari lita acel kede dul me bwini bala giayala amata. Ngwece me giayala awanga noni bino yomo cunya.

8“Kame koyalo twon buta bala giayala awanga, arabo bala giayala me cobo isikan, arabo bala giayala me nywak, 9kobino yale karacel kede giayala me alos kame konungo me kilo adek di konyonge kede lita are me mo me olibeti. 10Kobino da onyo i wi alutari lita are me bwini bala giayala amata. Ngwece me giayala awanga noni bino yomo cunya.

11“Manoni en gikame kobino yalo karacel kede buli twon, amoto emerekek, amoto atin oromo, amoto diel kobedo giayala buta. 12Kame wel me leini kame kotie yalo tot, gi nogi da bino medere di lubere iepone acel nono. 13Anywali dedede me Isirael poore timo gi nogi i yore noni kame kitie mino giayala awanga; ngwece me giayala awanga nono ko bino yomo cunya. 14Ngakumbor moro kame tie bedo i diere wu me atwal, di cunye oko mito mino giayala awanga, eda ebino timo bala kame wun itimunu kede, di ngwece me giayala awanga nono ko bino yomo cunya. 15-16- Iswilia nogi bino mako wu pi kare lung me anyim, wun karacel kede jokumbor kame bedo i diere wu; pien wun kede gin iromunu aroma i wanga.”

17Rwot bobo oko waco ne Musa pi 18mino jo me Isirael iswilia me aluba ka gin kituno i lobo kame en oudo ebino mino gi di kiko donyo bedo iye. En ewaco be, 19“Kame itienu camo cam moro kowok ki lobo kame ango atie mino wu, ibinunu poko moro imiunu buta. 20Kame itienu tedo mugati kede alos acako cek i poti, mugati me agege ibinunu mino buta bala kame imiunu kede alos buta i diakal me canyo. 21Lwak wu me kare dedede bino mina giamia me mugati kame icakunu tedo noni.”

22-23Rwot oko doko waco ne Musa gikame jo poore pi timo kame kituro iswilia kame en emio nogo, do di likame kituro me akaa. En ewaco be, 24“Ka ekodet lung oturo iswil do di likame kitimo me akaa, jo dedede karacel bino mino giayala me etobait pi bedo giayala awanga; giayala nono ngwece mere bino yomo cunya. Kibino yale karacel kede giayala me alos kede giayala amata, di lubere kede iswil kame ango atieko moko, karacel kede ekoroi acel pi bedo giayala me kwanyo dub. 25Ngasaseredoti bino timo pwola me lonyo jo dedede me Isirael di ango ako bino sasiro gi. Pi kite kame gin likame kitimo kede gikarac nono akaa, doko kiko kelo na giayala gi, giayala gi awanga kede giayala gi me kwanyo dub pi gikarac kame gin kitimo, 26ango abino sasiro jo dedede me Isirael, ribo kiton jokumbor kame bedo i diere gi; pien gikarac nono mako jo dedede.

27- “Ka dano moro acel otimo dub do di likame akaa, en ebino kwanyo diel adako me mwaka acel bala giayala me kwanyo dub. 28Di ngasaseredoti ko bino timo pwola me lonyere i nyim Rwot pi ngat kotimo dub nono di ango ako bino sasiro en. 29Iswil acel nono mako jo dedede kotimo dub, do di likame kitimo me akaa, bed bala kibedo jo me Isirael amoto jokumbor abedo i diere me jo me Isirael.

30“Do ka dano moro otimo dub me akaa, bed bala en ebedo dano me Isirael amoto ngakumbor, udo en ecao Rwot, kobino kwanye tenge atwal atwala ki diere me jo, 31pien udo en etieko dagi winyo kop ka Rwot di eko gire turo cik mere akaa. Akodi dano nono kobino kwanye tenge atwal atwala ki diere me jo di raco mere ko dong i wie.”

Ngat kame Turo Iswil me Ceng Sabato

32I kare kame jo me Isirael oudo tie kede i wi tim, bin gin kiko udo icuo moro di mwodo yen ceng Sabato. 33Jo koude di oudo etie mwodo yen oko tere but Musa kede Aaron kede i nyim ekodet lung. 34Gin ber kiko donyo dare pien oudo likame kingeo gikame kopoore timo ne. 35Do Rwot oko waco ne Musa be, “Kopoore neko icuo no; jo dedede poore ot didipo en kede kide paka to tenge me kimere.” 36Jo dedede oko tere tenge me kimere di kiko didipo en kede kide tuno to, bala kame Rwot oudo ociko ne Musa.

Iswilia amako Eula me Lak Igoen

37Rwot oko waco ne Musa 38- pi waco ne jo me Isirael be, “Kuunu eula i lak igoen wu di ikounu keto ausi ebululu ebululu i kom eula acelacel. Cik noni mako wu kiton ikwae wu me waru. 39Eula nogi bino bedo gikame poo wi wu i kom cik nango di ikounu lubo gi, di ikounu bino weko lubo mit areco atie i cunyu. 40Pi manono, wun ibinunu yutuno cik nango dedede di ikounu lubo gi, di ikounu bino bedo jo na atwal atwala. 41Ango en Rwot Rubanga wu ngat kokwanyo wu ki lobo me Misiri pi bedo Rubanga wu. Ango en Rwot Rubanga wu.”

Baibuli I Leb Kumam

© 2013 Bible Society of Uganda

More Info | Version Index