Search form

Wel 17

Ebela ka Aaron

1Rwot oko waco ne Musa be, 2“Wace jo me Isirael kimii ibelai tomon kiwie are, ebela acel kibut ngatel me ekeko acelacel. Wandiko nying ngatel acelacel i kom ebela mere, 3di iko wandiko nying Aaron i kom ebela kame cungo pi ekeko ka Lebi. Ngatel me ekeko acelacel bino bedo kede ebela acel. 4Ter ibelai nogo i Eema na di iko keto gi i nyim Sanduku me Isikan, kakame ango ariamo kede wu iye. 5Di do ebela me ngat kame ango abino yero pi bedo ngasaseredoti na ko bino libo. Iepone noni ango abino jiko ingungur kame jo me Isirael tie kede i komi nakanaka.”

6Aso, Musa oko yamo kede jo me Isirael, di ngat acelacel kikom jotel gi oko mine ebela; ebela acel pi ekeko acel, gin dedede ibelai tomon kiwie are. Oko keto ebela ka Aaron da karacel kede mergi. 7Di Musa oko keto ibelai nogo dedede i Eema i nyim Sanduku me Isikan ka Rwot.

8- Oru mere, kakame Musa ooto kede i Eema, eko udo ebela ka Aaron, kame oudo cungo pi ekeko ka Lebi, olibo. Etimo ature di eko nyak eko cek. 9Musa oko kwanyo ibelai nogo dedede di eko nyuto ne jo me Isirael dedede. Gin kiko ngino gi, di dano acelacel oko kwanyo ebela mere.

10Di Rwot oko waco ne Musa be, “Dwok ebela ka Aaron i nyim Sanduku me Isikan. En miero gwoke bala gi me ikwenyar but jo me Isirael kame jojemo be, kibino to kwanyo di gin kijiko ingungur i koma.” 11Musa oko timo bala kame oudo Rwot ociko ne.

12Jo me Isirael oko waco ne Musa be, “Wan do otieko to girwa; wan dedede otiek! 13Ka ngatamoroni kame noko nget Eema miero toi, dwong mere be wan dedede ocal bala jo otieko do to!”

Baibuli I Leb Kumam

© 2013 Bible Society of Uganda

More Info | Version Index