Search form

Wel 20

Gikame bin Otimere Kades

(Yai 17.1-7)

1I duwe me agege jo me Isirael lung bin oko tuno i wi tim me Sin di kiko gero kimere gi Kades. Miriamu bin oko to di oko yike kunono.

2Pii oko bedo li i kakame bin gin kigero iye kimere gi nono; aso, jo dedede bin oko cokere karacel ne Musa kede Aaron. 3Di kiko lok kede Musa di kiwaco ne be, “Oudo koto ebedo ber ka wan oudo oko to i nyim Eema ka Rwot karacel kede jo me Isirael icegun. 4Pinyo komio in ikelo wa i wi tim noni pi wan to iye karacel kede leini wa? 5Pinyo komio in ikwanyo wa ki Misiri di iko kelo wa i kabedo arac noni? Alos akadi epigi likame tie iye, akadi olok arabo pomagurunet; doko pii me amata da li iye.” 6Di do Musa kede Aaron oko yai tenge kibut jo di kiko ot i nyim ekeko me Eema me riamo. Gin kiko riebere piny, di Rwot oko nyutere but gi i deyo mere.

7Rwot oko waco ne Musa be, 8“Kwany ebela me cing kame tie i nyim Sanduku me Isikan, di in kede Aaron omini ikounu coko jo lung me Isirael karacel. Di in iko ciko lela di gin kineno, pi woto pii mere. Iepone noni in ibino mino pii mol ki lela ne jo, di gin kede leini gi kiko mato.” 9Aso, Musa bin oko ot di eko kwanyo ebela nono bala kame oudo Rwot ociko ne.

10Musa kede Aaron oko bin coko jo lung karacel i nyim lela, di en eko waco negi be, “Winyunu, wun jojemo! Benyo, imitunu be wan omi pii wok di eko mol ne wu ki lela noni?” 11Di do Musa oko kiarao ebela malo di eko juto kede lela tien are, di pii oko bwote, di jo karacel kede leini gi oko mato.

12Do Rwot oko waco ne Musa kede Aaron be, “Pien wun likame ikounu keto gen wu buta, omio likame ikounu nyuta i wang jo me Isirael be ango ngat kacil. Pi mano, wun likame ibinunu telo gi tuno i lobo kame ango atieko cikere pi mino gi.”

13Manoni bin otimere i Meriba,c kakame bin jo me Isirael olok kiye kede Rwot, doko en kakame bin en enyuto negi kiye be en ngat kacil.

Kodagi ne Jo me Isirael Beo ki Edom

14Musa bin oko ooro jo ki Kades pi ot but abaka me Edom di kiko waco ne be, “In ingeo peko dedede kame wan obeo iye: 15epone kame joakwari wa bin ooto kede Misiri, di wan oko bedo kunono pi kare kalac. Jo me Misiri bin oko tero wa kirac karacel kede joakwari wa, 16di wan bin oko kok but Rwot pi konyo wa. Rwot bin oko winyo koko wa di eko cwano malaika kwanyo wa ki Misiri. Nataman wan ige otie Kades, bomba kame tie i nget ikor me piny kame in ipugo. 17Nataman wan okwai iyei ne wa ngolo ki lobo ni. Wan obino lubo yongayo kenekene; likame obino beo i poto moro akadi me olok, doko likame obino mato pii me kulo wu moro. Wan obino lubo yongayo adwongd kenekene abongo parao karamoro tuno wan kato adul ni.”

18Do abaka me Edom oko waco be, “Wun likame ibinunu beo i piny wa! Ka itamunu beo, wan oyaro bino di oko suro wu.”

19Jo me Isirael oko waco ne be, “Wan obino lubo yongayo adwong kenekene, doko ka wan amoto leini wa omato pii wu, wan obino culo. Gikame wan omito en in yei ne wan beo abea kenekene.”

20Do abaka oko medo waco be, “Wun likame ibinunu beo i lobo wa.” Di jo Edom oko cwano twon ekodet me isirikalen kame tek pi yi kede jo me Isirael. 21Iepone nono jo Edom bin oko dagi ne jo me Isirael beo ki piny gi. Manono oko mino jo me Isirael oko lokere di kiko lubo tetu apat.

To ka Aaron

22Jo me Isirael lung oko yai ki Kades di kiko ot naka tuno i moru me Kor, 23kame bin tie i ikor me Edom. Di Rwot oko waco ne Musa kede Aaron ki kunono be, 24“Aaron likame oyaro donyo i lobo kame ango bin acikere pi mino jo me Isirael, piento in kede en ikounu jemo i Meriba di ikounu dagi timo gikame ango oudo aciko. 25Kwany Aaron kede Eleasar wode di iko tero gi malo i wi moru me Kor, 26di in iko gonyo igoen ka Aaron me ngasaseredoti, di iko ngapo ne Eleasar. Do Aaron bino to kunono.” 27Musa oko timo bala kame Rwot oudo ociko; gin kiko yito malo i wi moru me Kor di ekodet lung neno. 28- Musa oko gonyo igoen ka Aaron me ngasaseredoti di eko ngapo ne Eleasar wode; Aaron oko to i wi moru kunono di Musa kede Eleasar oko dok piny. 29Kakame ekodet lung oko niang kede be Aaron oudo otieko to, jo me Isirael dedede oko koko Aaron pi ceng ot adek.

Baibuli I Leb Kumam

© 2013 Bible Society of Uganda

More Info | Version Index