Search form

Wel 21

Jo me Isirael Obwono Jo Kanan

1- Kakame abaka me Arad, kame bin bedo i bad tetu piny me Kanan oko winyo kede be jo me Isirael oudo tie bino di kilubo yongayo me Atarim, en eko ot suro gi di eko mako mogo kikom gi etero. 2Di jo me Isirael oko kwongere but Rwot be, “Kan in imio jo nogi i cing wa, wan obino muducaro bomban gi atwal atwala.” 3Rwot oko winyo kwac gi di eko mino gi kibwono jo Kanan. Aso, jo me Isirael di oko muducaro gi kede bomban gi atwal atwala, di kiko lwongo kabedo nono be Koroma.e

Twol kame Kotimo kede Nyonyo Buronsi

4- Jo me Isirael oko yai ki moru me Kor di kiko lubo yongayo kame oto i Nam Akwar, tetekeny kimanaro lobo me Edom. Di gin bin kitie ot, jo likame oko karuno dire. 5- Gin kiko yamo kirac i kom Rubanga kede Musa di kiwaco be, “Pinyo komio ikwanyunu wa ki Misiri di ikounu kelo wa to i wi tim kan kakame cam akadi pii da li iye? Wan likame otwero meede kanyakino camo cam arac noni.” 6Di Rwot oko cwano twole ager i dier jo me Isirael, di kiko tongotongo jo atot di kiko neko. 7Jo oko ot but Musa di kiko waco ne be, “Wan otieko dubo pi yamo kirac i kom Rwot kede i komi, nataman wan okwai ileg but Rwot wek ekwany twole nogi tenge.” Aso, Musa oko kwano Rwot pi jo. 8Di Rwot oko waco ne Musa be, “Tim cal me twol ager di iko cibe i wi epir, tetekeny ngatamoroni kame twol tongo bino ngine di eko bedo kuo.” 9- Aso, Musa oko timo twol kede nyonyo buronsi, di eko cibe i wi epir. Ka twol oudo otongo ngatamoro, ngat nono oudo ngio twol kame kotimo kede nyonyo buronsi nono di eko kuo.

Sapali me Ot Moab

10Jo me Isirael oko meede kede ot gi di kiko gero kimere gi Obot. 11Ingei yai ki Obot, gin kiko ot di kiko gero kimere gi kabedo kame kolwongo be Iye Abarim, i wi tim kame oudo tie i bad tetu kide me piny me jo Moab. 12Kiko yai kikano di kiko ot gero kimere gi i aditot me Sered. 13Gin bobo kiko yai ki Sered di kiko gero kimere gi loka tetuca me ecilet me Arunon, i wi tim kame donyo i piny me jo Amor. (Arunon en kame bin obedo ikor me jo Moab kede jo Amor.) 14Manono en komio kowaco i Itabu me Yi ka Rwot be, “Bomba me Wakeb i adul me Supa, kede aditoto; ecilet me Arunon, 15kede i bad aditoto kame oto naka i bomba me Ar kede tetu ikor me Moab.”

16Kiko yai ki Arunon di kiko ot kabedo kame kolwongo be Beer. Kanono en kulo kame bin Rwot owaco ne Musa kiye be, “Cok jo karacel di ango ako bino mino gi pii.” 17Jo me Isirael bin oko wero wer noni be,

“Atan lelepo pii, Okwe atan! Werunu ne wer!

18Atan kame bin jotel okunyo,

jodongo me jo en kokunye,

kikunye kede ebela gi me pug

kede ibelai me cing.”

Gin bin kiko yai ki wi tim di kiko ot Matana, 19kiko yai ki Matana di kiko ot Nakaliel, kiko yai kikano di kiko ot Bamot. 20Ki Bamot di kiko ot i aditot kame tie i piny me Moab, i dud moru me Pisiga, kakame neeno kede wi tim.

Kobwono Abaka Sikon kede Og

(Iswilia 2.26—3.11)

21Di do jo me Isirael oko ooro jo but Abaka Sikon me jo Amor pi ot waco ne be, 22“Wan okwai iyei ne wa ngolo ki lobo ni. Wan likame obino beo i poto moro akadi me olok, doko likame obino mato pii me atan wu moro. Wan obino lubo yongayo adwongg kenekene tuno wan kato adul ni.” 23Do Sikon likame oko yei ne jo me Isirael ngolo ki piny mere. En eko coko isirikalen mege karacel di eko ot ne jo me Isirael i wi tim; etuno Jas di eko suro jo me Isirael. 24Do jo me Isirael oko neko jo atot kikom gi, di kiko donyo bedo i lobo gi cako ki ecilet me Arunon i bad tetu piny tuno i ecilet me Jabok i bad tetu malo, tuno i ikor kede jo Amon; pien oudo kodaro ikor me jo Amon kitek. 25Aso, jo me Isirael bin oko mano bomban dedede me jo Amor, kiton Kesibon kede bomban koluke dedede di gin kiko donyo bedo i yi gi. 26Kesibon en bin bomba adwong me Abaka Sikon me jo Amor, en ngat kame bin oko yi kede abaka kasek me jo Moab di eko mano lobo mere lung naka tuno i ecilet me Arunon. 27Manono en komio jo awero waco be,

“Bia Kesibon, i bomba me Abaka Sikon!

Mito kogere bobo di oko dwoke kakare.

28- Isirikalen ka Sikon bin oko yai

ki bomba me Kesibon bala mac kame liel;

di kiko muducaro bomba me Ar i Moab

kede da imukuran me tetu malo me Arunon.

29Itienu ican tin benyo, wun jo me Moab!

Kotieko muducaro wu, Okwe wun jo ka rubanga Kemos!

Wun rubanga wu otieko mino cuo odoko joring ayela,

di oko mako mon odoko mabus ka Abaka Sikon me jo Amor.

30Do nataman do ikwae gi kotieko muducaro,

cako ki Kesibon tuno Dibon;

wan otieko muducaro gi cako ki Nasim tuno Nopa, i nget Medeba.”

31Aso, jo me Isirael bin oko donyo bedo i lobo me jo Amor. 32Musa bin oko cwano jo pi ot begao bomba me Yaser. Jo me Isirael bin oko mako bomba nono kede calere mege koluke, di kiko riamo tenge jo Amor kame bin tie kunono. 33Di do jo me Isirael oko lokere di kiko lubo yongayo aoto Basan. Abaka Og me Basan oko bin sirito kede isirikalen mege pi ot suro gi i Ederei. 34Rwot bin oko waco ne Musa be, “Kur ilwore. Ango atieko mine i cingi, en kede jo mege dedede, kede lobo mere da lung. Ibino timo ne gikame oudo itimo ne Abaka Sikon me jo Amor, ngat kame oudo pugo Kesibon.” 35Aso, jo me Isirael bin oko neko Abaka Og, awobe mege, kede jo mege dedede, abongo weko ngatamoro acel dong di ekuo; di do gin kiko donyo bedo i lobo mere.

Baibuli I Leb Kumam

© 2013 Bible Society of Uganda

More Info | Version Index