Search form

Wel 22

Abaka me Moab Olwongo Balaam

1Jo me Isirael oko yai ki kunono di kiko ot gero kimere gi i ebar me Moab i bad tetu kide me Yorodan, kakame pimere kede Jeriko.

2Kakame abaka me Moab, Balak wot ka Sipor, oko winyo kede gikame jo me Isirael oudo otieko timo ne jo Amor, kede kite kame jo me Isirael oudo tot kede, 3lworo atek oko make, en karacel kede jo mege dedede. 4Jo Moab bin oko waco ne jotel me Midian be, “Twon ekodet me jo no bino muducaro gi dedede kame tie kan, bala twon kame camo lum i obar.” I kare nono Balak wot ka Sipor en kame oudo tie abaka me Moab. 5- En bin eko oro jo ot lwongo Balaam wot ka Beor, ngat kame oudo tie Petor i nget ecilet me Eupurate i lobo me joawade mege. En eoro gi be kiwace Balak be, “Ateker lung otieko bino ki Misiri; gin kitieko sarakin kiromo lobo lung, doko kitieko donyo bedo i nget adul na. 6Gin kitek kibwono wa. Aso, ango akwai, bia ilam na gi amotoko atwer bwono gi di ako riamo gi tenge. Ango angeo be ka in ilamo ne dano winyo, ngat nono udo winyo, doko ka in ilamo dano kirac, ngat nono bedo dano kame kolamo.”

7Aso, jotel me Moab kede me Midian oko yai ot but Balaam; gin kitero ne sente me cule pi tic mere, di kiko mine kop kame Balak oudo ooro gi kede. 8Balaam oko waco negi be, “Butunu kan, di diki ango ako bino waco ne wu kop kame Rwot odwoko.” Aso, jotel me Moab oko dong bedo kede Balaam.

9Rubanga oko bino but Balaam di eko penye be, “Cuo mege ige kame tie kedi?”

10Balaam oko waco ne Rubanga be, “Abaka Balak me Moab ooro gi buta pi waco na 11be ateker moro otieko bino ki Misiri di kiko sarakin kiromo lobo lung. En emito be ango aot alam gi, tetekeny amoto etwer yi kede gi di eko riamo gi tenge.”

12Rubanga oko waco ne Balaam be, “Kur iot kede gi, doko kur ilam jo nogo, pien ango atieko mino gi winyo.”

13Aso, Balaam oko yai odiko di eko waco ne jo kame Balak oudo ooro be, “Dokunu paco; Rwot otieko dagi nango ot kede wu.” 14Jo nogo bin oko dok but Balak di kiko waco ne be, “Balaam odagi bino kede wa.”

15Di Balak bobo oko cwano jotel atot, jo kame pir gi tek kalamo me agege. 16Gin bin kiko ot but Balaam di kiko mine kop kame Balak ooro gi kede be, “Ango akwai, kur imi gimoro gengi bino buta; 17pien ateteni ango abino mini wor adwong, doko gimoroni kenekene kame in ibino waco, ango abino timo. In kenekene bia ilam jo nogi.”

18Do Balaam oko waco ne jo kame Balak oudo ooro be, “Akadi koto di Balak ko mina siliba kede saabu dedede kame tie i paco mere, likame ango atwero dagi lubo cik ka Rwot Rubanga na akadi i kop katitidi benyo. 19Wun iromunu dong kan bala kame jo icegun oudo otimo. Ango abino mito udo niang kibut Rwot i kom kop moro ace kame emito waco na i kom kop noni.”

20Iwor nono Rubanga oko bino but Balaam di eko waco ne be, “Ka cuo nogi obino pi kwani be iot kede gi, iikere di iko ot kede gi, do tim gikame ango awaco ni kenekene.” 21Aso, Balaam oko yai odiko di eko bedo i ngei punda mere di eko ot kede jotel me Moab.

Balaam kede Punda mere

22Balaam oudo tie wanano punda mere di etie i yongayo me ot Moab, doko jotic mege are oudo tie kede. Cuny Rubanga oko wang pi Balaam oudo tie ot, omio malaika ka Rubanga oko rire i yongayo pi genge. 23Kakame punda oneno kede malaika ka Rwot di tie cungo i yongayo, di emako epima di tie i cinge, en eko weko yongayo di eko parao i poto. Balaam oko jwato punda pi dwoke i yongayo. 24Di do malaika oko cungo kakame yongayo oudo diding kiye, i dierediere me poti are me olok, kame oudo tie kede apama tuni tuni. 25Kakame punda bobo oneno kede malaika nono, eko ride i nget apama, omio eko girisaro tien Balaam i apama. Balaam bobo oko jwato punda. 26Malaika bobo oko medo ot anyim di eko cungo kakadiding, kalikame oudo epiding moro me beo tie iye i bad tetu dedede. 27Kakame punda oneno kede malaika, eko buto piny. Cuny Balaam oko wang di eko donyo bungo punda kede ebela mere. 28Di Rwot oko mino punda otwero yamo, di eko penyo Balaam be, “Nyo kame ango atimo ni, en komio in iko jwata tien adek nogi?”

29Balaam oko gamo doge be, “Piento in iloka adoko ngamingo ni! Koto di oudo amako epima i cinga, koto aneki nan!”

30Do punda oko dwoko ne be, “Benyo, likame ango en punda ni kame in ibedo ot kede pi kare me kuo ni lung tuno tin? Benyo, tie ceng moro acel kame ango atieko timi kede iepone noni?”

En eko gamo be, “Li.”

31Di do Rwot oko yabo wang Balaam, di eko neno malaika ka Rwot di tie cungo i yongayo kede epima i cinge; di Balaam oko riebere piny pi mine wor. 32Malaika oko penye be, “Pinyo komio in iko jwato punda ni tien adek kamano? Ango atieko bino pi suri, pien sapali ni nono ipagel i nyima. 33Punda ni oudo obedo nena en komio ebedo parao tenge tien adek nogo. Ka koto oudo likame elengere tenge kibuta, ateteni nan anana koto oudo ango atieko neki di ako weko en edong kuo.”

34Balaam oko waco ne Malaika be, “Ango atieko dubo. Ango likame oudo angeo be in itie cungo i yongayo pi genga. Pi mano, ka ot na noni likame poore, ango abino dok paco.” 35Do malaika oko waco ne be, “In ot kede gin, do yam kop kame ango abino waco ni kenekene.” Aso, Balaam oko ot kede jotel kame oudo Balak ooro.

Balak ogamo Balaam

36Kakame Balak owinyo kede be Balaam oudo tie bino, en eko ot pi riamo kede i bomba me Ar Moab, kame bin tie i nget ecilet me Arunon, tetu ajikini me ikor me piny mere. 37Balak oko waco ne Balaam be, “Benyo, likame ango oudo aoro jo buti pi lwongi? Pinyo komio likame iko bino buta? Iparo be ango likame atwero mini giamia me pwoc kame romo?”

38Balaam oko waco ne Balak be, “Ango nataman atieko bino buti, do benyo, iparo be ango atie kede twer me waco kop moro kenekene? Kop kame Rubanga keto i doga en kame miero ango awaci.” 39Di do Balaam oko ot kede Balak Kiriat Kusot. 40Balak oko mino giayala angola me dok kede romini, di eko cwano mogo ne Balaam kede jotel kame oudo tie kede.

Imurai ka Balaam tien me Agege

41Oru mere odiko Balak oko tero Balaam kabedo kame kolwongo be Bamot Baal, kakame Balaam oko twero neno kiye jo mogo me Isirael.

Baibuli I Leb Kumam

© 2013 Bible Society of Uganda

More Info | Version Index