Search form

Wel 25

Jo me Isirael i Peor

1I kare kame jo me Isirael bin tie bedo kede i aditot me Akasia, cuo me Isirael oko donyo buto kede mon me Moab. 2Mon nogi oudo lwongo gin camo ibagai me mino giayala but rubangan me Moab. Jo me Isirael oudo camo di kiko donyo woro rubanga 3Baal me Peor. Manono oko mino cuny Rwot owang i kom gi 4di eko waco ne Musa be, “Kwany jotel dedede me Isirael di iko neko na gin i dier iceng di jo dedede neno, tetekeny ango ako bino kwanyo gero na tenge kibut jo me Isirael.” 5Di Musa oko waco ne jongolkop me Isirael be, “Ngat acelacel kikom wu miero nek jo me ekeko mere kotieko donyo woro Baal me Peor.”

6Inonono inonono di icuo moro acel me Isirael bino kede dako moro me Midian etero ture, di Musa kede jo dedede neno. Esawa nono oudo jo tie koko i ekeko me Eema me riamo. 7Kakame Pinekasi, wot ka Eleasar, akwar Aaron ngasaseredoti, oko neno kede kamano, en eko yai eweko jo kacokere. En eko kwanyo tong, 8di eko lubo icuo nono i ode, di eko cobo gin jo are nogo pelepel. Epone no en kame oko jiko kede aumpuli kame oudo tie neko jo me Isirael. 9Akadi kamanono da jo kame aumpuli oudo otieko neko oudo romo tutumia ot are kiwie ongwon (24,000).

10Rwot oko waco ne Musa be, 11“Pinekasi wot ka Eleasar, akwar Aaron ngasaseredoti, otieko loko gero na tenge kibut jo me Isirael; piento en ebedo kede nyeko atek pira di manono oko mina likame amuducaro gi. 12Pi manono, wace be, ‘Ango ayaro timo kede en isikan na me mulem. 13En kede ikwae mege kibino bedo josaseredoti nakanaka, piento en oudo nyeko omake kitek pi Rubanga mere, di eko timo gikame oko kwanyo dub me jo me Isirael.’ ”

14Nying icuo me Isirael kame koneko karacel kede dako me Midian oudo Simiri wot ka Salu, ngatel me diakal moro me ekeko ka Simeon. 15Nying dako nono kame koneko oudo Kosibi, nyar ka Suur, ngatel me diakal acel me Midian.

16Rwot oko waco ne Musa be, 17“Oti iko suro jo Midian di iko bwono gi, 18pi gikarac kame gin kitimo butu kakame kingalo wu kede i Peor, kede pi kop kame mako amin gi Kosibi, nyar ka ngatel gi acel anyinge Sur; en bin koneke i Peor, i kare me aumpuli.”

Baibuli I Leb Kumam

© 2013 Bible Society of Uganda

More Info | Version Index