Search form

Wel 26

Maro Wel me Jo me Tien me Are

1- Di do aumpuli oudo otiek, Rwot oko waco ne Musa kede Eleasar wot ka Aaron ngasaseredoti be, 2“Marunu wel me jo me Isirael lung, cako kibut jo kame mwakini gi me dongo tie ot are ot malo. Marunu wel me jo dedede kame romo ot i yi di lubere kede diakale ka joakwari gi.” 3-4Musa kede Eleasar oko lubo gikame Rwot oudo owaco, di gin kiko lwongo karacel cuo dedede me lwak nono. Gin kiko cokere i ebar me Moab loka tetuca me ecilet me Yorodan, kakame pimere kede bomba me Jeriko.

Jo me Isirael kame bin owok ki piny me Misiri gin ige:

5Jo me ekeko ka Ruben (Ruben oudo en kao ka Yakobo) gin en: jo me diakale ka Kanok, Palu, 6Keseroni, kede Karami. 7Cuo me diakale nogi oudo wel gi tie tutumia ot ongwon kiwie adek, kede tol kanyaare ki ot adek (43,730). 8Palu oudo en papa me Eliab. 9Idwe ka Eliab gin en, Nemuel, Datan, kede Abiram. Jo nogi, Datan kede Abiram en jotel kame bin jo me Isirael oyero, do gin kiko ribere kede Kora i kom Musa kede Aaron, di kiko jemo ne Rwot. 10Lobo bin oko ngamere di eko mwonyo gin karacel kede Kora, kede jo kame bin lube i kare kame mac bin omuducaro kede jo tol are kede ot kany (250). Gin kiko doko bala gi me ikwenyar but jo me Isirael icegun. 11Do awobe ka Kora bin likame oko to i kare nono.

12Ikwae ka Simeon di lubere kede diakale gi bin gin en Nemuel, Yamin, Yakin, 13Seera, kede Saul. 14Jo me diakale nogi oudo wel gi tie tutumia ot are kiwie are kede tol are (22,200).

15Idwe ka Gad di lubere kede diakale gi bin gin en Sepon, Kagi, Suni, 16Osini, Eri, 17Arod, kede Areli. 18Jo me diakale nogi oudo wel gi tie tutumia ot ongwon kede tol kany (40,500).

19Awobe ka Yuda oudo gin en Er kede Onan; gin bin kiko to i lobo me Kanan. 20Ikwae ka Yuda di lubere kede diakale gi gin bin en Sela, Peresi, Seera. 21Idwe ka Peresi bin gin en Keseroni kede Kamul. 22Jo me diakale nogi bin wel gi tie tutumia ot kanyaare kiwie kanyape kede tol kany (76,500).

23Ikwae ka Isakar di lubere kede diakale gi bin gin en Tola, Puwa, 24Yasub, kede Simiron. 25Jo me ikekon nogi bin tie tutumia ot kanyape kiwie ongwon kede tol adek (64,300).

26Ikwae ka Sebulun di lubere kede diakale gi bin gin en Sered, Elon, kede Yakalel. 27Jo me diakale nogi bin tie tutumia ot kanyape kede tol kany (60,500).

28Awobe ka Yosepu di lubere kede diakale gi bin gin en Manase kede Epuraimu.

29Ikwae ka Manase bin gin en jo me diakal ka Makir kede me ka Gilead. Makir bin en papa me Gilead. 30Ikwae ka Gilead bin gin en jo me diakal ka Iyeser, Kelek, 31Asiriel, Sekem, 32Semida, kede Keper. 33Selopekad wot ka Keper bin li kede idwe awobe; en bin enywalo anyira kenekene. Anyira nogo nying gi bin Makala, Nua, Kagela, Milika, kede Tirisa. 34Jo me diakale nogi kame bin kowandiko oudo wel gi tie jo tutumia ot kany kiwie are kede tol kanyaare (52,700).

35Ikwae ka Epuraimu di lubere kede diakale gi bin gin en Sutela, Beker, kede Takan. 36Jo me diakal ka Eran bin owok ki diakal ka Sutela. 37Jo me diakale nogi kame bin kowandiko oudo wel gi tie tutumia ot adek kiwie are kede tol kany (32,500).

Diakale nogi en kame bin obedo me ekeko ka Yosepu.

38Ikwae ka Benjamin di lubere kede diakale gi bin gin en Bela, Asabel, Akiram, 39Sepupam, kede Kupam. 40Jo me diakale ka Arad kede Naman bin owok ki diakal ka Bela. 41Jo me diakale nogi kame bin kowandiko oudo wel gi tie tutumia ot ongwon kiwie kany kede tol kanyape (45,600). 42Ikwae me ekeko ka Dan gin bin en jo me diakal ka Sukam. 43Jo dedede me diakal ka Sukam kame bin oko maro wel gi oudo tie tutumia ot kanyape kiwie ongwon kede tol ongwon (64,400).

44Ikwae ka Aser di lubere kede diakale gi bin gin en Imina, Isibi, kede Beria. 45Jo me diakale ka Keber kede Malakiel bin owok ki diakal ka Beria. 46Aser bin tie kede nyare kame nyinge Sera. 47Diakale nogi en oudo me ekeko ka Aser. Wel me jo mege kame bin kowandiko oudo tie tutumia ot kany kiwie adek kede tol ongwon (53,400).

48Ikwae ka Naputali di lubere kede diakale gi bin gin en Yakasil, Guni, 49Yeser, kede Silem. 50Jo me diakale nogi kame bin kowandiko oudo wel gi tie tutumia ot ongwon kiwie kany kede tol ongwon (45,400).

51Wel me cuo me Isirael kame bin kowandiko dedede oudo tie tutumia tol kanyape kede acel kede tol kanyaare kede ot adek (601,730).

52- Rwot oko waco ne Musa be, 53“Popoko lobo me Kanan ne jo me ikekon nogi di lubere kede wel me jo kame tie i ekeko acelacel. 54Ekeko kame jo mege tot in ibino mino gi lobo alac, do ekeko kame jo mege nonok in ibino mino lobo atitidi; ekeko acelacel in ibino mino gi lobo di lubere kede wel me jo mege kame kowandiko. 55Do lobo nono in ibino popoko en kede alulu, di gin kiko donyo iye pi doko mergi di lubere kede nying kwaru me ekeko acelacel. 56Iner me lobo acelacel kobino popoko kede alulu i dierediere me ikodeta adongodongo kede atitino.”

57Diakale me ekeko ka Lebi bin gin en Gereson, Kokat, kede Merari. 58Ikwae gi bin ribo kiton jo me diakale ka jogi: Libini, Keburon, Makali, Musi, kede Kora. Kokat bin en papa me Amuram. 59Nying dako ka Amuram bin en Yokebed nyar ka Lebi kame enywalo i Misiri. Yokebed bin oko nywalo ne Amuram idwe adek, gin en Aaron, Musa kede amin gi Miriamu. 60- Aaron bin onywalo awobe ongwon, gin en Nadab, Abiku, Eleasar, kede Itamar. 61- Do Nadab kede Abiku bin oko to kakame gin bin kimio kede giayala awanga but Rwot, gi kalikame iswil oudo mito. 62Jolebi acuo kame bin mwakini gi me dongo oromo duwe acel kede ot malo, kame komaro wel gi bin tie tutumia ot are kiwie adek (23,000). Gin bin kopoko gi tenge kibut jo me Isirael icegun di oko maro wel gi ken gi pien gin oudo likame kopoko ne gi iner moro me lobo.

63Jo me diakale nogi dedede en kame bin Musa kede Eleasar oko wandiko, i kare kame gin bin kiko maro kede wel me jo me Isirael i ebar me Moab, kabedo kame pimere kede Jeriko i loka tetuca me ecilet me Yorodan. 64Kikom gi, likame oudo tie dano moro akadi acel, kame oudo pwodi kuo kikom jo kame bin Musa kede Aaron owandiko i kare kame bin gin kimaro kede wel me jo me Isirael i wi tim me Sinai. 65- Rwot oudo otieko waco kop i kom gi be, “Gin kibino to i wi tim.” Likame tie ngatamoro kikom gi kame bin oko dong kuo kwanyo kenekene Kaleb wot ka Jepune kede Yosua wot ka Nun.

Baibuli I Leb Kumam

© 2013 Bible Society of Uganda

More Info | Version Index