Search form

Wel 27

Anyira ka Selopekad

1Makala, Nua, Kagela, Milika, kede Tirisa gin bin en anyira ka Selopekad wot ka Keper, Keper bin en wot ka Gilead, Gilead bin en wot ka Makir, Makir bin en wot ka Manase, Manase en bin wot ka Yosepu. 2Anyira nogi bin oko ot di kiko cungo i nyim Musa, Eleasar ngasaseredoti, jotel, kede jo dedede i nyim ekeko me Eema me riamo di gin kiko waco be, 3“Papa wan bin oto i wi tim abongo weko atin awobi moro. En bin eli i kom jo kame oudo lubo Kora ngat kame bin ojemo ne Rwot, do en bin eto pi dub mere kene. 4Pinyo bo kame mio poore nying papa wan rwenyi ki diakal mere be pien oudo likame enywalo atin awobi? Mi wada lobo moro i diere me imiegu mege.”

5Musa bin oko keto kwac gi but Rwot. 6Rwot oko waco ne Musa be, 7- “Kwac me anyira ka Selopekad poore; mi gida lobo i diere me imiegu ka papa gi. Poore mi gi lobo kame koto oudo komio papa gi. 8In ibino waco da ne jo me Isirael be, ‘Ka icuo moro oko to di eli kede atin awobi, nyare bino sikao jame mege. 9Ka en eli kede nyare, imiegu mege bino sikao jame mege. 10Ka en eli kede imiegu mege, imiegu ka papa mere bino sikao jame mege. 11Ka papa mere li kede imiegu mege, wad gi kiyapiyapi me diakal gi bino sikao jame mege. Jo me Isirael poore lub kop noni bala iswil kame ango Rwot atieko ciko.’ ”

Koyero Yosua pi Lunyo Wang Musa

(Iswilia 31.1-8)

12- Rwot oko waco ne Musa be, “Yiti i wi moru me Abarim di iko neno lobo kame ango abino mino jo me Isirael. 13Ka itieko nene, ida ibino to bala omini Aaron, 14pien wun bin ikounu jemo i wi tim me Sin di ikounu dagi lubo cik na. Kakame bin jo lung ongunguro kede i koma i Meriba, wun bin ikounu dagi nyuto negi twer na kacil.” (Meriba en atan kame tie Kades i wi tim me Sin.)

15Musa oko lego be, 16“Akwai Rwot Rubanga ngat kame ngeo cuny jo dedede, iket dano moro kame bino telo jo me Isirael. 17- Dano kame bino telo jo ot i yi doko di eko telo gi edwoko gi paco, dano kame bino bedo ngatel gi tetekeny kur jo ni dok cal bala romini kame li kede ngat kame kwao gi.” 18- Rwot oko waco ne Musa be, “Kwany Yosua wot ka Nun, icuo kame tie kede cuny me tel, di in iko dokakino cingi i wie. 19Mie ecung i nyim Eleasar ngasaseredoti kede i nyim jo dedede, di in iko mine tic i nyim gi bala ngat kame lunyo wangi. 20In ibino mine twer nin mogo, tetekeny jo me Isirael lung bino winye. 21- Do Yosua bino donyo cungo i nyim Eleasar ngasaseredoti, ngat kame bino tic kede Urim me penya pire. Kop kame Eleasar waco, en kame en kede jo dedede me Isirael bino lubo.” 22Musa oko timo bala kame oudo Rwot ociko ne. En etero Yosua di eko mine ecungo i nyim Eleasar ngasaseredoti kede i nyim jo dedede, 23- di do en eko dokakino cinge i wie di eko mine tic i nyim gi bala ngaluny wange, bala kame oudo Rwot ociko ne.

Baibuli I Leb Kumam

© 2013 Bible Society of Uganda

More Info | Version Index