Search form

Wel 28

Giayala me Buli Ceng

(Yai 29.38-46)

1Rwot oko ciko Musa 2pi waco ne jo me Isirael be miero kigwokere di kiko mino Rubanga giayala me cam kame yomo cunye i kare kame kociko.

3Magonogi en giayala me cam kame poore mi but Rwot: giayala awanga me buli ceng, idwe romini are me mwaka acelacel, kame li kede peko moro i kom gi. 4Atin oromo acel kobino mino esawa me odiko, kede me are mere di oko bino mino otieno di piny amumusit. 5Giayala acelacel kobino yalo karacel kede kilo acel me alos kinunga, kame konyalo kede lita acel me mo me olibeti kame ber adikinicel. 6Manoni en giayala awanga me buli ceng, kame bin komio tien me agege i wi moru me Sinai, bala giayala me cam kame kowango lung, giayala kame ngwe kur but Rwot. 7Giayala amata lita acelacel me bwini en kame bino upere kede giayala me idwe romini nogo; kobino onyo giayala amata me bwini akec but Rwot i kabedo kacil. 8Oromo ocelu kobino yalo otieno di piny amumusit, iepone acel nono kame koyalo kede me odiko. Eda etie giayala me cam, kame ngwece mere yomo cuny Rwot.

Giayala kame komio Ceng Sabato

9Ceng Sabato kobino mino giayala me idwe romini acuo are kalikame tie kede peko moro i kom gi, alos kilo are kame konyongo kede mo me olibeti, pi bedo giayala me alos kede giayala amata. 10Giayala awanga noni kopoore yalo buli ceng Sabato, medo i wi giayala me buli ceng kede giayala amata mere.

Giayala kame Komio i Ceng kame Geo Duwe

11I agege me duwe acelacel, ibinunu mino giayala awanga but Rwot kaman: itobai are, emerekek acel, idwe romini kanyaare me mwaka acelacel, gin dedede di likame kitie kede peko moro i kom gi. 12Kilo adek me alos kame konungo miero nyonge kede mo me olibeti di oko yale karacel kede etobait acelacel bala giayala me alos. Emerekek nono kobino yalo karacel kede kilo are me alos kame konyongo kede mo; 13doko kilo acel me alos kobino nyongo kede mo di oko yale karacel kede atin oromo acelacel. Giayala awanga nogi en giayala me cam kame ngwece mere yomo cuny Rwot. 14Giayala amata kame poore kede etobait acelacel en lita are me bwini, lita acel kede dul pi emerekek, kede lita acel pi atin oromo acelacel. Manoni en iswil kame mako giayala awanga kame koyalo i ceng kame geo duwe acelacel tieko mwaka lung. 15Medo i wi giayala awanga me buli ceng kede giayala mere me bwini, ibinunu yalo ekoroi bala giayala me kwanyo dub.

Giayala me kare me Ebaga me Mugati kame Arup li iye

(Jolebi 23.5-14)

16- I ceng me tomon kiwie ongwon me duwe me acel ibinunu tedo Ebaga me Kalamo pi mino wor but Rwot. 17- I ceng me tomon kiwie kany mere ibinunu tedo ebaga kame kocamo pi ceng kanyaare, di kocamo mugati kame arup li iye kenekene. 18Ceng me agege me ebaga nono obedo ceng me cokere kacil. Likame ibinunu timo tice wu. 19Ibinunu mino giayala awanga bala giayala me cam kame komio but Rwot: itobai are, emerekek acel, kede idwe romini acuo kanyaare me mwaka acelacel, gin dedede di kili kede peko moro i kom gi. 20Ibinunu mino giayala me alos kame konungo kiber di oko nyonge kede mo me olibeti: kilo adek me alos nono kobino yalo karacel kede twon acelacel, kilo are mere kobino yalo karacel kede emerekek, 21di kilo acel ikounu bino yalo karacel kede atin oromo acelacel. 22Ibinunu da mino giayala me ekoroi acel bala giayala me kwanyo dub. Manono en pwola me lonyo jo ki dub gi. 23Ibinunu mino giayala nogi medo i wi giayala awanga kame komio buli ceng odiko. 24Iepone acel nono, ibinunu mino giayala awanga me cam but Rwot pi ceng kanyaare, giayala kame ngwe kur bute. Ibinunu mino giayala noni medo i wi giayala awanga kame komio buli ceng karacel kede giayala me amata. 25Di do ceng me kanyaare mere ko bino bedo ceng me cokere kacil; likame ibinunu timo tice wu.

Giayala me Ebaga me Kac

(Jolebi 23.15-22)

26- I ceng me agege me Ebaga me Kac, kakame jo mio kede giayala me alos anyen but Rwot, ibinunu bedo i cokere kacil; likame ibinunu timo tice wu. 27Ibinunu mino giayala awanga kame ngwe kur but Rwot: itobai are, emerekek acel, kede idwe romini acuo kanyaare me mwaka acelacel; gin dedede likame miero kibed kede peko moro i kom gi. 28Ibinunu mino giayala me alos kame konungo kiber di oko nyonge kede mo me olibeti: kilo adek me alos nono kobino yalo karacel kede twon acelacel, kilo are mere kobino yalo karacel kede emerekek, 29di kilo acel oko bino yalo karacel kede atin oromo acelacel. 30Ibinunu da mino giayala me ekoroi acel bala giayala me kwanyo dub. Manono en pwola me lonyo jo ki dub gi. 31Ibinunu mino giayala me leini nogi ali kede peko moro i kom gi, karacel kede giayala amata, medo i wi giayala awanga me buli ceng kede giayala me alos.

Baibuli I Leb Kumam

© 2013 Bible Society of Uganda

More Info | Version Index