Search form

Wel 5

Jo Kopwokere

1Rwot oko waco ne Musa be, 2“Cik jo me Isirael pi poko tenge ki kimere gi jo dedede kame tie kede tuwo me delkom, arabo kame tie kede pige kame cwer ki kom gi, arabo jo komulo kom gi oto. 3Poore riamo jonogi dedede ki kimere, cuo kede mon, tetekeny kur kipwok kimere, en kakame ango abedo iye i diere me jo na.” 4Jo me Isirael oko timo kamanono bala kame oudo Rwot ociko ne Musa.

Tuco Dub kede Culo Jamini

5- Rwot oko waco ne Musa pi 6yamo ne jo me Isirael be, “Ka ngatamoro likame obedo kede genere but Rwot, di eko timo ne dano ace gikarac, dano nono bedo kede raco; 7en epoore tuco dub mere, di eko timo cul dedede but ngat kame en etimo ne gikarac nono, di bobo eko medo cule etango me acel i kom kany me cul nono. 8Do ka dano kame kopoore culo nono otieko to, doko da wad gi moro kiyapiyapi kede en kame kopoore mino cul bute likame tie, cul me gikarac nono bino ot but Rwot pi mino josaseredoti. Cul noni tie medo i wi emerekek kame en ekwanyo me ayala pi lwoko dub mere, en ngat kame etie kede raco. 9Giamia dedede kame jo me Isirael mio Rwot bino bedo me ka ngasaseredoti kame komio gi nono i cinge. 10Ngasaseredoti acelacel bino tero giamia kame jo tero but Rwot.”

Icuo kame Cunye Popoto i kom Dako mere

11Rwot oko waco ne Musa pi 12yamo ne jo me Isirael be, “Ka dako ka ngatamoro opacar di likame eko dong di etie dako agenere but cware, 13-14ka ebuto kede icuo moro me ooko di cware likame oko niang iye kiber, pien likame komake iye, doko mujura da li; arabo ka icuo moro cunye opoto i kom dako mere, do di i ateni likame dako nono obedo kede mit moro ooko; 15i kom kope are nogi dedede, icuo poore tero dako mere nono but ngasaseredoti. En epoore da tero giayala me kilo acel me alos me mawele, do likame ebino nyalo iye mo me olibeti arabo odok adunya angwe kur, piento en ebedo giayala kowok kibut icuo atie kede potocuny i kom dako mere; kotime pi nyuto gi dedede kakaler.

16“Ngasaseredoti ko bino mino dako nono cungo i nyim alutari ka Rwot, 17di ngasaseredoti ko bino onyo pi kacil i itatany kame kotimo kede elupe, di eko jobo apua mogo ki dier ot me Eema ka Rwot di eko rubo i kom pii atie i itatany nono pi mine doko kec. 18Ngasaseredoti ko bino sanyakako yer wi dako nono, di eko keto giayala me alos i cing dako nono. Di do en ngasaseredoti eko mako i cinge itatany atie kede pii akec, en pii kame kelo ilam. 19Di ngasaseredoti ko mino kwongere i kom dako nono be, ‘Ka likame icuo moro obuto kedi, ka likame in iweko cwari di iko ot pwokere tenge, kur pii akec kame kelo ilam noni tim ni gimoro. 20Do ka in oudo ipacar tenge kibut cwari, ka in oudo ioto buto kede icuo apat di iko munaun, 21poore Rubanga mi nyingi bed gi me ilam i diere me jo ni. Poore emi auris ni jungi di yii ko pong. 22Poore pii kame kelo ilam noni nan donyi i yii di eko mino auris ni jungi, di yi ko pong.’ Dako nono ko bino dwoko be, ‘Ango ayei, poore Rwot tim kamanono.’

23“Di do ngasaseredoti ko bino wandiko kope me ilam noni, di en eko lwoko iwandik nono i itatany kame pii akec kame kelo ilam tie iye, 24tetekeny ka dako nono omato pii akec nono, ilam nono bino donyo i kome di ko donyo rame. 25Ngasaseredoti ko bino gamo giayala me alos me mawele ki cing dako nono di eko kiarao en i nyim Rwot di eko cibe i wi alutari. 26Di ngasaseredoti ko juko alos nono i cinge pong, di eko wange i wi alutari di yiro mere ko duny; dul atitidi nono nyuto be akadi kodong da kotieko yalo but Rwot. Ingei manono en eko do mino dako nono mato pii noca. 27Ka dako nono oudo ateteni likame obedo kede genere but cware di eko buto kede icuo apat, pii nono bino donyo ramo yie kitek, di auris mere ko jung di yie ko pong; nyinge bino doko gi me ilam i diere me jo mege. 28Do ka dako nono oudo likame otimo tim moro atwero munao en i yore me buto kede icuo apat, likame tie gimoro arac kame bino timere ne, doko da en edong di etwero nywal. 29Manoni en iswil amako nyeko kame icuo bedo kede ka dako mere opacar di eko pwokere i yore me mito icuo apat, 30arabo ka icuo obedo kede potocuny i kom dako mere be amoto etie timo adote. Kobino mino dako nono cungo i nyim alutari di ngasaseredoti ko timo pwola noni dedede i kome. 31Cware likame bino bedo kede raco moro, do ka dako tie kede raco, en ebino udo can pi manono.”

Baibuli I Leb Kumam

© 2013 Bible Society of Uganda

More Info | Version Index