Search form

Wel 7

Giamia me Jotel

1I ceng kame Musa otieko kede gero Eema ka Rwot, en eko kwere but Rwot kede jamini dedede atie iye, karacel kede alutari kede jamini amake dedede. 2Di do jotel me Isirael, jo kobedo jotel me jo me ikekon apapat me Isirael, gin jo kame oudo lo kop me maro jo, 3oko tero giamia gi but Rwot. Gin kitero agadigadin kanyape kede twonin tomon kiwie are, buli agadigadi acel pi jotel are, kede buli twon acel pi ngatel acel. Gin kiko keto gi i nyim Eema. 4Rwot oko waco ne Musa be, 5“Gam giamia nogi pi timo kede gi tice amakere kede Eema. Popoko gi but Jolebi di lubere kede tice gi.” 6Aso, Musa oko tero agadigadin kede twonin di eko mino gi but Jolebi. 7Emio jo ka Gereson agadigadin are kede twonin ongwon, di lubere kede tic gi; 8di eko mino agadigadin ongwon kede twonin kanyauni but jo ka Merari di lubere kede tic gi, di Itamar wot ka Aaron ngasaseredoti en atelo gi. 9Do en likame eko mino jo ka Kokat gimoro, pien oudo komio gin timo tic me gwoko jamini amakere kede woro Rwot, jamini kame kitwero riongo i epepet gi.

10Jotel nogo oko doko da mino giamia gi amakere kede kwero alutari but Rwot. Kakame oudo gin kitieko do iikere kede pi mino giamia gi nogo i alutari, 11Rwot oko waco ne Musa be, “Wac negi be, ngatel acel kenekene en kame bino mino giamia mere me kwero alutari i ceng acel, tuno gin dedede lubere paka tiek.”

12-83Aso, buli ngatel acelacel oko tero giamia kaman: Itatany kame kotimo kede nyonyo siliba kame peko mere tie kilo acel kede dul, kede kalaya da kame kotimo kede nyonyo siliba kame peko mere tie guram tol kanyauni, manono di lubere kede gipim me Kabedo Kacil, gin dedede di kopongo gi kede alos kame konungo di konyonge kede mo pi bedo giayala me alos. Buli dano doko otero bakuli kame kotimo kede saabu kame peko mere romo guram tol acel kede tomon, di koponge kede odok angwe kur me adunya; kede twon etobait acel, emerekek acel, atin oromo icuo acel me mwaka acel, magonogi kitero pi bedo giayala awanga. Doko da buli dano oko tero diel acel pi bedo giayala me kwanyo dub, kede twonin are, imerekekin kany, diegi kany, kede idwe romini me mwaka acel, gin kany pi bedo giayala me nywak.

Gin kiko mino giamia gi di lubere kaman:

i ceng me agege Nakason wot ka Aminadab, dano me ekeko ka Yuda,

i ceng me are Netanel wot ka Suar, ngatel me jo me ekeko ka Isakar,

i ceng me adek Eliab wot ka Kelon, ngatel me jo me ekeko ka Sebulun,

i ceng me ongwon Elisur wot ka Sedeur, ngatel me jo me ekeko ka Ruben,

i ceng me kany Selumiel wot ka Surisadai, ngatel me jo me ekeko ka Simeon,

i ceng me kanyape Eliasap wot ka Dewel, ngatel me jo me ekeko ka Gad,

i ceng me kanyaare Elisama wot ka Amikud, ngatel me jo me ekeko ka Epuraimu,

i ceng me kanyauni Gamaliel wot ka Pedasur, ngatel me jo me ekeko ka Manase,

i ceng me kanyangon Abidan wot ka Egidioni, ngatel me jo me ekeko ka Benjamin,

i ceng me tomon Akieser wot ka Amisadai, ngatel me jo me ekeko ka Dan,

i ceng me tomon kiwie acel Pagiel wot ka Akeran, ngatel me jo me ekeko ka Aser,

i ceng me tomon kiwie are Akira wot ka Enan, ngatel me jo me ekeko ka Naputali.

84-88Wel me jame dedede kame jotel tomon kiwie are nogo oko tero me kwero kede gi alutari oko bedo kaman:

— itatany tomon kiwie are kame kotimo kede nyonyo siliba, kede da kalayan tomon kiwie are kame kotimo kede nyonyo siliba, gin dedede peko gi oko romo kilo ot are kiwie kanyape kede guram tol kanyape di lubere kede gipim me Kabedo Kacil;

— bakulin tomon kiwie are kame kotimo kede saabu, di kopongo gi kede odok adunya angwe kur, gin dedede peko gi oko romo kilo acel kede guram tol adek kede ot are;

— twonin tomon kiwie are, imerekekin tomon kiwie are, kede idwe romini acuo me mwaka acel tomon kiwie are, karacel kede giayala me alos kame upere kede gi, magonogi pi bedo giayala awanga;

— diegi tomon kiwie are pi bedo giayala me kwanyo dub;

— twonin ot are kiwie ongwon, imerekekin ot kanyape, diegi ot kanyape, idwe romini acuo me mwaka acel ot kanyape, magonogi pi bedo giayala me nywak.

89Tek kame Musa oudo ooto i Eema ka Rwot pi yamo kede, en oudo ewinyo dwan Rwot di tie yamo kede ki wi kom me kisa kame oudo tie i wi Sanduku me Isikan, i dierediere me cerubim are.

Baibuli I Leb Kumam

© 2013 Bible Society of Uganda

More Info | Version Index