Search form

Wel 8

Cibo Italan

1- Rwot oko waco ne Musa be, 2“Wac ne Aaron be, kame etie cibo italan kanyaare, poore ecib gi di kirieny kicaro tetu anyim.” 3Aaron da oko timo kamanono, en ecibo italan di kirieny kicaro tetu anyim me gicibo italan, bala kame oudo Rwot ociko ne Musa. 4Bin gicibo italan nogo oudo kocweo kaman: yai ki dude piny tuno i ature mege oudo obedo saabu kame koteto ateta kede enyondo, di lubere kede epone kame Rwot oudo onyuto ne kede Musa.

Kwero Jolebi kede Tic gi

5Rwot oko waco ne Musa be, 6“Pok Jolebi tenge kikom jo me Isirael di iko lonyo gi 7kaman: kikiro i kom gi pii me lonyere, di iko mino gi kiliel yer dedede kikom gi kede liedi, di kiko lwoko igoen gi, di do kiko doko jo kotieko lonyere. 8Di do iko mino gi kikwany twon etobait kede giamia me alos kame konungo di konyonge kede mo; doko iko kwanyo twon etobait ace pi bedo giayala me kwanyo dub. 9Ibino coko jo dedede me Isirael di iko kelo Jolebi i nyim Eema me ariamakin keda, 10di jo dedede me Isirael ko cibo cing gi i wi Jolebi. 11Aaron bino mino Jolebi buta bala giamia kowok kibut jo me Isirael, tetekeny gin kidony timo tic na. 12Jolebi ko bino cibo cing gi i wi twonin. Twon acel bino bedo giayala me kwanyo dub, kede ocelu ko bedo giayala awanga, pi timo pwola me lonyo Jolebi.

13“Di do in iko bino mino Jolebi cungo i nyim Aaron kede awobe mege, di iko mino gi buta bala giamia.

14“Epone noni en kame in ibino poko kede Jolebi kikom jo me Isirael, di gin kiko bedo mega. 15Ingei in lonyo Jolebi kede mino gi buta bala giamia, gin kibino ot cako timo tic i Eema na. 16Pien ango atieko gamo gin kidoko mega, jo kame lunyo kawang awobe kao me jo me Isirael. 17- Idwe kao dedede me jo kede me leini i lobo me Isirael obedo mega, pien i ceng kame ango aneko kede idwe cuo kao i Misiri, ango ako kwero gin pi bedo mega. 18Do ango nan atieko tero Jolebi kawang idwe cuo kao dedede me Isirael, 19di ako mino gi bala giamia kikom jo me Isirael but Aaron kede awobe mege, pi timo ne jo me Isirael tic i Eema na, kede pi timo pwola i kom jo me Isirael kame bino noko Kabedo Kacil, tetekeny kur can moro pot negi.”

20Aso, Musa kede Aaron kede jo dedede me Isirael oko kwero Jolebi but Rwot bala kame oudo Rwot ociko ne Musa. 21Jolebi olonyere ki dub gi di kiko lwoko igoen gi, di do Aaron oko kwero gi but Rwot bala giayala kame kokiarao. 22Jo oko timo gi dedede kame Rwot oudo ociko ne Musa amakere kede Jolebi. Di do Jolebi oko cako timo tic i Eema ka Rwot, di Aaron kede awobe mege en kame loo gi.

23Rwot oko waco ne Musa be, 24“Jolebi dedede me cako ki mwaka ot are kiwie kany ot malo bino donyo timo tic i Eema me ariamakin keda, 25di do dano ko bino weko tic ka mwaka mere me dongo oromo mwakini ot kany. 26Ingei weko tic, gin kitwero konyo Jolebi imiegu gi timo tice gi i Eema, do likame gin kibino timo tic moro gin ken gi. Epone noni en kame ibino mino kede Jolebi tic.”

Baibuli I Leb Kumam

© 2013 Bible Society of Uganda

More Info | Version Index