Search form

Wel 9

Ebaga me Kalamo me Are

1- Rwot oko yamo kede Musa i wi tim me Sinai, i duwe me agege i mwaka me are ingei gin yai ki lobo me Misiri. En ewaco ne Musa be, 2-3“I ceng me tomon kiwie ongwon me duwe noni, cako esawa kame ceng donyo kede, jo me Isirael poore kwero Ebaga me Kalamo, di kilubo iswilia amake.” 4Aso, Musa oko waco ne jo me Isirael pi tedo Ebaga me Kalamo. 5Otieno me ceng me tomon kiwie ongwon me duwe me agege, gin kiko kwero Ebaga me Kalamo i wi tim me Sinai. Jo otimo gi dedede bala kame Rwot oudo ociko ne Musa.

6Do i ceng nono oudo tie jo mogo komunaun pien oudo kimulo kom dano oto, aso omio gin likame kiko twero kwero Ebaga me Kalamo. Gin kioto but Musa kede Aaron 7di kiko waco negi be, “Bed bala wan omunaun pien omulo kom dano oto, do pinyo komio kogengo wan mino giamia but Rwot karacel kede jo apat me Isirael i kare me ebaga noni?”

8Musa oko dwoko negi be, “Kong darunu paka ango winyo kop kame Rwot bino dwoko iye.”

9Rwot oko waco ne Musa 10pi waco ne jo me Isirael be, “Ngatamoro kikomu amoto kikom ikwae wu kame mulo kom dano oto di eko doko ngat komunaun, arabo dano kame tie tenge i sapali twero kwero Ebaga me Kalamo. 11Gin kibino kwere i ceng me tomon kiwie ongwon me duwe me are di ceng odonyo. Kibino camo ebaga nono kede mugati kame arup li iye kede yen akec. 12- Likame kibino weko cam moro buto paka odiko, akadi turo cogo moro me leini kame kotedo kede ebaga nono. Gin kipoore lubo iswilia amakere kede Ebaga me Kalamo. 13Do dano kalikame omunaun, doko da di likame etie i sapali moro, do di eko dagi kwero Ebaga me Kalamo, kobino riame tenge ki ekodet me jo me Isirael pi kite kame edagi kede mino giamia buta i kare kame komoko. Ngat nono bino udo alola pi dub mere.

14“Ngakumbor kame bedo i diere wu di cunye ko mito kwero Ebaga me Kalamo en ebino kwero ebaga nono, do epoore lubo iswilia amake, likame kobino popoko iswilia amako jokumbor kede jo me Isirael.”

Edou kacal kede Mac

(Yai 40.34-38)

15I ceng kame kogero kede Eema ka Rwot, edou oko ume, do iwor tuno odiko en oudo eko lokere edoko cal bala mac, 16di edou nono oko bedo timere kamanono nakanaka. 17Tek kame edou oudo oyai tenge ki wi Eema ka Rwot, jo me Isirael oudo ko yai, di kiko ot gero kimere gi kakame edou nono ocungo iye bobo. 18Kame Rwot oudo owaco ne jo pi yai, gin oudo kiyai, doko da kame en oudo ewaco negi pi gero kimere, gin oudo kiko gedo. Tek kame edou oudo osipakin cungo i wi Eema ka Rwot, gin oudo kidong bedo i kimere gi kanono. 19Kame edou oudo oko dong cungo i wi Eema ka Rwot pi ceng atot, gin oudo kilubo gikame Rwot otieko ciko negi, di likame kiko yai ki kanono. 20Ceng mogo edou oudo dong cungo i wi Eema ka Rwot pi ceng anonok kenekene, gida oudo kiko dong i kimere gi di lubere kede cik ka Rwot. 21Ceng mogo edou oudo dong cungo i wi Eema ka Rwot cako me wang otieno tuno odiko kenekene, di do ka Edou oko yai odiko, gida oudo kiko yai. Tek kame edou oudo oyai, gida oudo kiko yai. 22Akadi kame edou oudo ocungo i wi Eema pi ceng are amoto duwe acel, arabo pi kare abor kalamo kano, jo me Isirael oudo dong bedo kanono, do ka eko kwanyere, gin oudo kiko yai. 23Kame Rwot oudo owaco ne Musa pi ciko ne jo pi yai, gin oudo kiyai, doko da kame en oudo eciko negi pi gero kimere, gin oudo kiko gedo.

Baibuli I Leb Kumam

© 2013 Bible Society of Uganda

More Info | Version Index