Search form

Hechos 1

Li Dios quixyechiꞌi li Santil Musikꞌej reheb li ralal xcꞌajol

1Saꞌ li xbe̱n hu quintzꞌi̱ba a̱cuiqꞌuin, at Teófilo, quintzꞌi̱ba retalil chixjunil li joꞌ qꞌuial quixcꞌut ut quixba̱nu li Ka̱cuaꞌ Jesús chalen nak quixtiquib lix cꞌanjel saꞌ ruchichꞌochꞌ 2toj saꞌ li cutan nak quicꞌameꞌ saꞌ choxa. Nak toj ma̱jiꞌ naxic saꞌ choxa, riqꞌuin xcuanquil li Santil Musikꞌej, quixye reheb cꞌaꞌru tento teꞌxba̱nu lix apóstol li quixsiqꞌueb ru. 3Nak ac xrahobtesi̱c ut ac xcamsi̱c, quicuacli cuiꞌchic chi yoꞌyo ut quixcꞌutbesi cuiꞌchic rib chiruheb. Caꞌcꞌa̱l cutan quicuan saꞌ ruchichꞌochꞌ ut nabal sut quixcꞌutbesi rib chiruheb re nak teꞌxnau chi tzꞌakal nak quicuacli cuiꞌchic chi yoꞌyo. Quixchꞌolob xya̱lal chiruheb chanru nak ta̱cua̱nk xnimal xcuanquilal li Dios saꞌ xbe̱neb li tenamit. 4Nak toj cuan saꞌ xya̱nkeb li Jesús quixye reheb chi joꞌcaꞌin: —Incꞌaꞌ texxic saꞌ jalan naꞌajej. Texcana̱k ban Jerusalén roybeninquil li Santil Musikꞌej li yechiꞌinbil e̱re xban li Dios Acuabej, li ac xinye e̱re la̱in. 5Ya̱l nak laj Juan quicubsin haꞌ riqꞌuin haꞌ. Abanan anakcuan aꞌ chic lix cuanquilal li Santil Musikꞌej te̱cꞌul chi se̱b ut aꞌan chic ta̱cua̱nk e̱riqꞌuin, chan.

Li Jesús quicꞌameꞌ saꞌ choxa xban li Dios

6Eb li apóstol li chꞌutchꞌu̱queb aran queꞌxpatzꞌ re li Jesús: —At Ka̱cuaꞌ, ¿ma anakcuan ta̱qꞌueheb cuiꞌchic xcuanquileb laj Israel re teꞌxtakla cuiꞌchic rib xjuneseb? chanqueb. 7Quichakꞌoc li Jesús ut quixye reheb: —Ma̱cuaꞌ e̱re la̱ex xnaubal li cꞌaꞌak re ru aꞌin. Caꞌaj cuiꞌ li Dios Acuabej nanaꞌoc re jokꞌe tixba̱nu xban nak caꞌaj cuiꞌ aꞌan yal re saꞌ xbe̱n chixjunil. 8La̱ex te̱cꞌul le̱ cuanquil nak ta̱cha̱lk li Santil Musikꞌej e̱riqꞌuin. La̱ex chic texchꞌoloba̱nk resilal chicuix la̱in arin Jerusalén, aran Judea ut Samaria. Joꞌ ajcuiꞌ yalak bar jun sut saꞌ ruchichꞌochꞌ te̱chꞌolob lix ya̱lal, chan. 9Nak quirakeꞌ xyebal chixjunil aꞌin quicꞌameꞌ saꞌ choxa li Jesús xban li Dios. Yo̱queb chirilbal nak quichal jun li chok ut quimukun saꞌ li chok. Ut incꞌaꞌ chic queꞌril ru. 10Toj yo̱queb ajcuiꞌ chirilbal nak yo̱ chi xic li Jesús saꞌ choxa nak xaka̱mileb cuibeb li cui̱nk chiruheb. Sakeb li rakꞌ. 11Ut queꞌxye reheb: —Ex cui̱nk aj Galilea, ¿Cꞌaꞌut nak yo̱quex chi iloc saꞌ choxa? Li Jesús li xcuan saꞌ e̱ya̱nk ut xcꞌameꞌ saꞌ choxa, aꞌan ta̱cha̱lk cuiꞌchic. Chanru nak xeril chi xic saꞌ choxa, joꞌcan cuiꞌchic nak te̱ril nak yo̱k chi cha̱lc, chanqueb reheb.

Quixakaba̱c laj Matías chokꞌ apóstol chokꞌ re̱kaj laj Judas

12Chirix aꞌan eb li apóstol queꞌcube chak saꞌ li tzu̱l Olivos ut queꞌco̱eb cuiꞌchic Jerusalén. Li tzu̱l aꞌan nachꞌ cuan riqꞌuin li tenamit Jerusalén, jun kilómetro tana xnajtil, joꞌ xnajtil li naru nequeꞌxbeni saꞌ li hiloba̱l cutan. 13Nak queꞌcuulac Jerusalén queꞌtakeꞌ saꞌ xcaꞌ tasal li cab li nequeꞌhilan cuiꞌ nak cuanqueb Jerusalén. Aꞌaneb laj Pedro, laj Juan, laj Jacobo, laj Andrés, laj Felipe, laj Tomás, laj Bartolomé, laj Mateo, laj Jacobo li ralal laj Alfeo, laj Simón li na-oquen saꞌ xya̱nkeb li jun chꞌu̱tal Zelote nequeꞌxye reheb, ut laj Judas li ralal laj Jacobo. 14Chixjunileb aꞌan yo̱queb chi tijoc chi junajeb xchꞌo̱l rochbeneb li ri̱tzꞌin li Jesús ut lix María lix naꞌ. Ut cuanqueb ajcuiꞌ ixk yo̱queb chi tijoc rochbeneb. 15Saꞌ eb li cutan aꞌan jun ciento riqꞌuin junmay chixjunileb laj pa̱banel li chꞌutchꞌu̱queb aran. Laj Pedro quixakli saꞌ xya̱nkeb ut qui-oc chixyebal reheb: 16—Ex inherma̱n, tento nak ta̱uxma̱nk li tzꞌi̱banbil saꞌ li Santil Hu li quicꞌuteꞌ chiru li rey David xban li Santil Musikꞌej chirix laj Judas li quikꞌaxtesin re li Jesús reheb li queꞌchapoc re. 17Laj Judas, aꞌan raj jun saꞌ kaya̱nk saꞌ li cꞌanjel aꞌin. 18Riqꞌuin lix tojbal li quiqꞌueheꞌ re xban nak quixba̱nu li ma̱usilal, quilokꞌeꞌ jun li chꞌochꞌ. Quixyatzꞌ rib ut nak quitꞌaneꞌ chi xulxu, quichireꞌ ut qui-el chak chixjunil saꞌ lix saꞌ. 19Qui-el ut resil aꞌan saꞌ xya̱nkeb chixjunileb li cuanqueb Jerusalén. Joꞌcan nak Acéldama nequeꞌxye re li naꞌajej aꞌan saꞌ li ra̱tinoba̱leb. Aꞌan naraj naxye “Lokꞌbil riqꞌuin quicꞌ.” 20Quicꞌulman chi joꞌcan xban nak saꞌ li hu Salmos tzꞌi̱banbil retalil li naxye chi joꞌcaꞌin:

Chicana̱k ta lix naꞌaj chi ma̱cꞌaꞌ chic cuan chiru. Ut ma̱ ani ta chic chi cua̱nk saꞌ lix muheba̱l. (Sal. 69:5)

Ut naxye ajcuiꞌ:

Jalan ta chic chiqꞌuehekꞌ chokꞌ re̱kaj saꞌ lix cꞌanjel. (Sal. 109:8)

21Joꞌcan nak tento takaxakab junak chokꞌ re̱kaj laj Judas. Cuanqueb cui̱nk saꞌ kaya̱nk queꞌochbenin chak ke nak toj cuan li Jesús saꞌ kaya̱nk, 22chalen nak quicubsi̱c chak xhaꞌ li Jesús xban laj Juan ut toj chalen nak quicꞌameꞌ saꞌ choxa chiku. Jun reheb li cui̱nk aꞌan naru takaxakab chokꞌ re̱kaj laj Judas re nak tixchꞌolob ajcuiꞌ xya̱lal nak quicuacli cuiꞌchic chi yoꞌyo li Jesús saꞌ xya̱nkeb li camenak, chan laj Pedro. 23Queꞌxxakab laj José li nequeꞌxye Barsabás re. Aj Justo lix cꞌabaꞌ jun chic nequeꞌxqꞌue. Ut queꞌxxakab ajcuiꞌ laj Matías. 24Ut queꞌoc chi tijoc ut queꞌxye: —At Ka̱cuaꞌ, la̱at nacanau chanru li ra̱m li junju̱nk. Joꞌcan nak nakatzꞌa̱ma cha̱cuu nak ta̱cꞌutbesi chiku ani reheb li cuib aꞌin ta̱sicꞌ ru re ta̱cana̱k chi cꞌanjelac chokꞌ re̱kaj laj Judas. 25Aꞌan tixcꞌul xcuanquil chi cꞌanjelac chokꞌ apóstol. Tixba̱nu li cꞌanjel li quixtzꞌekta̱na laj Judas xban li incꞌaꞌ us quixba̱nu. Laj Judas co̱ saꞌ li naꞌajej chixtojbal xma̱c bar xcꞌulub cuiꞌ xic, chanqueb. 26Joꞌcan nak queꞌxbu̱li rix li ani ta̱cana̱k chi cꞌanjelac. Ut nak ac xeꞌbu̱lic, li cꞌanjel aꞌan quicana saꞌ xbe̱n laj Matías. Ut saꞌ ajcuiꞌ li ho̱nal aꞌan laj Matías qui-oc chokꞌ apóstol saꞌ xya̱nkeb li junlaju chic.

Li Santil hu

© 2000, Wycliffe Bible Translators, Inc. All rights reserved. More Info | Version Index