Search form

Hechos 18

Eb laj pa̱banel li cuanqueb Corinto queꞌxtiquib xchꞌutubanquil ribeb chi lokꞌoni̱nc

1Nak ac xcꞌulman aꞌin, laj Pablo qui-el Atenas. Ut co̱ Corinto. 2Ut aran quixtau jun li cui̱nk aj judío. Aj Aquila xcꞌabaꞌ. Ponto xtenamit. Incꞌaꞌ najter xcꞌulunic Italia rochben lix Priscila li rixakil. Queꞌel aran Roma xban nak laj Claudio li Acuabej quixye nak chixjunileb laj judío teꞌe̱lk saꞌ li tenamit aꞌan. Laj Pablo co̱ chirulaꞌanquileb. 3Ut quicana rochbeneb chi cꞌanjelac xban nak juntakꞌe̱t li cꞌanjel nequeꞌxba̱nu. Nequeꞌyi̱ban tꞌicr re muheba̱l. 4Saꞌ li hiloba̱l cutan rajlal naxic laj Pablo saꞌ li cab li nequeꞌxchꞌutub cuiꞌ ribeb laj judío. Aran quia̱tinac riqꞌuineb ut quixchꞌolob xya̱lal chiruheb laj judío joꞌqueb ajcuiꞌ li ma̱cuaꞌeb aj judío. 5Nak ac xeꞌsukꞌi chak laj Silas ut laj Timoteo Macedonia, laj Pablo quixkꞌaxtesi rib chi junaj cua chixchꞌolobanquil lix ya̱lal reheb laj judío nak li Jesús, aꞌan li Cristo, laj Colonel li yechiꞌinbil xban li Dios. 6Abanan eb aꞌan incꞌaꞌ queꞌcuulac chiru li yo̱ chixyebal laj Pablo. Queꞌoc chi majecua̱nc. Joꞌcan nak laj Pablo quixchikꞌchikꞌi li rakꞌ ut quixye reheb: —Cui la̱ex incꞌaꞌ texcolekꞌ, aꞌ yal e̱re. Saꞌ e̱be̱n la̱ex cuan li ma̱c. La̱in ma̱cꞌaꞌ inma̱c xban nak ac xinye e̱re lix ya̱lal. Chalen anakcuan la̱in tinchꞌolob xya̱lal reheb li ma̱cuaꞌeb aj judío, chan. 7Joꞌcan nak laj Pablo qui-el saꞌ xya̱nkeb ut co̱ chi cua̱nc saꞌ rochoch jun li cui̱nk ma̱cuaꞌ aj judío. Aj Justo xcꞌabaꞌ. Li cui̱nk aꞌan naxlokꞌoni li Dios. Li rochoch cuan chixcꞌatk li cab li nequeꞌxchꞌutub cuiꞌ ribeb laj judío. 8Laj Crispo, li nacꞌamoc be saꞌ li cab li nequeꞌxchꞌutub cuiꞌ ribeb, quixpa̱b Li Ka̱cuaꞌ rochbeneb li cuanqueb saꞌ li rochoch. Nabaleb aj Corinto queꞌpa̱ban nak queꞌrabi resil li colba-ib. Ut queꞌcubsi̱c xhaꞌeb. 9Saꞌ jun li kꞌojyi̱n li Ka̱cuaꞌ quixcꞌutbesi jun li visión chiru laj Pablo ut quixye re: —Matxucuac chi a̱tinac. Chꞌolob ban lix ya̱lal chiruheb li tenamit. 10La̱in cua̱nkin a̱cuiqꞌuin. Ma̱ ani ta̱ba̱nu̱nk raylal a̱cue xban nak nabaleb li cualal incꞌajol saꞌ li tenamit aꞌin, chan li Dios re laj Pablo saꞌ li visión. 11Joꞌcan nak laj Pablo quicana aran jun chihab riqꞌuin cuakib po ut yo̱ chixchꞌolobanquil xya̱lal li ra̱tin li Dios chiruheb.

Laj Galión li cuan chi takla̱nc aran Acaya quixye nak laj Pablo ma̱cꞌaꞌ xma̱c

12Nak laj Galión cua̱nk chi takla̱nc aran Acaya, eb laj judío queꞌxcꞌu̱b ru chi ribileb rib nak teꞌxchap laj Pablo. Queꞌxchap ut queꞌxcꞌam saꞌ po̱pol re nak ta̱rakekꞌ a̱tin saꞌ xbe̱n. 13Ut queꞌxye: —Li cui̱nk aꞌin yo̱ chixyebal reheb li tenamit chanru nak teꞌxlokꞌoni li Dios. Li naꞌleb li naxye aꞌan, moco naxcꞌu̱luban ta li chakꞌrab, li qꞌuebil ke xbaneb laj Roma, chanqueb. 14Oc raj re chi a̱tinac laj Pablo nak quichakꞌoc chak laj Galión ut quixye reheb laj judío: —Ex aj judío, cui ta xkꞌet xchakꞌrabeb laj Roma malaj ut cui ta cuan junak incꞌaꞌ us xba̱nu, tento raj tinchꞌiꞌchꞌiꞌi cuib che̱rabinquil. 15Abanan cui yal chirix a̱tinac ut cꞌabaꞌej ut chirix le̱ chakꞌrab yo̱quex chi jitoc chirix, tento nak la̱ex te̱sicꞌ xya̱lal. La̱in incꞌaꞌ nacuaj rakoc a̱tin chirix li cꞌaꞌak re ru aꞌin, chan. 16Ut quirisiheb saꞌ li po̱pol. 17Eb laj griego queꞌxchap laj Sóstenes li nataklan saꞌ li cab li nequeꞌxchꞌutub cuiꞌ ribeb laj judío. Queꞌxsacꞌ ut queꞌxtacuasi chiru li po̱pol ut laj Galión ma̱cꞌaꞌ quixye.

Laj Pablo quisukꞌi cuiꞌchic Antioquía ut co̱ cuiꞌchic rox sut chirulaꞌaninquileb laj pa̱banel

18Aꞌut laj Pablo toj quicana aran nabal cutan. Tojoꞌnak quixchakꞌrabiheb laj pa̱banel ut qui-el. Co̱ chiru haꞌ toj Siria rochbeneb lix Priscila ut laj Aquila. Aran saꞌ li tenamit Cencrea quixbes li rismal. Aꞌan retalil nak quixba̱nu li cꞌaꞌru quixyechiꞌi re li Dios. 19Nak queꞌcuulac Efeso laj Pablo quixcanabeb lix Priscila ut laj Aquila ut co̱ saꞌ li cab li nequeꞌxchꞌutub cuiꞌ ribeb laj judío chixchꞌolobanquil lix ya̱lal chiruheb laj judío. 20Ut eb aꞌan queꞌxtzꞌa̱ma chiru nak toj ta̱cana̱k chic caꞌchꞌinak riqꞌuineb. Abanan laj Pablo incꞌaꞌ quixsume cana̱c. 21Quixchakꞌrabiheb ban ut quixye reheb: —Tento nak tinxic chixnumsinquil li ninkꞌe Jerusalén xban nak cuulac re xkꞌehil. La̱in tincha̱lk cuiꞌchic e̱riqꞌuin cui joꞌcan naraj li Dios, chan. Ut qui-el aran Efeso. 22Nak quicuulac Cesarea, co̱ Jerusalén. Ut nak ac xqꞌueheb xsahil xchꞌo̱leb laj pa̱banel, co̱ Antioquía. 23Incꞌaꞌ najt quicuan aran nak co̱ ut quinumeꞌ saꞌ eb li naꞌajej Galacia ut Frigia ut yo̱ chixqꞌuebal xcacuilal xchꞌo̱leb laj pa̱banel.

Laj Apolos quixchꞌolob xya̱lal nak li Jesús, aꞌan li Cristo

24Quicuulac Efeso jun li cui̱nk aj judío, aj Apolos xcꞌabaꞌ. Alejandría xtenamit. Kꞌaxal naxnau a̱tinac chi cha̱bil ut naxnau chi us li tzꞌi̱banbil saꞌ li Santil Hu. 25Quixtzol rib chi us ut naxnau chanru xpa̱banquil li Ka̱cuaꞌ. Ut quixqꞌue xchꞌo̱l chi a̱tinac chi tzꞌakal xchꞌolobanquil resil li Jesús, usta caꞌaj cuiꞌ quixnau chirix li cubi haꞌ li quixba̱nu laj Juan. 26Qui-oc chi a̱tinac chi cau xchꞌo̱l saꞌ li cab li nequeꞌxchꞌutub cuiꞌ ribeb laj judío. Nak queꞌrabi lix Priscila ut laj Aquila li yo̱ chixyebal, queꞌrisi xjunes laj Apolos ut queꞌxchꞌolob lix ya̱lal chi tzꞌakal chiru. 27Nak ac yo̱ xcꞌoxlanquil xic laj Apolos aran Acaya, eb laj pa̱banel queꞌxqꞌue xcacuil xchꞌo̱l re ta̱xic. Ut queꞌxtzꞌi̱ba jun li hu ut queꞌxtakla reheb laj pa̱banel li cuanqueb aran. Queꞌxye reheb nak teꞌxcꞌul chi sa saꞌ xchꞌo̱l. Ut nak quicuulac aran, laj Apolos quixtenkꞌaheb chi cha̱bil li ac xeꞌpa̱ban xban rusilal li Dios. 28Ut quira̱tinaheb laj judío chi cau xchꞌo̱l chiruheb chixjunileb li tenamit. Ut quixchꞌolob xya̱lal chiruheb chi tzꞌakal nak li Jesús, aꞌan li Cristo, joꞌ tzꞌi̱banbil saꞌ li Santil Hu.

Li Santil hu

© 2000, Wycliffe Bible Translators, Inc. All rights reserved. More Info | Version Index