Search form

Hechos 24

Laj Pablo quia̱tinac re xcolbal rib chiru laj Félix

1Nak ac xnumeꞌ chic o̱b cutan, quicuulac Cesarea laj Ananías li xyucuaꞌil aj tij. Cuanqueb rochben cuib oxib li nequeꞌcꞌamoc be saꞌ xya̱nkeb laj judío, ut cuan jun naa̱tinac chirixeb, aj Tértulo xcꞌabaꞌ. Queꞌcuulac riqꞌuin li acuabej chixjitbal laj Pablo. 2Nak quicꞌameꞌ laj Pablo, laj Tértulo qui-oc chixjitbal laj Pablo chiru laj Félix li acuabej ut quixye: —Ka̱cuaꞌ Félix, saꞌ a̱cꞌabaꞌ la̱at cuanco saꞌ tuktu̱quil usilal. Xban nak cha̱bil nacattaklan saꞌ kabe̱n, joꞌcan nak yo̱co chi usa̱c saꞌ li katenamit. 3Riqꞌuin aꞌin nasahoꞌ kachꞌo̱l chikajunilo yalak bar saꞌ li naꞌajej aꞌin. Ut nakabantioxi cha̱cuu, at acuabej Félix. 4Nintzꞌa̱ma cha̱cuu nak ta̱ba̱nu usilal ke. Ta̱cuabi taxak li oc ke chixtzꞌa̱manquil cha̱cuu. Junpa̱t ajcuiꞌ tatkachꞌiꞌchꞌiꞌi. 5La̱o xkaqꞌue retal nak li cui̱nk aꞌin kꞌaxal yibru xnaꞌleb. Naxtiquib ra xi̱cꞌ saꞌ xya̱nkeb chixjunileb laj judío saꞌ chixjunil li ruchichꞌochꞌ. Ut aꞌan najolomin re li jun chꞌu̱tal aj Nazareno nequeꞌxye re. 6Quiraj raj xmuxbal ru li katemplo. Joꞌcan nak xkachap, ut quikaj raj xrakbal a̱tin saꞌ xbe̱n joꞌ naxye li kachakꞌrab. 7Abanan laj Lisias li coronel qui-oquen chirix ut saꞌ joskꞌil quixmakꞌ chiku. 8Aꞌan quixye nak laj jitol re tento teꞌcha̱lk a̱cuiqꞌuin. Ta̱ru̱k ajcuiꞌ ta̱patzꞌ re aꞌan re ta̱nau chi tzꞌakal li cꞌaꞌru yo̱co chixjitbal cuiꞌ, chan. 9Ut eb laj judío li queꞌcuulac rochben, queꞌxye nak ya̱l li yo̱ chixyebal laj Tértulo. 10Ut li acuabej quixbok laj Pablo ut quixye re nak ta̱a̱tinak. Ut laj Pablo quixye: —La̱in ninnau nak nabal chihab a̱cuoquic chokꞌ aj rakol a̱tin saꞌ li tenamit aꞌin. Joꞌcan nak chi ma̱cꞌaꞌ incꞌaꞌux tinye li cꞌaꞌru tincol cuiꞌ cuib. 11La̱at naru tattzꞌilok a̱tin chirix li tinye. Cablaju cutan anakcuan incꞌulunic chi tijoc aran Jerusalén. 12La̱in incꞌaꞌ yo̱quin chixyoꞌobanquil ra xi̱cꞌ saꞌ xya̱nkeb li tenamit. Ma̱ ani nintacchiꞌi, chi moco saꞌ li templo, chi moco saꞌ li cab li nequeꞌxchꞌutub cuiꞌ ribeb laj judío, chi moco saꞌ li tenamit. 13Ut eb laj jitol cue incꞌaꞌ naru nequeꞌxye nak ya̱l li cꞌaꞌru yo̱queb chixyebal xban nak ma̱cꞌaꞌ junak retalil naru naxcꞌut nak ya̱l. 14La̱in tinye xya̱lal a̱cue. Ninlokꞌoni li Dios li queꞌxlokꞌoni chak li kaxeꞌto̱nil yucuaꞌ. Ninpa̱b li evangelio li nequeꞌxye nak moco ya̱l ta. Ninpa̱b chixjunil li tzꞌi̱banbil saꞌ li chakꞌrab li quiqꞌueheꞌ re laj Moisés, joꞌ ajcuiꞌ li queꞌxtzꞌi̱ba li profetas. 15La̱in cau inchꞌo̱l chixpa̱banquil li Dios joꞌ nequeꞌxba̱nu li yo̱queb chi jitoc cue. La̱in ninpa̱b ajcuiꞌ nak teꞌcuacli̱k cuiꞌchic chi yoꞌyo li camenak, joꞌ li ti̱queb xchꞌo̱l joꞌ ajcuiꞌ li incꞌaꞌ ti̱queb xchꞌo̱l. 16Joꞌcan nak ninqꞌue inchꞌo̱l chixba̱nunquil li us re nak ma̱cꞌaꞌak inma̱c chiru li Dios chi moco chiruheb li cuas cui̱tzꞌin. 17Qꞌuila chihab ma̱ anihin saꞌ lin tenamit Jerusalén. Joꞌcan nak xinsukꞌi chi mayejac chiru li Dios ut re xqꞌuebal caꞌchꞌinak lix tenkꞌanquileb li nebaꞌ li cuanqueb aran. 18Aꞌan aꞌin li yo̱quin chixba̱nunquil nak quineꞌxtau saꞌ li templo laj judío li queꞌchal chak Asia. Tojeꞌ xinrakeꞌ xba̱nunquil li cꞌaꞌru quinyechiꞌi chiru li Dios. Ac xinba̱nu li naba̱numan re xsantobresinquil cuib. Moco nocotububnac ta chi moco yo̱co ta chi yoꞌoba̱nc chꞌaꞌajquilal. 19Eb laj judío li queꞌchal chak Asia, aꞌaneb raj li xeꞌchal arin chinjitbal cha̱cuu cui cuan ta cꞌaꞌru tineꞌxjit cuiꞌ. 20Xyehakeb anakcuan cha̱cuu li nequeꞌtaklan saꞌ xbe̱neb laj judío li cuanqueb arin cui cuan cꞌaꞌru incꞌaꞌ us xinba̱nu nak quineꞌxcꞌam chiruheb laj rakol a̱tin. 21Caꞌaj cuiꞌ aꞌin lin ma̱c chiruheb: Nak xakxo̱quin chiruheb, quinye chi cau xya̱b incux nak teꞌcuacli̱k cuiꞌchic chi yoꞌyo li camenak. Saꞌ xcꞌabaꞌ aꞌan nak oc e̱re chixrakbal a̱tin saꞌ inbe̱n, chanquin reheb, chan laj Pablo. 22Laj Félix ac rabiom resil li pa̱ba̱l aꞌan. Yal re xbaybaleb nak quixye: —Cꞌulu̱nk cuan laj Lisias ut tinchoy xtzꞌilbal rix li yo̱quex chixyebal, chan. 23Ut quixtakla cuiꞌchic laj Pablo saꞌ li naꞌajej li tzꞌaptzꞌo cuiꞌ xbaneb. Ut quixtakla ajcuiꞌ xyebal re li capitán nak tixqꞌue xlese̱ns chira̱tinanquileb lix comon li joꞌ qꞌuial teꞌraj cha̱lc chirulaꞌaninquil ut chixqꞌuebal cꞌaꞌru re. 24Incꞌaꞌ chic qꞌuila cutan chirix aꞌin nak quicuulac cuiꞌchic laj Félix rochben lix Drusila li rixakil. Li ixk aꞌan aj judío. Laj Félix quixbok laj Pablo riqꞌuin re nak tixchꞌolob chiru chanru xpa̱banquil li Ka̱cuaꞌ Jesucristo. 25Ut nak laj Pablo yo̱ chixchꞌolobanquil lix ya̱lal li ti̱quilal, li cuyuc ib, ut li rakba a̱tin cha̱lel, quichal xxiu laj Félix. Quixye re laj Pablo. —Anakcuan ayu. Nak tixqꞌue rib chicuu tintakla cuiꞌchic a̱bokbal, chan. 26Saꞌ xchꞌo̱l laj Félix nak ta̱tumina̱k ru xban laj Pablo re ta̱isi̱k saꞌ tzꞌalam. Joꞌcan nak nabal sut quixtakla xbokbal ut quia̱tinac riqꞌuin. 27Xban nak quiraj nak us ta̱cana̱k riqꞌuineb laj judío, joꞌcan nak quixcanab chi pre̱xil laj Pablo. Nak ac xnumeꞌ cuib chihab, laj Félix qui-el chokꞌ acuabej ut qui-oc laj Porcio Festo chokꞌ re̱kaj.

Li Santil hu

© 2000, Wycliffe Bible Translators, Inc. All rights reserved. More Info | Version Index