Search form

San Lucas 11

Li Jesús quixcꞌut li tijoc chiruheb lix tzolom

1Saꞌ jun li cutan yo̱ chi tijoc li Jesús. Ut nak quirakeꞌ chi tijoc, jun reheb lix tzolom quixye re: —Ka̱cuaꞌ, cꞌut chiku li tijoc joꞌ nak laj Juan quixcꞌut li tijoc chiruheb lix tzolom, chan. 2Ut li Ka̱cuaꞌ quixye reheb: —Nak textijok, te̱ye chi joꞌcaꞌin:

Ka̱cuaꞌ, cuancat saꞌ li santil choxa, lokꞌoninbil taxak la̱ santil cꞌabaꞌ. Chicha̱lk ta la̱ nimajcual cuanquilal. Chi-uxk ta li nacacuaj joꞌ saꞌ choxa, joꞌ ta ajcuiꞌ saꞌ ruchichꞌochꞌ.

3Chaqꞌue taxak ke li kacua kucꞌa chi cuulaj cuulaj.

4Ut chacuy chasach ta li kama̱c joꞌ nak nakacuyeb xma̱c li nequeꞌma̱cob chiku. Ut moa̱qꞌue chi a̱le̱c. Choa̱col ban chiru li incꞌaꞌ us.

5Ut quixye ajcuiꞌ reheb li Jesús: —Kayehak nak la̱ex cuan ta junak le̱ rami̱g. Ut texxic raj riqꞌuin tuktu kꞌojyi̱n ut te̱ye raj re, “At cuami̱g, ma̱re ta̱toꞌoni oxibak incua. 6Jun li cuami̱g xchal chak chi najt ut xcꞌulun cuiqꞌuin saꞌ cab. Ut ma̱cꞌaꞌ cuan cue re tinqꞌue re.” 7Ut li jun li cuan chak saꞌ cab ta̱chakꞌok chak ut tixye, “Mina̱chꞌiꞌchꞌiꞌi. Tzꞌaptzꞌo chic li cab. La̱in ut eb lin cocꞌal yo̱co chi hila̱nc. Incꞌaꞌ naru nincuacli chixqꞌuebal a̱cue li cꞌaꞌru ta̱cuaj.” 8Moco xban ta nak rami̱g nak ta̱cuacli̱k chixqꞌuebal re li cꞌaꞌru ta̱raj ru. Tixqꞌue ban re xban nak yo̱k chixpatzꞌbal ut re nak tixcanab xchꞌiꞌchꞌiꞌinquil. 9Joꞌcan ut nak ninye e̱re: —Nak ta̱paltok cꞌaꞌru e̱re, chextzꞌa̱ma̱nk chiru li Dios ut aꞌan tixqꞌue e̱re. Chesicꞌak ut te̱tau, chebokak ut li puerta ta̱tehekꞌ che̱ru. 10Cheba̱nu aꞌan xban nak li ani natzꞌa̱man chiru li Dios naqꞌueheꞌ re. Ut li ani naxsicꞌ, naxtau. Ut li ani nabokoc, li puerta nateheꞌ chiru. 11¿Ma cuan ta biꞌ junak yucuaꞌbej saꞌ e̱ya̱nk tixqꞌue junak pec re li ralal nak tixpatzꞌ xcua re? Ut nak tixpatzꞌ junak xcar re, ¿ma cꞌantiꞌ ta biꞌ tixqꞌue re? 12Ut nak tixpatzꞌ junak xmol, ¿ma aj xo̱cꞌ ta biꞌ tixqꞌue re? 13Cui la̱ex li moco cha̱bilex ta nequenau xqꞌuebal li cꞌaꞌru cha̱bil re le̱ ralal e̱cꞌajol, ¿ma tojaꞌ ta chic le̱ yucuaꞌ cuan saꞌ choxa incꞌaꞌ tixqꞌue li Santil Musikꞌej re li ani tixtzꞌa̱ma chiru? chan li Jesús reheb.

Kꞌaxal nim xcuanquil li Jesús chiru xcuanquil laj tza

14Li Jesús quirisi jun li ma̱us aj musikꞌej riqꞌuin jun li cui̱nk mem. Nak qui-el li ma̱us aj musikꞌej riqꞌuin, naa̱tinac chic li cui̱nk. Ut chixjunileb li cuanqueb aran queꞌsach xchꞌo̱l xban li cꞌaꞌru quicꞌulman. 15Abanan cuanqueb ajcuiꞌ li queꞌyehoc re: —Li cui̱nk aꞌin na-isin ma̱us aj musikꞌej riqꞌuin xcuanquil laj Beelzebú lix yucuaꞌileb li ma̱us aj musikꞌej, chanqueb. 16Ut cuanqueb ajcuiꞌ li queꞌxtzꞌa̱ma chiru li Jesús nak tixba̱nu junak li milagro yal re xyalbal rix. 17Li Jesús quixnau li cꞌaꞌru yo̱queb chixcꞌoxlanquil ut quixye reheb: —Cui cuan jun te̱pak chi tenamit xicꞌ teꞌril rib chi ribileb rib, li jun te̱p chi tenamit aꞌan tixsach xcuanquil xjunes rib. Ut cui cuan ta jun cabalak xicꞌ teꞌril rib chi ribileb rib, li jun cabal aꞌan teꞌxsach xcuanquil lix jun cablaleb. 18Joꞌcan ajcuiꞌ laj tza. Cui xicꞌ nequeꞌril rib chi ribileb rib, ¿chan ta cuiꞌ ru nak xakxo̱k lix cuanquilal? La̱ex nequeye nak riqꞌuin xcuanquil laj tza nacuisi li ma̱us aj musikꞌej. 19Cui la̱in yo̱quin chirisinquil ma̱us aj musikꞌej riqꞌuin xcuanquil laj tza, ¿ani aj cuanquil nequeꞌisin cuiꞌ ma̱us aj musikꞌej li nequeꞌta̱ken e̱re la̱ex? Joꞌcan nak aꞌan eb ajcuiꞌ teꞌyehok re nak incꞌaꞌ ya̱l li yo̱quex chixyebal. 20Cui ut riqꞌuin xcuanquil li Dios nacuisiheb li ma̱us aj musikꞌej, riqꞌuin aꞌan nacꞌutun nak relic chi ya̱l ac xcꞌulun saꞌ e̱ya̱nk lix nimajcual cuanquilal li Dios. 21Laj tza chanchan jun li cui̱nk cau rib ut cuan saꞌ rukꞌ lix chꞌi̱chꞌ re xcolbal rib. Yo̱k chixcꞌacꞌalenquil li rochoch. Ma̱cꞌaꞌ tixcꞌul li cꞌaꞌru re xban nak yo̱k chixcꞌacꞌalenquil. 22Abanan cui ta̱cha̱lk junak kꞌaxal cau rib chiru aꞌan, aꞌan chic ta̱numta̱k saꞌ xbe̱n ut ta̱makꞌekꞌ chiru lix chꞌi̱chꞌ li cau cuiꞌ xchꞌo̱l ut ta̱jeqꞌui̱k li cꞌaꞌru re. 23Li ani incꞌaꞌ na-oquen chicuix, aꞌan xicꞌ ninril. Ut ani incꞌaꞌ natenkꞌan cue, narisi xcuanquil li cꞌaꞌru ninba̱nu la̱in, chan li Jesús.

Laj tza ta̱sukꞌi̱k cuiꞌchic riqꞌuin li ani incꞌaꞌ tixkꞌaxtesi rib chi tzꞌakal chiru li Cristo

24Nak ac x-el riqꞌuin junak cui̱nk, li ma̱us aj musikꞌej naxic saꞌ li naꞌajej bar ma̱cꞌaꞌ cuan chixsicꞌbal bar ta̱oc chi hila̱nc. Naril nak incꞌaꞌ naxtau xnaꞌaj. Naxye: —La̱in tinsukꞌi̱k cuiꞌchic riqꞌuin li cui̱nk bar xin-el cuiꞌ chak, chan. 25Ut nak nacuulac riqꞌuin naxtau li cui̱nk chanchan jun li cab ma̱cꞌaꞌ chic cuan chi saꞌ. Mesunbil ut ac cauresinbil roybeninquil li ani ta̱oc chi saꞌ. 26Ut li ma̱us aj musikꞌej naxsicꞌ cuukub chic chi ma̱us aj musikꞌej kꞌaxal cuiꞌchic numtajenak xma̱usilaleb chiru aꞌan. Nequeꞌoc chi cua̱nc riqꞌuin li cui̱nk. Ut lix naꞌleb li cui̱nk aꞌan numtajenak chic xyibal ru chiru nak quicuan junxil. 27Ut nak yo̱ chixyebal eb li a̱tin aꞌin li Jesús, jun li ixk quia̱tinac chak chi cau saꞌ xya̱nkeb li qꞌuila tenamit, ut quixye: —Us xak re li ixk li x-alan a̱cue ut xtuꞌresin a̱cue, chan. 28Li Jesús quichakꞌoc ut quixye: —Kꞌaxal cuiꞌchic us chokꞌ reheb li nequeꞌabin re li ra̱tin li Dios ut nequeꞌxba̱nu li cꞌaꞌru naxye.

Li tenamit queꞌraj nak ta̱cꞌutbesi̱k junak milagro chiruheb

29Nak yo̱queb chi chꞌutla̱c li qꞌuila tenamit riqꞌuin, li Jesús quixye reheb: —Li cristian li cuanqueb saꞌ eb li cutan aꞌin incꞌaꞌ useb xnaꞌleb. Teꞌraj ta̱cꞌutbesi̱k junak milagro chiruheb. Abanan ma̱ jun milagro ta̱cꞌutbesi̱k chiruheb. Caꞌaj cuiꞌ li milagro li qui-ux re laj Jonás, li quicꞌutbesi̱c chiruheb junxil. 30Li milagro li quixcꞌul laj Jonás nak quicoleꞌ, aꞌan retalil chiruheb li tenamit Nínive nak aꞌan taklanbil xban li Dios. Joꞌcan ajcuiꞌ la̱in li Cꞌajolbej. Li milagro li tincꞌul la̱in, aꞌan jun retalil chiruheb li tenamit saꞌ eb li cutan aꞌin nak la̱in taklanbilin xban li Dios, chan. 31Li ixk li quicuan chokꞌ reina saꞌ li tenamit li cuan saꞌ li sur, ta̱cuacli̱k chak saꞌ xkꞌehil nak ta̱rakekꞌ a̱tin saꞌ e̱be̱n ut tixye nak cuan e̱ma̱c xban nak incꞌaꞌ xerabi li cua̱tin. Aꞌan quichal chak toj saꞌ xmaril li ruchichꞌochꞌ chirabinquil li cꞌaꞌru quixye laj Salomón xban nak cuan xnaꞌleb. Ut la̱in kꞌaxal cuiꞌchic innaꞌleb chiru laj Salomón ut cuanquin arin saꞌ e̱ya̱nk. Abanan incꞌaꞌ nequepa̱b li cua̱tin. 32Ut teꞌcuacli̱k ajcuiꞌ eb li queꞌcuan saꞌ li tenamit Nínive saꞌ xkꞌehil nak ta̱rakekꞌ a̱tin saꞌ e̱be̱n la̱ex li cuanquex saꞌ eb li cutan aꞌin. Ut teꞌxye nak cuan e̱ma̱c xban nak eb aꞌan queꞌyotꞌeꞌ xchꞌo̱l queꞌxjal xcꞌaꞌux ut queꞌpa̱ban nak quicuulac laj Jonás chixyebal ra̱tin li Dios reheb. Ut la̱in cuanquin arin saꞌ e̱ya̱nk ut kꞌaxal nim incuanquil chiru xcuanquil laj Jonás ut la̱ex incꞌaꞌ nayotꞌeꞌ e̱chꞌo̱l incꞌaꞌ nequejal e̱cꞌaꞌux, chan li Jesús.

Li Cristo aꞌan li kacutan saken

33Ma̱ ani tixloch junak candil ut tixqꞌue ta chi mukmu malaj ut tixqꞌue rubel chacach. Naxqꞌue ban saꞌ junak naꞌajej najt xteram re nak cua̱nkeb saꞌ cutan li ani teꞌoc saꞌ li cab. 34Li xnakꞌ e̱ru chanchan jun li lámpara. Xban nak na-iloc li xnakꞌ e̱ru cuanquex saꞌ cutan. Cui ta ma̱cꞌaꞌ li xnakꞌ e̱ru cuanquex raj saꞌ kꞌojyi̱n. 35Cui incꞌaꞌ us li kanaꞌleb, cuanco saꞌ kꞌojyi̱n. Chanchano jun li mutzꞌ li incꞌaꞌ na-iloc. Cheba̱nu cue̱nt re nak junelic cua̱nkex saꞌ cutan saken. 36Joꞌcan ut cui cuanquex saꞌ cutan saken, moco cuanquex ta chic saꞌ kꞌojyi̱n. Cha̱bilak ban chic le̱ naꞌleb. Xban nak cha̱bil le̱ naꞌleb, chanchanakex chic jun li xam li nacutanobresin, chan.

Li Jesús quixkꞌuseb laj fariseo ut eb laj tzolol chakꞌrab

37Ut nak li Jesús quirakeꞌ chi a̱tinac riqꞌuineb, jun reheb laj fariseo quixbok li Jesús chi cuaꞌac saꞌ rochoch. Qui-oc li Jesús saꞌ rochoch laj fariseo ut quichunla chi cuaꞌac saꞌ me̱x. 38Laj fariseo quisach xchꞌo̱l chirilbal nak li Jesús incꞌaꞌ quichꞌajoc joꞌ cꞌaynakeb xba̱nunquil eb laj judío. 39Li Jesús quixye re: —La̱ex aj fariseo nequechꞌaj li rix le̱ secꞌ ut le̱ plato; abanan tzꞌaj lix saꞌ. La̱ex chanchanex li secꞌ li tzꞌaj xsaꞌ xban nak numtajenak le̱ ma̱usilal ut li elkꞌac nequeba̱nu. 40La̱ex ma̱cꞌaꞌ e̱naꞌleb. ¿Ma incꞌaꞌ nequenau nak li ani quiyoꞌobtesin re li rix, aꞌan ajcuiꞌ li quiyoꞌobtesin re lix saꞌ? 41Me̱rahi ru li cꞌaꞌru re jalan. Chesihak ban li cꞌaꞌru cuan e̱re reheb li nebaꞌ. Cui te̱ba̱nu chi joꞌcan cha̱bilakex chic chiru li Dios, chan. 42Ra cha̱lel saꞌ e̱be̱n la̱ex aj fariseo. Nequemayeja li junju̱nk saꞌ xlaje̱tkil li isquiꞌij, li ruda ut li cꞌaꞌak re ru chi ichajil li natiꞌeꞌ. Abanan incꞌaꞌ nequera li Dios ut incꞌaꞌ nequeba̱nu li ti̱quilal. Us xqꞌuebal li junju̱nk saꞌ xlaje̱tkil, abanan kꞌaxal cuiꞌchic tento xra̱bal li Dios ut xba̱nunquil li ti̱quilal. 43Ra cha̱lel saꞌ e̱be̱n la̱ex aj fariseo li nacuulac che̱ru cꞌojla̱c saꞌ li naꞌajej kꞌaxal lokꞌ nak nequexxic saꞌ li cab li nequechꞌutub cuiꞌ e̱rib. Ut nacuulac che̱ru nak ta̱qꞌuehekꞌ e̱lokꞌal saꞌ eb li be. 44Ra cha̱lel saꞌ e̱be̱n la̱ex aj tzolol chakꞌrab ut la̱ex aj fariseo xban nak incꞌaꞌ us le̱ naꞌleb. La̱ex aj caꞌ pacꞌal u. Chanchanex li mukleba̱l li incꞌaꞌ nacꞌutun. Yalak ani nanumeꞌ saꞌ xbe̱n xban nak incꞌaꞌ nequeꞌxnau cꞌaꞌru cuan aran, chan. 45Quichakꞌoc jun reheb laj tzolol chakꞌrab ut quixye re li Jesús: —At tzolonel, riqꞌuin li cꞌaꞌru yo̱cat chixyebal, yo̱cat chixcꞌutbal kaxuta̱n la̱o.— 46Ut li Jesús quixye: —Ra ajcuiꞌ cha̱lel saꞌ e̱be̱n la̱ex aj tzolol chakꞌrab. Kꞌaxal a̱l li i̱k nequeqꞌue saꞌ xbe̱neb li cristian ut kꞌaxal chꞌaꞌaj xcꞌambal. La̱ex nequeye nak tento teꞌxba̱nu chixjunil li naxye li chakꞌrab. Abanan chi moco la̱ex nequexru xba̱nunquil. 47Ra cha̱lel saꞌ e̱be̱n la̱ex aj tzolol chakꞌrab xban nak la̱ex aj caꞌ pacꞌal u. Nequerutzꞌuꞌuji chak ru li queꞌmukeꞌ cuiꞌ li profetas li queꞌxcamsi le̱ xeꞌto̱nil yucuaꞌ. 48Riqꞌuin li ma̱usilal nequeba̱nu nacꞌutun nak juntakꞌe̱tex riqꞌuineb le̱ xeꞌto̱nil yucuaꞌ. Eb aꞌan queꞌcamsin reheb li profeta ut la̱ex nequeyi̱b lix mukleba̱leb. 49Li Dios, aꞌan cuan xnaꞌleb. Joꞌcan nak quixye, “La̱in tintaklaheb li profeta ut eb li apóstol riqꞌuineb. Saꞌ xya̱nkeb aꞌan cuan te̱camsiheb, ut cuan ajcuiꞌ te̱ta̱keheb re xchapbaleb.” 50Ut anakcuan la̱ex chic textojok rix lix camiqueb chixjunileb li profeta chalen chak saꞌ xticlajic li ruchichꞌochꞌ. 51Ya̱l nak la̱ex textojok rix lix camiqueb aꞌan. Ta̱ticla̱k riqꞌuin lix camic laj Abel ut toj riqꞌuin lix camic laj Zacarías li quicamsi̱c chiru neba̱l chixcꞌatk li templo ut li artal. 52Ra cha̱lel saꞌ e̱be̱n la̱ex, aj tzolol chakꞌrab, xban nak nequemuk lix ya̱lal chiruheb li tenamit. La̱ex incꞌaꞌ nequepa̱b li Dios, chi moco nequecanabeb chi pa̱ba̱nc li nequeꞌraj raj pa̱ba̱nc, chan li Jesús reheb. 53Ut nak quirakeꞌ chixyebal eb li a̱tin aꞌin, cꞌajoꞌ nak queꞌjoskꞌoꞌ eb laj tzolol chakꞌrab ut eb laj fariseo. Queꞌoc chixchꞌiꞌchꞌiꞌinquil ut nabal li cꞌaꞌak re ru yo̱queb chixpatzꞌbal re. 54Yo̱queb chi patzꞌoc re li Jesús yal re rilbal ma tixye junak a̱tin incꞌaꞌ us re nak ta̱ru̱k teꞌxjit.

Li Santil hu

© 2000, Wycliffe Bible Translators, Inc. All rights reserved. More Info | Version Index