Search form

San Lucas 24

Li Jesús quicuacli cuiꞌchic chi yoꞌyo saꞌ xya̱nkeb li camenak

1Saꞌ li xbe̱n li cutan re li xama̱n, toj ekꞌela chi us, co̱eb li ixk cuan cuiꞌ li mukleba̱l. Queꞌxcꞌam li sununquil ban li queꞌxyi̱b. Ut cuanqueb jalaneb chic ixk rochbeneb. 2Nak queꞌcuulac, queꞌril nak ac isinbil chic li nimla pec li natzꞌapoc re li mukleba̱l. 3Ut nak queꞌoc chi saꞌ li mukleba̱l, incꞌaꞌ queꞌxtau li camenak. 4Queꞌsach xchꞌo̱leb ut incꞌaꞌ queꞌxnau cꞌaꞌru teꞌxba̱nu. Ut xaka̱mil chiruheb cuib li cui̱nk. Nalemtzꞌun li rakꞌeb. 5Cꞌajoꞌ nak queꞌxucuac li ixk. Queꞌxxulub li riloba̱l. Ut eb li cui̱nk queꞌxye reheb: —¿Cꞌaꞌut nak nequesicꞌ li yoꞌyo saꞌ xya̱nkeb li camenak? 6Aꞌan ma̱ ani chic arin. Ac xcuacli cuiꞌchic chi yoꞌyo. Chijulticokꞌ e̱re li cꞌaꞌru quixye chak nak toj cua̱nk chak Galilea. 7Quixye nak tento ta̱kꞌaxtesi̱k li Cꞌajolbej saꞌ rukꞌeb li cui̱nk aj ma̱c. Ta̱qꞌuehekꞌ chiru cruz ut ta̱camsi̱k. Ut quixye ajcuiꞌ nak ta̱cuacli̱k cuiꞌchic chi yoꞌyo saꞌ xya̱nkeb li camenak saꞌ rox li cutan, chanqueb. 8Riqꞌuin aꞌan quinak saꞌ xchꞌo̱leb li ixk li cꞌaꞌru quixye li Jesús. 9Queꞌel saꞌ li mukleba̱l ut co̱eb. Coleꞌxye resil chixjunil li cꞌaꞌak re ru aꞌin reheb li junlaju ut reheb ajcuiꞌ li jun chꞌol chic. 10Eb li ixk li queꞌyehoc re li esilal aꞌin reheb li apóstol, aꞌan eb lix María Magdala xtenamit, lix Juana ut lix María lix naꞌ laj Jacobo rochbeneb li jun chꞌol chic li ixk. 11Abanan eb li junlaju chi apóstol incꞌaꞌ queꞌxpa̱b li cꞌaꞌru queꞌxye li ixk. Saꞌ xchꞌo̱leb aꞌan nak moco ya̱l ta li yo̱queb chixyebal. 12Abanan laj Pedro co̱ saꞌ a̱nil saꞌ li mukleba̱l. Qui-iloc chi saꞌ ut quiril nak caꞌaj chic li tꞌicr lino cuan aran. Joꞌcan nak sachso xchꞌo̱l chi cꞌoxlac nak quisukꞌi saꞌ rochoch.

Li Jesús quixcꞌutbesi rib chiruheb li cui̱nk nak yo̱queb chi xic Emaús

13Saꞌ ajcuiꞌ li cutan aꞌan, cuibeb lix tzolom li Jesús yo̱queb chi xic saꞌ li chꞌina tenamit Emaús. Li tenamit aꞌan junlaju kilómetro na xnajtil riqꞌuin Jerusalén. 14Yo̱queb chi a̱tinac chi rilbileb rib chirix chixjunil li cꞌaꞌak re ru quicꞌulman saꞌ eb li cutan aꞌan. 15Nak yo̱queb chi a̱tinac ut chixtzꞌilbal rix chi ribileb rib li cꞌaꞌru quicꞌulman, li Jesús quijiloc riqꞌuineb ut qui-oc chi be̱c rochbeneb. 16Usta queꞌril ru, abanan incꞌaꞌ queꞌxnau nak aꞌan li Jesús xban nak cuan cꞌaꞌru quiramoc re chiruheb. 17Ut li Jesús quixye reheb: —¿Cꞌaꞌru chi aj ix yo̱quex chi serakꞌic chi ribil e̱rib nak yo̱quex chi be̱c? ¿Cꞌaꞌut nak ra saꞌ e̱chꞌo̱l? chan reheb. 18Jun reheb aꞌan, aj Cleofas xcꞌabaꞌ, quichakꞌoc ut quixye: —Joꞌ li caꞌaj cuiꞌ la̱at li yo̱cat chi numecꞌ saꞌ li tenamit Jerusalén li incꞌaꞌ nacatnaꞌoc re li cꞌaꞌru xcꞌulman saꞌ eb li cutan aꞌin, chan. 19Ut li Jesús quixye reheb: —¿Cꞌaꞌru anchal aꞌan? chan. Eb aꞌan queꞌxye re: —Chirix li Jesús aj Nazaret. Aꞌan profeta nak quicuan. Nim xcuanquil. Cha̱bil quixba̱nu ut cha̱bil quixye chiru li Dios ut chiruheb li tenamit. 20Eb li xbe̱nil aj tij ut eb li nequeꞌtaklan saꞌ kabe̱n queꞌxkꞌaxtesi chi camsi̱c ut queꞌxqꞌue chiru cruz. 21Aꞌan raj li ta̱colok re li katenamit Israel saꞌ kachꞌo̱l. Abanan anakcuan ac oxib cutan xcꞌulbal aꞌan. 22Xsach kachꞌo̱l chirabinquil li cꞌaꞌru xeꞌxye ke li ixk li xeꞌcuulac saꞌ li mukleba̱l toj ekꞌela. 23Xban nak incꞌaꞌ xeꞌxtau li camenak, xeꞌsukꞌi saꞌ cab ut xeꞌxye ke nak cuib li ángel xeꞌxcꞌutbesi rib chiruheb ut xeꞌxye reheb nak yoꞌyo li Jesús. 24Ut cuanqueb ajcuiꞌ kacomon xeꞌcuulac chak saꞌ li mukleba̱l ut xeꞌril nak ya̱l li xeꞌxye li ixk. Abanan incꞌaꞌ xeꞌril ru li Jesús, chan laj Cleofas. 25Ut li Jesús quixye reheb: —¡La̱ex ma̱cꞌaꞌ e̱naꞌleb ut a̱l le̱ chꞌo̱l chixpa̱banquil chixjunil li cꞌaꞌru queꞌxye chak li profeta! 26¿Ma incꞌaꞌ ta biꞌ tento nak tixcꞌul chixjunil li raylal aꞌin li Cristo laj Colonel li yechiꞌinbil xban li Dios re nak ta̱qꞌuehekꞌ xlokꞌal? chan reheb. 27Ut quixchꞌolob xya̱lal chiruheb chirix li cꞌaꞌru quixtzꞌi̱ba laj Moisés. Quixchꞌolob ajcuiꞌ lix ya̱lal li queꞌxtzꞌi̱ba chak li profeta chirix li Cristo li yechiꞌinbil xban li Dios joꞌ tzꞌi̱banbil saꞌ li Santil Hu. 28Queꞌcuulac saꞌ li chꞌina tenamit li yo̱queb cuiꞌ chi xic. Ut li Jesús quixba̱nu rib nak ti̱c ta̱xic. 29Abanan eb aꞌan queꞌrelaji ru re ta̱cana̱k riqꞌuineb. Queꞌxye re: —Cana̱kat kiqꞌuin xban nak yo̱ chi ecuu̱c. Oc re li kꞌojyi̱n, chanqueb re. Ut li Jesús qui-oc saꞌ cab ut quicana riqꞌuineb. 30Nak cꞌojcꞌo saꞌ me̱x rochbeneb, quixchap li caxlan cua, quixbantioxi chiru li Dios, quixjachi ut quixqꞌue reheb. 31Saꞌ li ho̱nal aꞌan queꞌxqꞌue retal nak aꞌan li Jesús. Ut nak ac xeꞌxnau nak aꞌan, nak queꞌril ac ma̱ ani chic saꞌ xya̱nkeb. 32Ut eb aꞌan queꞌxye chi ribileb rib: —Joꞌcan peꞌ nak yo̱co chak recꞌanquil jun sahil chꞌo̱lej saꞌ ka̱m nak yo̱ chak chika̱tinanquil saꞌ be ut nak yo̱ chixchꞌolobanquil chiku li naxye saꞌ li Santil Hu, chanqueb. 33Saꞌ ajcuiꞌ li ho̱nal aꞌan queꞌsukꞌi Jerusalén. Aran queꞌxtau li junlaju chi apóstol chꞌutchꞌu̱queb rochbeneb lix comon. 34Yo̱queb chixyebal: —Relic chi ya̱l nak xcuacli cuiꞌchic chi yoꞌyo li Ka̱cuaꞌ xban nak xcꞌutbesi rib chiru laj Simón, chanqueb. 35Tojoꞌnak li cuib chi cui̱nk queꞌxserakꞌi reheb li cꞌaꞌru quicꞌulman saꞌ be nak yo̱queb chi xic Emaús. Queꞌxye reheb chanru nak queꞌxnau ru li Jesús nak quixjachi li caxlan cua.

Li Jesús quixcꞌutbesi rib chiruheb lix tzolom

36Toj yo̱queb ajcuiꞌ xserakꞌinquil li cꞌaꞌru queꞌxcꞌul nak ac xaka̱mil li Jesús saꞌ xya̱nkeb ut quixye reheb: —¡Chicua̱nk taxak li tuktu̱quil usilal e̱riqꞌuin! chan reheb. 37Ut eb aꞌan sachso̱queb xchꞌo̱l queꞌcana ut teꞌxucuak. Saꞌ xchꞌo̱leb aꞌan nak ma̱re junak musikꞌej yo̱queb chirilbal. 38Ut li Jesús quixye reheb: —¿Cꞌaꞌut nak nequexxucuac? Ut, ¿cꞌaꞌut nak na-oc e̱cꞌaꞌux? 39La̱in li Jesús. Ilomak li cuok ut li cuukꞌ. Chꞌeꞌomakin re nak te̱qꞌue retal nak la̱in tzꞌakal. Junak musikꞌej, aꞌan ma̱cꞌaꞌ xbakel, chi moco cuan xtibel. Ilomak. La̱in cuan inbakel ut cuan intibel, chan reheb. 40Ut nak yo̱ chixyebal aꞌin, quixcꞌut li rok ut li rukꞌ chiruheb. 41Cꞌajoꞌ nak quisahoꞌ saꞌ xchꞌo̱leb. Abanan toj sachso̱queb xchꞌo̱l. Incꞌaꞌ queꞌxnau ma ya̱l li yo̱queb chirilbal malaj ut incꞌaꞌ. Ut li Jesús quixye reheb: —¿Ma cuan caꞌchꞌinak tzacae̱mk e̱riqꞌuin? chan reheb. 42Ut queꞌxqꞌue re jun jachal li pombil car ut caꞌchꞌin li xyaꞌal cab. 43Li Jesús quixcꞌul ut quixtzaca. 44Ut quixye reheb: —Li cꞌaꞌru xincꞌul, aꞌan ajcuiꞌ li quinserakꞌi chak e̱re nak toj cuanquin chak saꞌ e̱ya̱nk. Tento nak ta̱tzꞌaklok ru chixjunil li tzꞌi̱banbil chak retalil chicuix saꞌ lix chakꞌrab laj Moisés, joꞌ ajcuiꞌ saꞌ lix hu eb li profeta ut saꞌ ajcuiꞌ li Salmos, chan reheb. 45Ut quixqꞌueheb xnaꞌleb re nak teꞌxtau ru li tzꞌi̱banbil saꞌ li Santil Hu. 46Quixye reheb: —Joꞌcaꞌin tzꞌi̱banbil chak retalil saꞌ li Santil Hu chicuix la̱in: tento nak li Cristo tixcꞌul li raylal ut saꞌ rox li cutan ta̱cuacli̱k cuiꞌchic chi yoꞌyo saꞌ xya̱nkeb li camenak. 47Tzꞌi̱banbil ajcuiꞌ retalil nak ta̱julticama̱nk chiruheb chixjunileb li tenamit nak tento teꞌxyotꞌ xchꞌo̱leb ut teꞌxjal xcꞌaꞌuxeb re ta̱cuyma̱nk ta̱sachma̱nk lix ma̱queb saꞌ xcꞌabaꞌ aꞌan. Ta̱ticla̱k xchꞌolobanquil arin Jerusalén. 48La̱ex texyehok resil xban nak la̱ex xex-abin re ut la̱ex xex-iloc re chixjunil li cꞌaꞌak re ru aꞌin. 49Ut la̱in tintakla chak e̱re le̱ ma̱tan li quixyechiꞌi lin Yucuaꞌ. Abanan cana̱kex arin saꞌ li tenamit Jerusalén toj te̱cꞌul le̱ cuanquil li ta̱cha̱lk saꞌ choxa, chan li Jesús reheb.

Li Jesucristo quicꞌameꞌ cuiꞌchic saꞌ choxa xban li Dios

50Ut li Jesús quixcꞌameb toj saꞌ li tenamit Betania. Quixtaksi li rukꞌ ut quirosobtesiheb. 51Nak yo̱ chirosobtesinquileb, quirisi rib saꞌ xya̱nkeb ut quicꞌameꞌ takecꞌ saꞌ choxa. 52Nak ac xeꞌxlokꞌoni li Ka̱cuaꞌ, eb aꞌan queꞌsukꞌi cuiꞌchic Jerusalén chi cꞌajoꞌ xsahil saꞌ xchꞌo̱leb. 53Ut junelic cuanqueb saꞌ li templo. Yo̱queb chi bantioxi̱nc ut yo̱queb chixlokꞌoninquil li Dios. Joꞌcan taxak.

Li Santil hu

© 2000, Wycliffe Bible Translators, Inc. All rights reserved. More Info | Version Index