Search form

San Lucas 3

Laj Juan laj Cubsihom Haꞌ quixye resil lix cꞌulunic li Jesucristo

1Yo̱ oꞌlaju chihab roquic chokꞌ acuabej laj Tiberio César, nak cua̱nk laj Poncio Pilato chi takla̱nc saꞌ li tenamit Judea. Laj Herodes aꞌan cua̱nk chi takla̱nc saꞌ li tenamit Galilea. Ut laj Felipe li ri̱tzꞌin cua̱nk chi takla̱nc saꞌ li tenamit Iturea ut saꞌ li naꞌajej Traconite, ut laj Lisanias cua̱nk chi takla̱nc saꞌ li tenamit Abilinia. 2Ut cuanqueb chokꞌ xbe̱nil aj tij laj Anás ut laj Caifás. Saꞌ eb li cutan aꞌan laj Juan li ralal laj Zacarías quia̱tina̱c xban li Dios nak cuan chak saꞌ li chaki chꞌochꞌ. 3Laj Juan co̱ saꞌ li naꞌajej cuan cuiꞌ li nimaꞌ Jordán ut qui-oc chixchꞌolobanquil lix ya̱lal chiruheb li tenamit li cuanqueb aran. Quixye reheb nak tento teꞌyotꞌekꞌ xchꞌo̱l teꞌxjal xcꞌaꞌux ut teꞌxcꞌul li cubi haꞌ re nak li Dios tixcuy tixsach lix ma̱queb. 4Li profeta Isaías quia̱tinac chirix laj Juan nak quixye chi joꞌcaꞌin:

Aꞌan ta̱chꞌoloba̱nk xya̱lal chi cau xya̱b xcux saꞌ li chaki chꞌochꞌ ut tixye: Yi̱bomak le̱ yuꞌam ut yoꞌon cua̱nkex chixcꞌulbal li Ka̱cuaꞌ joꞌ nak nequeꞌxyi̱b li be re xcꞌulbal junak nim xcuanquil.

5Teꞌtꞌanekꞌ li tzu̱l ut eb li cocꞌ bol ut teꞌbutꞌekꞌ eb li takꞌa ruheb. Ta̱ti̱cobresi̱k li be re nak ti̱c ru ta̱cana̱k.

6Ut chixjunileb li cuanqueb saꞌ ruchichꞌochꞌ teꞌril ru laj Colonel li xtakla chak li Dios. (Isa. 40:3-5)

7Quiril nak nabaleb li yo̱queb chi cuulac yal re ta̱cubsi̱k xhaꞌeb. Joꞌcan nak quixye reheb: —La̱ex chanchanex li ral li cꞌambolay. ¿Ani xyehoc e̱re nak ta̱ru̱k te̱col e̱rib chiru lix joskꞌil li Dios li ta̱cha̱lk saꞌ e̱be̱n? 8Cheba̱nuhak ban li us re nak ta̱cꞌutu̱nk nak xyotꞌeꞌ e̱chꞌo̱l ut xejal e̱cꞌaꞌux. Chanchanakex li cheꞌ cha̱bil li ru naxqꞌue. Me̱cꞌoxla nak incꞌaꞌ te̱cꞌul xjoskꞌil li Dios yal xban nak la̱ex li ralal xcꞌajol laj Abraham. La̱in tinye e̱re nak li Dios ta̱ru̱k tixyoꞌobtesi li pec aꞌin chokꞌ ralal xcꞌajol laj Abraham. 9Qꞌuehomak retal xban nak cha̱lc re li rakba a̱tin saꞌ e̱be̱n joꞌ nak ac cauresinbil li ma̱l re xyocꞌbal lix xeꞌ li cheꞌ. Ut chixjunil li cheꞌ incꞌaꞌ cha̱bil li ru naxqꞌue, nayocꞌman ut naqꞌueman saꞌ xam, chan laj Juan. 10Ut eb li tenamit yo̱queb chixpatzꞌbal re: —¿Cꞌaꞌru tento takaba̱nu re nak incꞌaꞌ ta̱rakekꞌ a̱tin saꞌ kabe̱n? chanqueb. 11Quichakꞌoc laj Juan ut quixye reheb: —Li ani cuan cuibak sumal rakꞌ chixqꞌuehak jun sumalak re li ma̱cꞌaꞌ re. Ut li ani cuan xtzacae̱mk, chixqꞌuehak re li ma̱cꞌaꞌ re, chan. 12Cuanqueb ajcuiꞌ aj titzꞌol toj queꞌchal re teꞌcubsi̱k xhaꞌ xban laj Juan ut queꞌxye re: —¿Cꞌaꞌru takaba̱nu la̱o? chanqueb. 13Ut aꞌan quixye reheb: —Me̱patzꞌ xbe̱n li toj li ac yebil reheb nak teꞌxqꞌue, chan. 14Ut cuanqueb ajcuiꞌ soldado queꞌpatzꞌoc ut queꞌxye re: —Ut la̱o, ¿cꞌaꞌru takaba̱nu? chanqueb. Quixye reheb: —Ma̱ ani te̱makꞌ cꞌaꞌru re ut ma̱ ani te̱kꞌaba chi ma̱cꞌaꞌ rajbal. Chicꞌojla̱k ban e̱chꞌo̱l riqꞌuin li joꞌ qꞌuial nequextojeꞌ cuiꞌ, chan. 15Chixjunileb li tenamit yo̱queb chixcꞌoxlanquil ut queꞌxye saꞌ xchꞌo̱leb: —¿Ma ma̱cuaꞌ ta cuiꞌ aꞌan li Cristo, laj Colonel li yo̱co chiroybeninquil? chanqueb. 16Laj Juan quichakꞌoc ut quixye reheb chixjunileb: —Ya̱l nak la̱in nincubsin haꞌ riqꞌuin haꞌ. Abanan cha̱lc re li kꞌaxal nim xcuanquil. Xban nak kꞌaxal nim xcuanquil chicuu la̱in, moco incꞌulub ta nak tinhit xcꞌa̱mal lix xa̱b. Aꞌan tixcubsi e̱haꞌ riqꞌuin li Santil Musikꞌej ut riqꞌuin xam. 17Aꞌan chanchan jun aj acuinel ac cuan chak xcꞌanjeleba̱l saꞌ rukꞌ. Ta̱rapu chi us li ru li trigo ut tixxoc lix trigo saꞌ lix cꞌu̱leba̱l ut li rix tixcꞌat saꞌ li xam. Joꞌcan ajcuiꞌ nak li Dios ta̱risiheb li incꞌaꞌ nequeꞌpa̱ban saꞌ xya̱nkeb li ralal xcꞌajol ut tixtaklaheb saꞌ li xam li incꞌaꞌ nachup. Li ralal xcꞌajol ta̱cua̱nk xyuꞌameb chi junelic, chan laj Juan. 18Joꞌcan nak yo̱ chixchꞌolobanquil xnaꞌlebeb li tenamit. Naxsicꞌ chanru nak naxchꞌolob chi tzꞌakal li cha̱bil esilal chiruheb. 19Ut laj Herodes, li nataklan saꞌ li tenamit Galilea, quikꞌuseꞌ chi cau xban laj Juan xban nak quixcꞌam chokꞌ rixakil lix Herodías, li rixakil laj Felipe li ri̱tzꞌin. Ut quikꞌuseꞌ ajcuiꞌ riqꞌuin chixjunil li ma̱usilal naxba̱nu. 20Ut kꞌaxal cuiꞌchic numtajenak li ma̱usilal quixba̱nu nak quixqꞌue saꞌ tzꞌalam laj Juan.

Quicubsi̱c xhaꞌ li Jesús xban laj Juan laj Cubsihom Haꞌ

21Saꞌ jun li cutan nak toj ma̱jiꞌ quiqꞌueheꞌ saꞌ tzꞌalam laj Juan, yo̱ chixcubsinquil xhaꞌeb nabal li tenamit, ut quixcubsi ajcuiꞌ xhaꞌ li Jesús. Ut nak yo̱ chi tijoc li Jesús, quiril nak quiteli li choxa chiru. 22Li Santil Musikꞌej chanchan jun li paloma nak yo̱ chak chi cubec saꞌ xbe̱n li Jesús ut qui-abi̱c xya̱b xcux li Dios toj saꞌ choxa nak quixye: —La̱at li cualal raro̱cat inban. Nasahoꞌ inchꞌo̱l a̱cuiqꞌuin, chan.

Aꞌan eb aꞌin lix xeꞌto̱nil yucuaꞌ li Jesús

23Ac cuan tana laje̱b xcaꞌcꞌa̱l (30) chihab re li Jesús nak quixtiquib lix cꞌanjel. Chiruheb chixjunileb, li Jesús aꞌan ralal laj José, li ralal laj Elí. 24Ut laj Elí, aꞌan li ralal laj Matat. Laj Matat, aꞌan li ralal laj Leví. Ut laj Leví, aꞌan li ralal laj Melqui. Ut laj Melqui, aꞌan li ralal laj Jana. Ut laj Jana, aꞌan li ralal laj José. 25Laj José, aꞌan li ralal laj Matatías. Ut laj Matatías, aꞌan li ralal laj Amós. Ut laj Amós, aꞌan li ralal laj Nahum. Ut laj Nahum, aꞌan li ralal laj Esli. Ut laj Esli, aꞌan li ralal laj Nagai. 26Ut laj Nagai, aꞌan li ralal laj Maat. Ut laj Maat, aꞌan li ralal laj Matatías. Ut laj Matatías, aꞌan li ralal laj Simei. Ut laj Simei, aꞌan li ralal laj José. Ut laj José, aꞌan li ralal laj Judá. 27Laj Judá, aꞌan li ralal laj Joana. Ut laj Joana, aꞌan li ralal laj Resa. Ut laj Resa, aꞌan li ralal laj Zorobabel. Ut laj Zorobabel, aꞌan li ralal laj Salatiel. Ut laj Salatiel, aꞌan li ralal laj Neri. 28Ut laj Neri, aꞌan li ralal laj Melqui. Ut laj Melqui, aꞌan li ralal laj Adi. Ut laj Adi, aꞌan li ralal laj Cosam. Ut laj Cosam, aꞌan li ralal laj Elmodam. Ut laj Elmodam, aꞌan li ralal laj Er. 29Ut laj Er, aꞌan li ralal laj Josué. Ut laj Josué, aꞌan li ralal laj Eliezer. Ut laj Eliezer, aꞌan li ralal laj Jorim. Ut laj Jorim, aꞌan li ralal laj Matat. 30Ut laj Matat, aꞌan li ralal laj Leví. Ut laj Leví, aꞌan li ralal laj Simeón. Ut laj Simeón, aꞌan li ralal laj Judá. Ut laj Judá, aꞌan li ralal laj José. Ut laj José, aꞌan li ralal laj Jonán. Ut laj Jonán, aꞌan li ralal laj Eliaquim. 31Ut laj Eliaquim, aꞌan li ralal laj Melea. Ut laj Melea, aꞌan li ralal laj Mainán. Ut laj Mainán, aꞌan li ralal laj Matata. Ut laj Matata, aꞌan li ralal laj Natán. 32Ut laj Natán, aꞌan li ralal laj David. Ut laj David, aꞌan li ralal laj Isaí. Ut laj Isaí, aꞌan li ralal laj Obed. Ut laj Obed, aꞌan li ralal laj Booz. Ut laj Booz, aꞌan li ralal laj Salmón. Ut laj Salmón, aꞌan li ralal laj Naasón. 33Ut laj Naasón, aꞌan li ralal laj Aminadab. Ut laj Aminadab, aꞌan li ralal laj Aram. Ut laj Aram, aꞌan li ralal laj Esrom. Ut laj Esrom, aꞌan li ralal laj Fares. Ut laj Fares, aꞌan li ralal laj Judá. 34Ut laj Judá, aꞌan li ralal laj Jacob. Ut laj Jacob, aꞌan li ralal laj Isaac. Ut laj Isaac, aꞌan li ralal laj Abraham. Ut laj Abraham, aꞌan li ralal laj Taré. Ut laj Taré, aꞌan li ralal laj Nacor. 35Ut laj Nacor, aꞌan li ralal laj Serug. Ut laj Serug, aꞌan li ralal laj Ragau. Ut laj Ragau, aꞌan li ralal laj Peleg. Ut laj Peleg, aꞌan li ralal laj Heber. Ut laj Heber, aꞌan li ralal laj Sala. 36Ut laj Sala, aꞌan li ralal laj Cainán. Ut laj Cainán, aꞌan li ralal laj Arfaxad. Ut laj Arfaxad, aꞌan li ralal laj Sem. Ut laj Sem, aꞌan li ralal laj Noé. Ut laj Noé, aꞌan li ralal laj Lamec. 37Ut laj Lamec, aꞌan li ralal laj Matusalén. Ut laj Matusalén, aꞌan li ralal laj Enoc. Ut laj Enoc, aꞌan li ralal laj Jared. Ut laj Jared, aꞌan li ralal laj Mahalaleel. Ut laj Mahalaleel, aꞌan li ralal laj Cainán. 38Ut laj Cainán, aꞌan li ralal laj Enós. Ut laj Enós, aꞌan li ralal laj Set. Ut laj Set, aꞌan li ralal laj Adán. Ut laj Adán, aꞌan li ralal li Dios.

Li Santil hu

© 2000, Wycliffe Bible Translators, Inc. All rights reserved. More Info | Version Index