Search form

San Lucas 5

Numtajenak xqꞌuial li car queꞌxchap

1Saꞌ jun li cutan li Jesús cuan chire li palau Genesaret ut kꞌaxal cuiꞌchic nabal li tenamit queꞌchꞌutla chirabinquil li ra̱tin li Dios. 2Quiril cuib li jucub cuan chire li palau. Eb laj car ma̱ aniheb chi saꞌ. Yo̱queb chak chixchꞌajbal lix yoy. 3Qui-oc li Jesús saꞌ jun li jucub. Li jucub aꞌan re laj Simón. Li Jesús quixtzꞌa̱ma chiru laj Simón nak tixjil caꞌchꞌinak li jucub saꞌ li haꞌ. Ut quicꞌojla saꞌ li jucub ut qui-oc chixchꞌolobanquil lix ya̱lal chiruheb li tenamit li cuanqueb chire li palau. 4Ut nak ac xrakeꞌ chi a̱tinac, quixye re laj Simón: —Cꞌam li jucub saꞌ xchamal li haꞌ ut ta̱qꞌue la̱ yoy saꞌ li haꞌ re nak ta̱chap la̱ car, chan li Jesús. 5Quichakꞌoc laj Simón ut quixye re: —At tzolonel, chixjunil li kꞌojyi̱n xkaqꞌue li kayoy saꞌ li haꞌ ut ma̱ jun li car xkachap. Abanan xban nak la̱at xatyehoc cue, tinqꞌue cuiꞌchic lin yoy saꞌ li haꞌ, chan. 6Nak queꞌxqꞌue lix yoy saꞌ li haꞌ, kꞌaxal cuiꞌchic nabal li car queꞌxchap ut yo̱ chi pejecꞌ lix yoyeb. 7Ut queꞌxcꞌut rukꞌeb chiruheb li rochben li cuanqueb saꞌ li jucub jun chic re xbokbaleb re nak teꞌcha̱lk chixtenkꞌanquil. Ut eb aꞌan queꞌchal ut queꞌxnujtesi xcaꞌbichal li jucub ut caꞌchꞌin chic ma̱ nasubun saꞌ li haꞌ xban xqꞌuial li car. 8Nak quiril chixjunil aꞌin laj Simón Pedro, quixcuikꞌib rib chiru li Jesús ut quixye re: —Canabin injunes, at Ka̱cuaꞌ. Ma̱cuaꞌ incꞌulub nak cua̱nkat cuiqꞌuin xban nak la̱in jun cui̱nk aj ma̱c, chan. 9Ut quisach xchꞌo̱l laj Simón joꞌqueb ajcuiꞌ li cuanqueb rochben xban nak kꞌaxal cuiꞌchic nabal li car queꞌxchap. 10Ut joꞌcan ajcuiꞌ laj Jacobo ut laj Juan, eb li ralal laj Zebedeo. Aꞌan eb li rochben laj Simón. Ut li Jesús quixye re laj Simón: —Matcꞌoxlac. Chalen anakcuan ma̱cuaꞌ chic caribc ta̱ba̱nu. A̱cuas a̱cui̱tzꞌin ban chic ta̱sicꞌ re teꞌpa̱ba̱nk, chan li Jesús. 11Ut queꞌxcꞌam li jucub chire li palau ut aran queꞌxcanab chixjunil ut queꞌxta̱ke li Jesús.

Li Jesús quixqꞌuirtesi jun cui̱nk saklep rix

12Nak cuan li Jesús saꞌ jun li tenamit, quicuulac jun li cui̱nk riqꞌuin saklep rix. Nak quiril li Jesús quixxulub rib saꞌ chꞌochꞌ, ut quixtzꞌa̱ma chiru li Jesús ut quixye re: —Ka̱cuaꞌ, la̱in ninnau nak la̱at naru tina̱qꞌuirtesi. Cui ta̱ba̱nu li usilal, china̱qꞌuirtesi, chan. 13Li Jesús quixchꞌeꞌ li cui̱nk riqꞌuin rukꞌ ut quixye re: —La̱in tincuaj nak tatqꞌuira̱k. Anakcuan tatinqꞌuirtesi, chan. Ut saꞌ ajcuiꞌ li ho̱nal aꞌan quiqꞌuira li cui̱nk. 14Ut li Jesús quixye re: —Ma̱ ani aj e ta̱serakꞌi chanru nak xatqꞌuira. Ayu ban riqꞌuin laj tij re nak aꞌan ta̱ril nak xatqꞌuira. Ut ta̱qꞌue la̱ mayej joꞌ naxye saꞌ lix chakꞌrab laj Moisés chokꞌ retalil chiruheb chixjunileb nak xatqꞌuira, chan li Jesús. 15Abanan yalak bar yo̱ chi abi̱c resil chixjunil li cꞌaꞌru yo̱ chixba̱nunquil li Jesús. Nabaleb li tenamit nequeꞌxchꞌutub ribeb chirabinquil li cꞌaꞌru naxye ut re ajcuiꞌ nak teꞌqꞌuirtesi̱k. 16Ut li Jesús rajlal naxic xjunes chi tijoc saꞌ eb li naꞌajej bar ma̱cꞌaꞌ cuan.

Li Jesús quixqꞌuirtesi jun li cui̱nk sic li rok ut sic li rukꞌ

17Saꞌ jun li cutan nak li Jesús yo̱ chixchꞌolobanquil lix ya̱lal chiruheb li tenamit cuanqueb cuib oxib laj fariseo saꞌ xya̱nkeb. Ut cuanqueb ajcuiꞌ aj tzolol chakꞌrab. Queꞌchal chak saꞌ eb li naꞌajej Galilea, Judea ut Jerusalén. Ut li Jesús yo̱ chixqꞌuirtesinquileb li yaj riqꞌuin xcuanquil li Dios. 18Saꞌ li ho̱nal aꞌan queꞌcuulac cuib oxib li cui̱nk ut yo̱queb chixcꞌambal jun li cui̱nk sic li rok ut sic li rukꞌ yocyo chiru lix cuarib. Ut teꞌraj rocsinquil li cui̱nk cuan cuiꞌ li Jesús. 19Abanan queꞌril nak incꞌaꞌ queꞌru chi oc saꞌ li cab xban li qꞌuila tenamit. Joꞌcan nak queꞌtakeꞌ saꞌ xbe̱n li cab. Queꞌxte caꞌchꞌin li xbe̱n li cab ut aran queꞌxcubsi li yaj chi yocyo saꞌ lix cuarib. Coxeꞌxqꞌue saꞌ xyiheb li tenamit bar cuan cuiꞌ li Jesús. 20Quixqꞌue retal li Jesús nak eb li cui̱nk aꞌan queꞌxpa̱b nak naru tixqꞌuirtesi li yaj. Joꞌcan nak quixye re li yaj: —At cui̱nk, cuybil sachbil chic la̱ ma̱c, chan. 21Ut eb laj fariseo ut eb laj tzolol chakꞌrab queꞌoc chixyebal chi ribileb rib: —¿Ani li cui̱nk aꞌan nak naxjuntakꞌe̱ta rib riqꞌuin li Dios nak naxye chi joꞌcan? ¿Ma aꞌan ta biꞌ li Dios? ¿Ma ma̱cuaꞌ ta biꞌ caꞌaj cuiꞌ li Dios naru nacuyuc ma̱c? chanqueb. 22Quixnau li Jesús cꞌaꞌru yo̱queb chixcꞌoxlanquil. Quichakꞌoc ut quixye reheb: —¿Cꞌaꞌut nak yo̱quex chixcꞌoxlanquil chi joꞌcan? 23¿Bar cuan li us tinye re li yaj re nak ta̱cꞌutu̱nk che̱ru nak cuan incuanquil? ¿Ma tinye re, “cuybil sachbil la̱ ma̱c” malaj ut tinye re, “tatinqꞌuirtesi”? 24La̱in tincꞌut che̱ru nak la̱in li Cristo li Cꞌajolbej ut cuan incuanquil saꞌ ruchichꞌochꞌ chixcuybal xsachbal li ma̱c, chan reheb. Tojoꞌnak li Jesús quixye re li yaj, —At cui̱nk, la̱in tinye a̱cue, cuaclin, cꞌam la̱ cuarib ut ayu saꞌ la̱ cuochoch, chan. 25Ut saꞌ ajcuiꞌ li ho̱nal aꞌan li cui̱nk li yaj nak quicuan quicuacli chiruheb chixjunileb li cuanqueb aran. Quixchap lix cuarib ut yo̱ chixlokꞌoninquil li Dios nak co̱ saꞌ rochoch. 26Ut chixjunileb li cuanqueb aran sachso̱queb xchꞌo̱l queꞌcana chirilbal li quicꞌulman. Queꞌxlokꞌoni li Dios ut yo̱ xcꞌaꞌuxeb nak queꞌxye: —Sachba chꞌo̱lej li xkil anakcuan, chanqueb.

Li Jesús quixbok chokꞌ xtzolom laj Leví laj titzꞌol toj, li nayeman ajcuiꞌ Mateo re

27Nak qui-el saꞌ li tenamit aꞌan, li Jesús quixtau jun li cui̱nk aj titzꞌol toj aj Leví xcꞌabaꞌ. Chunchu cuan cuiꞌ li me̱x li nequeꞌcꞌuluc cuiꞌ toj. Li Jesús quixye re: —China̱ta̱ke, chan. 28Quicuacli laj Leví. Quixcanab chixjunil ut quixta̱ke li Jesús. 29Quixba̱nu jun li nimla ninkꞌe laj Leví chokꞌ re li Jesús. Cuanqueb nabaleb xcomoneb laj titzꞌol toj ut cuanqueb ajcuiꞌ nabaleb jalan chic chi cuaꞌac saꞌ li me̱x rochbeneb. 30Eb laj fariseo ut eb laj tzolol chakꞌrab queꞌoc chixcuechꞌinquil rixeb lix tzolom li Jesús ut queꞌxye reheb: —¿Cꞌaꞌut nak nequexcuaꞌac ut nequex-ucꞌac rochbeneb laj titzꞌol toj ut rochbeneb laj ma̱c? chanqueb. 31Li Jesús quixye reheb: —Li cauheb ma̱cꞌaꞌ na-oc cuiꞌ aj banonel reheb. Aban li yajeb, aꞌaneb li teꞌraj banecꞌ. 32Joꞌcan nak la̱in incꞌaꞌ xinchal chixsicꞌbal li ti̱queb xchꞌo̱l. Xinchal ban chixsicꞌbaleb laj ma̱c re nak teꞌyotꞌekꞌ xchꞌo̱l ut teꞌxjal xcꞌaꞌuxeb, chan li Jesús.

Nak queꞌxcuechꞌi rib chirix li ayu̱n

33Ut queꞌxye cuiꞌchic re li Jesús: —Eb lix tzolom laj Juan rajlal nequeꞌxba̱nu x-ayu̱n ut rajlal nequeꞌtijoc. Joꞌcan ajcuiꞌ nequeꞌxba̱nu lix tzolomeb laj fariseo. Ut eb la̱ tzolom la̱at, ¿cꞌaꞌut nak incꞌaꞌ nequeꞌxba̱nu chi joꞌcan? Eb aꞌan nequeꞌcuaꞌac nequeꞌucꞌac chi ma̱cꞌaꞌeb xcꞌaꞌux, chanqueb. 34Tojoꞌnak quichakꞌoc li Jesús ut quixye reheb: —La̱in joꞌ jun be̱lomej nak cuanquin. ¿Ma naru teꞌayunik li nequeꞌxic riqꞌuin sumla̱c nak cuan li be̱lomej riqꞌuineb? Nak toj cuan li be̱lomej riqꞌuineb incꞌaꞌ naru nequeꞌxba̱nu x-ayu̱n. 35Ut joꞌcan ajcuiꞌ lin tzolom. Ta̱cuulak xkꞌehil nak tin-isi̱k saꞌ xya̱nkeb. Toj saꞌ li cutan aꞌan teꞌxba̱nu x-ayu̱n, chan reheb.

Li najter naꞌleb incꞌaꞌ naxcꞌam rib riqꞌuin li acꞌ naꞌleb

36Ut li Jesús quixye cuiꞌchic reheb li jaljo̱quil ru a̱tin aꞌin: Ma̱ ani naxxi̱ti junak kꞌel tꞌicr riqꞌuin acꞌ tꞌicr. Cui ut naxxi̱ti riqꞌuin acꞌ tꞌicr, naxnimobresi xpejelal li kꞌel tꞌicr. Ut incꞌaꞌ naxcꞌam rib li acꞌ tꞌicr riqꞌuin li kꞌel. 37Ut ma̱ ani naqꞌuehoc acꞌ vino saꞌ junak kꞌel bo̱ls tzꞌu̱m. Cui tixqꞌue li acꞌ vino saꞌ junak kꞌel bo̱ls tzꞌu̱m, ta̱puqꞌuekꞌ li kꞌel tzꞌu̱m ut ta̱hoyekꞌ li vino. Ta̱sachk li vino ut ta̱sachk ajcuiꞌ li bo̱ls tzꞌu̱m. 38Joꞌcan nak li acꞌ vino saꞌ li acꞌ bo̱ls tzꞌu̱m naqꞌueman re nak ma̱cꞌaꞌ tixcꞌul li vino chi moco li bo̱ls tzꞌu̱m. 39Ut li ani ac xrucꞌ li vino re junxil incꞌaꞌ chic ta̱raj rucꞌbal li acꞌ vino, xban nak nequeꞌxcꞌoxla nak li vino re junxil, aꞌan li cha̱bil, chan li Jesús reheb.

Li Santil hu

© 2000, Wycliffe Bible Translators, Inc. All rights reserved. More Info | Version Index