Search form

San Marcos 12

Li jaljo̱quil ru a̱tin chirixeb laj ilol re li acui̱mk incꞌaꞌ useb xnaꞌleb

1Li Jesús qui-oc chixyebal li jaljo̱quil ru a̱tin reheb ut quixye chi joꞌcaꞌin:

Jun li cui̱nk quirau jun si̱r li racui̱mk uvas ut quixsut saꞌ corral. Quixyi̱b jun xnaꞌaj bar teꞌxyatzꞌ cuiꞌ li uvas ut quixyi̱b ajcuiꞌ jun chꞌina cab najt xteram re li ta̱cꞌacꞌale̱nk re li acui̱mk. Quixsiqꞌueb laj ilol re li racui̱mk. Ut laj e̱chal re li acui̱mk co̱ saꞌ jalanil tenamit. 2Nak quicuulac xkꞌehil xsicꞌbal ru li acui̱mk, laj e̱chal re quixtakla jun lix mo̱s riqꞌuineb laj ilol re chixcꞌulbal li ru li racui̱mk li joꞌ qꞌuial ta̱tzꞌak aꞌan. 3Aꞌut eb laj ilol re li acui̱mk queꞌxchap li mo̱s ut queꞌxsacꞌ. Ut queꞌxtakla chi ma̱cꞌaꞌ queꞌxqꞌue re. 4Laj e̱chal re li acui̱mk quixtakla jun chic lix mo̱s riqꞌuineb. Ut queꞌxjor xjolom chi pec. Kꞌaxal ra queꞌxba̱nu re. 5Ut laj e̱chal re quixtakla cuiꞌchic jun lix mo̱s ut li jun aꞌan queꞌxcamsi. Ut toj nabal cuiꞌchic lix mo̱s quixtakla riqꞌuineb laj ilol re li racui̱mk. Cuan yal queꞌxsacꞌ ut cuan queꞌxcamsi. 6Caꞌaj chic li ralal quicana, li kꞌaxal naxra. —Li cualal teꞌx-oxlokꞌi, chan saꞌ xchꞌo̱l. Joꞌcan nak quixtakla li ralal riqꞌuineb. 7Nak quicuulac li ralal, eb laj ilol re li acui̱mk queꞌxye chi ribileb rib, —Aꞌan li ralal li ta̱e̱chani̱nk re li naꞌajej. Kacamsihak, chanqueb, ut la̱o chic toe̱chani̱nk re.— 8Joꞌcan nak queꞌxchap. Nak ac queꞌxcamsi queꞌxcut chak jun pacꞌal li chꞌochꞌ. 9Ut li Jesús quixye reheb: —¿Cꞌaꞌru tixba̱nu laj e̱chal re li acui̱mk nak nequecꞌoxla la̱ex? Ta̱cha̱lk ut tixcamsiheb laj ilol re li racui̱mk, ut jalan chic aj e tixqꞌue li jun si̱r chi uvas. 10¿Ma incꞌaꞌ xeril saꞌ li Santil Hu li naxye chi joꞌcaꞌin?

Li pec li queꞌxtzꞌekta̱na laj cablanel, aꞌan li kꞌaxal lokꞌ li quiqꞌueman chokꞌ xxuc li cab.

11Li Ka̱cuaꞌ aꞌan quixqꞌue xlokꞌal li pec. Ut aꞌan xsachba chꞌo̱lej chokꞌ ke la̱o.— (Sal. 118:22, 23)

12Eb laj tij ut eb laj tzꞌi̱b ut eb li xakabanbileb chi cꞌanjelac saꞌ rochoch li Dios queꞌxcꞌoxla raj xchapbal li Jesús re teꞌxqꞌue saꞌ tzꞌalam xban nak queꞌxtau ru nak chirixeb aꞌan yo̱ chi a̱tinac nak quixye li jaljo̱quil ru a̱tin aꞌan. Abanan queꞌxucuac xbaneb li tenamit. Joꞌcan nak queꞌxcanab ut queꞌel saꞌ li naꞌajej aꞌan.

Chikaqꞌuehak li katoj re li acuabej

13Mokon chic queꞌxtakla riqꞌuin li Jesús cuib oxibeb laj fariseo rochbeneb cuib oxibeb li nequeꞌoquen chirix laj Herodes re xsicꞌbal cꞌaꞌru ta̱paltok cuiꞌ riqꞌuin li ra̱tin re nak teꞌxchap. 14Queꞌcuulac riqꞌuin li Jesús ut queꞌxye re: —At tzolonel, nakanau nak la̱at ya̱l nacat-a̱tinac ut incꞌaꞌ nacaxucua ruheb li tenamit. Yalak ani aj e nacaye lix ya̱lal. Ut nacacꞌut chiruheb li cꞌaꞌru naraj li Dios. Ye ke, ¿ma us xqꞌuebal li toj re li acuabej malaj ut incꞌaꞌ? ¿Ma takaqꞌue malaj ut incꞌaꞌ? chanqueb. 15Li Jesús naxnau nak aj caꞌpacꞌaleb. Quixye reheb: —¿Cꞌaꞌut nak nequeraj xyalbal cuix? Cꞌamomak chak li tumin. Cuilak, chan reheb. 16Ut eb aꞌan queꞌxcꞌut li tumin chiru. Ut li Jesús quixye reheb: —¿Ani aj e li jalam u̱ch li cuan chiru? Ut, ¿ani aj cꞌabaꞌ li tzꞌi̱banbil chiru?— Eb aꞌan queꞌchakꞌoc ut queꞌxye: —Re li acuabej, chanqueb. 17Ut li Jesús quixye reheb: —Tojomak re li acuabej li cꞌaꞌru re li acuabej ut tojomak re li Dios li cꞌaꞌru re li Dios, chan. Ut cꞌajoꞌ nak queꞌsach xchꞌo̱leb xban li ra̱tin.

Li Jesús quixchꞌolob xya̱lal lix cuaclijiqueb li camenak chi yoꞌyo

18Tojoꞌnak queꞌcuulac riqꞌuin li Jesús cuib oxib laj saduceo. Eb aꞌan incꞌaꞌ nequeꞌxpa̱b nak teꞌcuacli̱k cuiꞌchic chi yoꞌyo li camenak. Queꞌxye re li Jesús: 19—At tzolonel, laj Moisés quixtzꞌi̱ba jun kachakꞌrabinquil ut quixye chi joꞌcaꞌin: Cui junak cui̱nk ta̱ca̱mk ut tixcanab li rixakil chi ma̱cꞌaꞌ ralal xcꞌajol, tento nak ta̱cꞌamekꞌ li rixakil xban li ri̱tzꞌin li camenak re nak ta̱cua̱nk ralal xcꞌajol saꞌ xcꞌabaꞌ li camenak. 20Queꞌcuan cuukub li cui̱nk ri̱tzꞌineb rib. Li asbej quixcꞌam rixakil ut quicam chi incꞌaꞌ quixcanab ralal xcꞌajol. 21Ut quicꞌameꞌ li ixk xban li i̱tzꞌinbej. Ut quicam ajcuiꞌ aꞌan chi incꞌaꞌ quixcanab ralal xcꞌajol. Ut joꞌcan cuiꞌchic li rox i̱tzꞌinbej. 22Li ixk aꞌan quicꞌameꞌ xbaneb li cuukub. Ut ma̱ jun reheb quixcanab ralal xcꞌajol. Ut quicam ajcuiꞌ li ixk. 23Saꞌ xcuaclijiqueb li camenak chi yoꞌyo, nak teꞌcuacli̱k eb aꞌan, ¿ani aj ixakil ta̱cana̱k cuiꞌ li ixk aꞌan xban nak cuukub lix be̱lom quicuan? chanqueb. 24Quichakꞌoc li Jesús ut quixye reheb: —La̱ex incꞌaꞌ nequetau xya̱lal xban nak incꞌaꞌ nequetau ru li Santil Hu chi moco lix nimal xcuanquil li Dios. 25Nak teꞌcuacli̱k chi yoꞌyo saꞌ xya̱nkeb li camenak, incꞌaꞌ chic teꞌsumla̱k chi moco teꞌsumuba̱k chic. Joꞌkeb ban chic li ángel saꞌ choxa. 26Ut chirix lix cuaclijiqueb li camenak chi yoꞌyo, ¿ma incꞌaꞌ e̱rilom saꞌ lix hu laj Moisés li cꞌaꞌru quiyeheꞌ re xban li Dios nak quia̱tinac chak saꞌ li qꞌuix li yo̱ chi cꞌatc? Quixye chi joꞌcaꞌin, “La̱in lix Dios laj Abraham, lix Dios laj Isaac ut lix Dios laj Jacob”, chan li Dios. 27Aꞌan retalil chokꞌ ke nak toj yoꞌyo̱queb chiru li Dios usta queꞌcam. Li Dios moco xDioseb ta li camenakeb; xDioseb ban li yoꞌyo̱queb. Joꞌcan nak la̱ex chi ti̱c incꞌaꞌ nequetau xya̱lal, chan li Jesús reheb.

Li chakꞌrab kꞌaxal nim xcuanquil

28Quicuulac jun reheb laj tzꞌi̱b. Ut quirabi nak yo̱queb chixcuechꞌinquil ribeb. Quixqꞌue retal nak li Jesús quixchakꞌbeheb chi us, ut quixpatzꞌ re li Jesús: —¿Bar cuan reheb li chakꞌrab li kꞌaxal nim xcuanquil?— 29Li Jesús quichakꞌoc ut quixye re: —Li xbe̱n chakꞌrab, li kꞌaxal nim xcuanquil, aꞌan aꞌin: Abihomak la̱ex aj Israel, li Ka̱cuaꞌ li kaDios jun ajcuiꞌ. 30Ta̱ra li Ka̱cuaꞌ la̱ Dios chi anchal a̱chꞌo̱l ut chi anchal la̱ cua̱m ut chi anchal la̱ cꞌaꞌux ut chi anchal la̱ metzꞌe̱u. Aꞌan aꞌin li chakꞌrab li kꞌaxal nim xcuanquil. 31Ut li xcab chanchan ajcuiꞌ aꞌan: Ta̱ra la̱ cuas a̱cui̱tzꞌin joꞌ nak nacara a̱cuib la̱at. Ma̱cꞌaꞌ chic junak chakꞌrab nim xcuanquil chiruheb li cuib aꞌin, chan. 32Laj tzꞌi̱b quichakꞌoc ut quixye re: —Us li xaye at tzolonel. Ya̱l li xaye nak jun ajcuiꞌ li Dios cuan ut ma̱cꞌaꞌ chic junak chirix aꞌan. 33Tento nak takara li Dios chi anchal li kachꞌo̱l, chi anchal li kacꞌaꞌux, chi anchal li ka̱m ut chi anchal li kametzꞌe̱u. Ut takara li kas ki̱tzꞌin joꞌ nak nakara kib la̱o. Aꞌan kꞌaxal nim xcuanquil chiruheb chixjunil li cꞌatbil mayej ut li mayejanbil xul, chan. 34Li Jesús quixqꞌue retal nak li cui̱nk quixnau xsumenquil ut quixye re: —Yal caꞌchꞌin aj chic ma̱ nacakꞌaxtesi a̱cuib rubel xcuanquil li Dios, chan. Ut ma̱ jun chic queꞌraj patzꞌoc xban nak qui-oc xcꞌaꞌuxeb.

Li Cristo xcomoneb li ralal xcꞌajol laj David

35Mokon chic nak cuan saꞌ rochoch li Dios, li Jesús yo̱ chixchꞌolobanquil lix ya̱lal chiruheb ut quixye: —¿Cꞌaꞌut nak eb laj tzꞌi̱b nequeꞌxye nak li Cristo, aꞌan xcomoneb li ralal xcꞌajol laj David? 36Laj David quixye li cꞌaꞌru quirecꞌa saꞌ xchꞌo̱l xban li Santil Musikꞌej ut quixye chi joꞌcaꞌin:

Li Ka̱cuaꞌ Dios quixye re laj Colol cue, Cꞌojlan saꞌ lin nim ukꞌ toj retal tinqꞌueheb li xicꞌ nequeꞌiloc a̱cue rubel la̱ cuanquil. (Sal. 110:1)

37Li rey David quixye “aj Colol cue” re li Ka̱cuaꞌ usta aꞌan xcomoneb li ralal xcꞌajol, chan li Jesús. Ut li qꞌuila tenamit queꞌrabi li ra̱tin chi sa saꞌ xchꞌo̱leb.

Li Jesús quixkꞌuseb laj tzꞌi̱b

38Nak yo̱ chixchꞌolobanquil lix ya̱lal chiruheb, li Jesús quixye: —Me̱tzol e̱rib riqꞌuineb laj tzꞌi̱b li nequeꞌraj be̱c chi najt rok li rakꞌeb re xcꞌutbal nak cuanqueb xcuanquil. Eb aꞌan nequeꞌcuulac chiruheb nak teꞌqꞌuehekꞌ xlokꞌal saꞌ eb li be. 39Ut nak cuanqueb saꞌ li cab li nequeꞌxchꞌutub cuiꞌ ribeb laj judío, nequeꞌraj cꞌojla̱c saꞌ li naꞌajej kꞌaxal lokꞌ ut nequeꞌraj cua̱nc chi xjolomil li me̱x nak nequeꞌxic chi cuaꞌac saꞌ junak ninkꞌe. 40Nequeꞌxmakꞌ li cꞌaꞌru cuan reheb li xma̱lcaꞌan ut re xmukbal li ma̱usilal nequeꞌxba̱nu, najt rok nequeꞌtijoc chiruheb li tenamit. Ut xban aꞌan kꞌaxal ra cuiꞌchic teꞌxtoj cuiꞌ li ma̱c nequeꞌxba̱nu.—

Lix mayej li xma̱lcaꞌan nebaꞌ

41Saꞌ jun cutan quicuulac li Jesús saꞌ rochoch li Dios. Quicꞌojla chixcꞌatk lix ca̱xil li mayej. Yo̱ chirilbal li tenamit nak yo̱queb chixqꞌuebal li tumin saꞌ li ca̱x. Nabaleb li biom nabal lix mayej yo̱queb chixqꞌuebal. 42Quichal ajcuiꞌ jun xma̱lcaꞌan nebaꞌ. Ut quixqꞌue cuib chi tumin joꞌ tana li jun centavo. 43Tojoꞌnak li Jesús quixbokeb lix tzolom ut quixye reheb: —Relic chi ya̱l tinye e̱re nak li xma̱lcaꞌan nebaꞌ nabal xqꞌue chiru li mayej li xeꞌxqꞌue chixjunileb. 44Chixjunileb aꞌan xeꞌxqꞌue li na-elaꞌan chiruheb. Aꞌut li ixk aꞌin saꞌ nebaꞌil xqꞌue chixjunil li joꞌ nimal cuan re.—

Li Santil hu

© 2000, Wycliffe Bible Translators, Inc. All rights reserved. More Info | Version Index