Search form

San Marcos 4

Li jaljo̱quil ru a̱tin chirix laj acuinel

1Ut qui-oc cuiꞌchic li Jesús chixtzolbaleb li tenamit chire li palau Galilea. Kꞌaxal nabal queꞌxchꞌutub rib riqꞌuin chirabinquil. Xban xqꞌuialeb li tenamit, li Jesús qui-oc saꞌ jun li jucub cuan saꞌ li palau ut quicꞌojla chi saꞌ. Ut chixjunileb li tenamit queꞌcana chire li palau. 2Ut nabal cꞌaꞌak re ru quixtzoleb cuiꞌ riqꞌuin jaljo̱quil ru a̱tin. Nak yo̱ chixchꞌolobanquil lix ya̱lal chiruheb, quixye li serakꞌ aꞌin reheb: 3—Abihomak li tinye. Jun aj acuinel co̱ chi a̱uc. 4Ut nak yo̱ chixhirbal li iyaj, cuan quinak chire be. Queꞌchal li xul li nequeꞌxicꞌan ut queꞌxcuaꞌ li iyaj. 5Ut cuan ajcuiꞌ li iyaj quinak saꞌ li pec ru bar ma̱cꞌaꞌ cuiꞌ mas li chꞌochꞌ. Saꞌ junpa̱t quimok, abanan incꞌaꞌ quixchap xxeꞌ xban nak jay li chꞌochꞌ saꞌ xbe̱n li pec. 6Nak quichal li sakꞌe quichakic li acui̱mk xban nak incꞌaꞌ cham cuan li xeꞌ. 7Ut cuan cuiꞌchic li iyaj coxnak saꞌ xya̱nk li qꞌuix. Ut nak quichamoꞌ li qꞌuix saꞌ xbe̱n, quixnatꞌ li acui̱mk ut incꞌaꞌ quiu̱chin. 8Ut cuan cuiꞌchic li iyaj coxnak saꞌ li cha̱bil chꞌochꞌ. Quimok ut quiqꞌui ut quiu̱chin chi us. Cuan quixqꞌue laje̱tk xcaꞌcꞌa̱l (30) ru. Cuan li quixqꞌue oxtakcꞌa̱l (60) ru ut cuan cuiꞌchic quixqꞌue oꞌtakcꞌa̱l (100) ru li junju̱nk. 9Tojoꞌnak quixye li Jesús reheb: —Li ani na-abin, chixqꞌuehak retal li cꞌaꞌru ninye, chan.

Cꞌaꞌut nak cuan li jaljo̱quil ru a̱tin

10Ut nak queꞌel lix qꞌuial li tenamit, li Jesús quicana rochbeneb lix tzolom cablaju. Eb aꞌan queꞌxpatzꞌ re ut queꞌxye: —¿Cꞌaꞌru xya̱lal li jaljo̱quil ru a̱tin aꞌin? chanqueb. 11Ut li Jesús quixye reheb: —La̱ex qꞌuebil e̱re xnaubal xya̱lal li mukmu̱quil naꞌleb chirix lix nimajcual xcuanquilal li Dios. Aꞌut li jun chꞌo̱l chic li incꞌaꞌ nequeꞌpa̱ban, riqꞌuin jaljo̱quil ru a̱tin ta̱yema̱nk reheb. 12Usta yo̱queb chi iloc, abanan incꞌaꞌ teꞌxqꞌue retal. Usta yo̱queb chi abi̱nc, abanan incꞌaꞌ teꞌxtau xya̱lal. Ta̱uxma̱nk chi joꞌcan re nak incꞌaꞌ teꞌxyotꞌ xchꞌo̱leb ut incꞌaꞌ teꞌxjal xcꞌaꞌuxeb ut incꞌaꞌ ta̱cuyekꞌ xma̱queb.—

Li Jesús quixchꞌolob xya̱lal chirix laj acuinel

13Tojoꞌnak li Jesús quixpatzꞌ reheb: —¿Ma incꞌaꞌ nequetau ru li jaljo̱quil ru a̱tin aꞌin? Cui incꞌaꞌ nequetau xya̱lal aꞌin, ¿chanru nak te̱tau xya̱lal chixjunil li jaljo̱quil ru a̱tin chi joꞌcanan? 14Aꞌan aꞌin lix ya̱lal. Laj acuinel aꞌan joꞌ jun laj yehol ra̱tin li Dios. 15Ut li iyaj li quinak chire be, aꞌan chanchaneb li nequeꞌabin re li ra̱tin li Dios. Nak ac xeꞌrabi, saꞌ junpa̱t nachal laj tza chirisinquil li a̱tin ut saꞌ junpa̱t nasach saꞌ xchꞌo̱leb. 16Ut li iyaj li quinak saꞌ li pec ru, aꞌan chanchaneb li nequeꞌabin re li ra̱tin li Dios ut saꞌ junpa̱t nequeꞌxpa̱b chi saheb saꞌ xchꞌo̱l. 17Abanan incꞌaꞌ nacana saꞌ xchꞌo̱leb. Nak nachal junak raylal, malaj chꞌaꞌajquilal saꞌ xbe̱neb xbaneb lix pa̱ba̱l, incꞌaꞌ nequeꞌxcuy xnumsinquil. Saꞌ junpa̱t nequeꞌchꞌinan xchꞌo̱l. 18Ut li iyaj li quinak saꞌ xya̱nk li qꞌuix chanchaneb li nequeꞌabin re li ra̱tin li Dios. 19Abanan caꞌaj cuiꞌ li cꞌaꞌak re ru cuan saꞌ ruchichꞌochꞌ nequeꞌxcꞌoxla, joꞌ li biomal ut xra̱bal ru li cꞌaꞌak chic re ru. Ut aꞌan li naramoc lix ya̱lal chiruheb. Ma̱cꞌaꞌ na-oc cuiꞌ li ra̱tin li Dios reheb. 20Ut li iyaj li quitꞌaneꞌ saꞌ cha̱bil chꞌochꞌ, aꞌan chanchaneb li nequeꞌrabi ut nequeꞌxpa̱b chi tzꞌakal li ra̱tin li Dios. Nequeꞌqꞌui chi us saꞌ lix pa̱ba̱leb, joꞌ li acui̱mk li naru̱chin laje̱tk xcaꞌtakcꞌa̱l (30) ut li naxqꞌue oxtakcꞌa̱l (60) ut li naxqꞌue oꞌtakcꞌa̱l (100) ru li junju̱nk.—

Li jaljo̱quil ru a̱tin chirix li candil

21Ut li Jesús quixye ajcuiꞌ reheb: —¿Ma naqꞌueman ta biꞌ junak candil rubel junak chacach malaj ut rubel chꞌa̱t? Incꞌaꞌ naru. Takecꞌ ban naqꞌueman saꞌ xnaꞌaj re nak tixcutanobresi saꞌ li cab. 22Joꞌcan ajcuiꞌ li tijleb li ninchꞌolob xya̱lal che̱ru. Ma̱cꞌaꞌ ta̱cana̱k chi mukmu chi incꞌaꞌ ta ta̱cꞌutbesi̱k mokon. Ut li incꞌaꞌ natauman ru anakcuan, ta̱tauma̱nk ru mokon. 23Li ani naraj rabinquil, chixqꞌuehak retal li ninye. 24Quixye ajcuiꞌ reheb: —Cheqꞌuehak retal li nequerabi ut te̱qꞌue e̱chꞌo̱l chixba̱nunquil li nequerabi xban nak li ani naxba̱nu li cꞌaꞌru quixtzol cuiqꞌuin, mas cuiꞌchic lix naꞌleb ta̱qꞌuehekꞌ re xban li Dios re nak tixtau ru li cua̱tin. 25Li ani tixqꞌue xchꞌo̱l chixtzolbal li us, kꞌaxal cuiꞌchic li usilal tixcꞌul. Li ani incꞌaꞌ tixqꞌue xchꞌo̱l chixtzolbal li us, ta̱sachk saꞌ xchꞌo̱l li joꞌ qꞌuial naxnau.

Li jaljo̱quil ru a̱tin chirix li iyaj naqꞌui

26Ut li Jesús quixye cuiꞌchic reheb: —Lix nimajcual cuanquilal li Dios, chanchan junak aj acuinel. Narau li iyaj saꞌ chꞌochꞌ. 27Li cui̱nk nacuar, nacuacli ut eb li cutan nequeꞌnumeꞌ. Ut li iyaj yal xjunes namok chak ut naqꞌui ut li cui̱nk incꞌaꞌ naxnau chanru nak namok ut naqꞌui li acui̱mk. 28Li chꞌochꞌ naqꞌuiresin re li acui̱mk. Naqꞌui ut nani̱nkan ut chirix aꞌan na-oc chi atzꞌumac ut naxqꞌue li ru. 29Ut nak nache̱coꞌ li ru nasicꞌman saꞌ junpa̱t xban nak ac xcuulac xkꞌehil xxocbal li ru.

Li jaljo̱quil ru a̱tin chirix li riyajil li mostaza

30—¿Cꞌaꞌru tinjuntakꞌe̱ta cuiꞌ lix nimajcual cuanquil li Dios? chan li Jesús. —Ut ¿cꞌaꞌru chi jaljo̱quil ru a̱tin tinye, re xchꞌolobanquil xya̱lal lix nimajcual cuanquilal li Dios? 31Lix nimajcual cuanquilal li Dios, aꞌan chanchan riyajil li ni̱nki mostaza. Li riyajil li mostaza cocꞌ chiru chixjunil li iyaj cuan saꞌ ruchichꞌochꞌ. 32Nak ac x-auman namok ut naqꞌui. Ut ni̱nk chi us nacuulac lix cheꞌel. Naxkꞌax xteram chixjunil li acui̱mk. Nequeꞌni̱nkan li rukꞌ ut eb laj xicꞌanel xul nequeꞌxyi̱b lix soc saꞌ eb li rukꞌ.— 33Ut li Jesús quixchꞌolob xya̱lal chiruheb li tenamit riqꞌuin nabal chic chi jaljo̱quil ru a̱tin aꞌ ya̱l bar na cuan teꞌxtau ru. 34Ut ma̱cꞌaꞌ cꞌaꞌru quixye li Jesús reheb li tenamit chi ma̱cuaꞌ ta saꞌ jaljo̱quil ru a̱tin. Abanan nak ac xjuneseb chic lix tzolom, quixchꞌolob lix ya̱lal chiruheb.

Li Jesús quixkꞌus li ikꞌ ut li palau

35Nak qui-ecuu saꞌ li cutan aꞌan li Jesús quixye reheb lix tzolom: —Kꞌaxonko jun pacꞌal li palau, chan reheb. 36Ut li Jesús quixchakꞌrabiheb li qꞌuila tenamit ut quicꞌameꞌ saꞌ li jucub cuan cuiꞌ. Ut cuanqueb ajcuiꞌ cocꞌ jucub queꞌco̱eb chirix. 37Ut nak ac cuanqueb saꞌ xyi li palau quichal jun li nimla ikꞌ. Naxcut lix cau ok li haꞌ saꞌ li jucub ut qui-oc chi nujac li haꞌ chi saꞌ li jucub. 38Li Jesús cuan chi ixbej saꞌ li jucub ut yo̱ chi cua̱rc saꞌ xbe̱n jun lix soc xjolom. Eb lix tzolom queꞌrajsi ut queꞌxye re: —At tzolonel, ajsi a̱cuu. ¿Ma incꞌaꞌ nacacuil nak osocꞌ ke? chanqueb. 39Quicuacli li Jesús ut quixkꞌus li ikꞌ ut quixye re li palau: —Matchokin. Canab ecꞌa̱nc, chan. Ut saꞌ junpa̱t quichꞌana li ikꞌ ut quitukla ru li haꞌ. 40Ut li Jesús quixye reheb lix tzolom: —¿Cꞌaꞌut nak cꞌajoꞌ nak nequexxucuac? ¿Ma incꞌaꞌ nequepa̱b nak li Dios ta̱tenkꞌa̱nk e̱re? chan. 41Ut cꞌajoꞌ nak queꞌsach xchꞌo̱l lix tzolom ut queꞌxye chi rilbileb rib: —¿Chanru nak cuan xcuanquil li cui̱nk aꞌin nak naxkꞌus li ikꞌ ut li palau, ut nequeꞌabin chiru? chanqueb.

Li Santil hu

© 2000, Wycliffe Bible Translators, Inc. All rights reserved. More Info | Version Index