Search form

San Mateo 22

Li jaljo̱quil ru a̱tin chirix li ninkꞌe caxa̱r

1Li Jesús quia̱tinac cuiꞌchic riqꞌuineb saꞌ jaljo̱quil ru a̱tin. 2Quixye reheb: Lix nimajcual cuanquilal li Dios chanchan jun li rey li quixninkꞌei lix sumlajic li ralal. 3Quixtaklaheb lix mo̱s chixcꞌambaleb chak li ac bokbileb. Aꞌut eb aꞌan incꞌaꞌ queꞌraj cha̱lc. 4Quixtakla cuiꞌchic jalaneb chic lix mo̱s ut quixye reheb: —Yehomak reheb li ac bokbileb, “Ac cꞌubcꞌu li tzacae̱mk, ac xeꞌcamsiman eb li cuacax ut chixjunil li xul li ni̱nk xtibeleb. Ac cauresinbil chixjunil. Cha̱lkex saꞌ li sumla̱c,” chaꞌakex reheb. 5Ut eb aꞌan incꞌaꞌ queꞌraj queꞌrabi ut co̱eb. Cuan co̱eb saꞌ xcꞌaleba̱l ut cuan co̱eb saꞌ xcꞌayiba̱leb. 6Ut eb li jun chꞌol chic queꞌxchapeb lix mo̱s li rey, queꞌxrahobtesiheb ut queꞌxcamsiheb. 7Ut li rey nak quirabi aꞌan, cꞌajoꞌ nak quijoskꞌoꞌ. Quixtaklaheb lix soldado chixcamsinquil li queꞌcamsin reheb lix mo̱s. Ut quixtakla xcꞌatbal lix tenamiteb. 8Tojoꞌnak quixye reheb lix mo̱s: —Ya̱l nak li sumla̱c ac cauresinbil. Abanan li bokbileb ma̱cuaꞌ ajcuiꞌ xcꞌulubeb cha̱lc saꞌ li sumla̱c. 9Anakcuan texxic saꞌ eb li be bar nequeꞌnumeꞌ cuiꞌ li cristian. Ut te̱bokeb saꞌ li ninkꞌe li ani te̱tauheb chak, chan. 10Ut co̱eb lix mo̱s saꞌ eb li be ut queꞌxcꞌameb saꞌ li ninkꞌe li joꞌ qꞌuial queꞌxtau, jun chaliqueb li cha̱bil xnaꞌleb joꞌ ajcuiꞌ li incꞌaꞌ useb xnaꞌleb. Ut quinujac li cab xbaneb li ulaꞌ. 11Ut qui-oc li rey chirilbaleb li rulaꞌ. Nak qui-oc, quiril aran jun li cui̱nk moco tikto ta joꞌ nak tikto̱queb li cuanqueb saꞌ li sumla̱c. 12Li rey quixye re: —At cuami̱g, ¿cꞌaꞌut nak xat-oc chak arin chi incꞌaꞌ tikto̱cat joꞌ nequeꞌxtikib rib li nequeꞌxic saꞌ sumla̱c? chan. Ut li cui̱nk incꞌaꞌ quichakꞌoc. 13Ut li rey quixye reheb lix mo̱s: —Bacꞌomak li rok rukꞌ ut cutumak saꞌ kꞌojyi̱n chirix cab. Aran ut ta̱cua̱nk li ya̱bac ut li cꞌuxuxi̱nc ruch e. 14Nabaleb li bokbileb aban incꞌaꞌ qꞌuiheb li teꞌxtau ru lix ya̱lal. 15Ut chirix aꞌan, co̱eb laj fariseo ut queꞌxcꞌu̱b rib re rilbal chan ta na ru nak ta̱ru̱k nak teꞌxyal rix li Jesús riqꞌuin junak a̱tin re teꞌxjit cuiꞌ. 16Queꞌxtaklaheb lix tzolom rochbeneb li nequeꞌoquen chirix laj Herodes re nak teꞌa̱tinak riqꞌuin li Jesús yal re xsicꞌbal cꞌaꞌru ta̱paltok cuiꞌ riqꞌuin li ra̱tin. Ut queꞌxye re: —At tzolonel, nakanau nak nacara li ya̱l. Ut saꞌ xya̱lal nacacꞌut chiruheb li tenamit cꞌaꞌru naraj li Dios ut ma̱ ani nacaxucua ru ut incꞌaꞌ nacasiqꞌueb ru li ani nacara. 17Ye biꞌ ke cꞌaꞌru nacacꞌoxla chirix li naꞌleb aꞌin. ¿Ma us xqꞌuebal li toj re laj César li Acuabej malaj incꞌaꞌ? chanqueb. 18Ut li Jesús quixnau nak moco anchaleb ta xchꞌo̱l nak yo̱queb chi patzꞌoc. Quixtau ru lix ma̱usilaleb ut quixye reheb: —Ex aj caꞌ pacꞌal u, ¿cꞌaꞌut nak nequeraj xyalbal cuix? 19Cꞌutumak chicuu li tumin li nequextojoc cuiꞌ, chan reheb. Ut queꞌxcꞌut chiru jun li tumin. 20Ut li Jesús quixpatzꞌ reheb: —¿Ani aj e li jalam u̱ch cuan chiru li tumin aꞌin? Ut, ¿ani aj cꞌabaꞌ li tzꞌi̱banbil chiru? chan. 21Ut queꞌchakꞌoc ut queꞌxye re: —Re li Acuabej, chanqueb. Ut li Jesús quixye cuiꞌchic reheb: —Tojomak biꞌ re li Acuabej li cꞌaꞌru re li Acuabej, ut tojomak re li Dios li cꞌaꞌru re li Dios, chan. 22Ut queꞌsach xchꞌo̱l nak queꞌrabi li cꞌaꞌru quixye ut queꞌxcanab li Jesús ut co̱eb.

Li xya̱lal lix cuaclijiqueb li camenak chi yoꞌyo

23Saꞌ li cutan aꞌan queꞌcuulac riqꞌuin li Jesús cuib oxib laj saduceo. Eb aꞌan incꞌaꞌ nequeꞌxpa̱b nak teꞌcuacli̱k cuiꞌchic chi yoꞌyo li camenak. 24Queꞌxye re li Jesús: —At tzolonel, laj Moisés quixtzꞌi̱ba jun li chakꞌrab ut quixye chi joꞌcaꞌin: Cui junak cui̱nk ta̱ca̱mk ut tixcanab li rixakil chi ma̱cꞌaꞌ ralal xcꞌajol, ta̱cꞌamekꞌ li rixakil xban li ri̱tzꞌin li camenak re nak ta̱cua̱nk ralal xcꞌajol saꞌ xcꞌabaꞌ li camenak. 25Queꞌcuan cuukub li cui̱nk ri̱tzꞌineb rib saꞌ kaya̱nk. Li asbej quisumla ut nak quicam ma̱ jun li ralal xcꞌajol quicuan. Ut li rixakil quicꞌameꞌ xban li ri̱tzꞌin li camenak re nak ta̱cua̱nk ralal xcꞌajol saꞌ xcꞌabaꞌ li camenak. 26Ut li cui̱nk aꞌan quicam ajcuiꞌ ut ma̱ jun li ralal xcꞌajol quicuan. Ut joꞌcan cuiꞌchic quicꞌulman toj retal nak queꞌcam chixjunileb li cuukub chi cui̱nk ri̱tzꞌineb rib. 27Ut nak ac xeꞌcam li cuukub chi cui̱nk, quicam ajcuiꞌ li ixk. 28Ut saꞌ xcuaclijiqueb li camenak chi yoꞌyo, nak teꞌcuacli̱k eb aꞌan, ¿ani aj ixakil ta̱cana̱k cuiꞌ li ixk aꞌan, xban nak li cuukub chi cui̱nk queꞌcuan chokꞌ xbe̱lom? chanqueb re li Jesús. 29Nak quichakꞌoc, li Jesús quixye reheb: —La̱ex yo̱quex chixbalakꞌinquil e̱rib xban nak incꞌaꞌ nequetau ru li cꞌaꞌru naxye saꞌ li Santil Hu chi moco nequetau ru lix cuanquil li Dios. 30Nak teꞌcuacli̱k cuiꞌchic chi yoꞌyo li camenak, chanchanakeb chic li ángel saꞌ choxa xban nak incꞌaꞌ teꞌsumla̱k chi moco teꞌsumuba̱nk chic. 31Ut chirix lix cuaclijiqueb li camenak chi yoꞌyo, ¿ma incꞌaꞌ e̱rilom saꞌ li Santil Hu li quixye li Dios e̱re chirix lix cuaclijiqueb li camenak chi yoꞌyo? Quixye chi joꞌcaꞌin: 32La̱in lix Dios laj Abraham, lix Dios aj Isaac, ut lix Dios laj Jacob. Li Dios, aꞌan ma̱cuaꞌ xDioseb li camenakeb; xDioseb ban li yoꞌyo̱queb, chan li Jesús. (Joꞌcan nak li Dios quixcꞌut nak cuan xcuaclijiqueb chi yoꞌyo li camenak.) 33Ut li qꞌuila tenamit queꞌsach xchꞌo̱leb chirabinquil lix ya̱lal li yo̱ chixchꞌolobanquil li Jesús chiruheb.

Li chakꞌrab kꞌaxal nim xcuanquil

34Ut nak laj fariseo queꞌxqꞌue retal nak incꞌaꞌ chic queꞌru xsumenquil li Jesús laj saduceo, eb aꞌan chic queꞌxchꞌutub ribeb chixcꞌu̱banquil chanru teꞌxba̱nu. 35Ut jun reheb, aj tzolol chakꞌrab, quipatzꞌoc re li Jesús yal re xyalbal rix. 36—At tzolonel, chan re li Jesús, ¿Bar cuan li chakꞌrab li kꞌaxal nim xcuanquil?— 37Li Jesús quichakꞌoc ut quixye re: —Li chakꞌrab li kꞌaxal nim xcuanquil, aꞌan aꞌin: Ta̱ra li Ka̱cuaꞌ la̱ Dios chi anchal a̱chꞌo̱l ut chi anchal la̱ cua̱m ut chi anchal la̱ cꞌaꞌux. 38Aꞌan aꞌin li xbe̱n chakꞌrab, li kꞌaxal nim xcuanquil saꞌ xya̱nkeb chixjunil. 39Ut li xcab, chanchan ajcuiꞌ aꞌin: Ta̱ra la̱ cuas a̱cui̱tzꞌin joꞌ nak nacara a̱cuib la̱at. 40Cui nacaba̱nu li cuib chi chakꞌrab aꞌin ac xaba̱nu li naxye saꞌ chixjunil li chakꞌrab joꞌ ajcuiꞌ li yebil xbaneb li profeta, chan li Jesús.

Li Cristo, li yechiꞌinbil xban li Dios, aꞌan ralal xcꞌajol li rey David

41Ut nak toj chꞌutchꞌu̱queb laj fariseo, li Jesús quixpatzꞌ reheb: 42—¿Cꞌaꞌru nequecꞌoxla chirix li Cristo, li yechiꞌinbil xban li Dios? ¿Ani aj alal aj cꞌajol nak nequeye?— Ut queꞌxye re: —Ralal xcꞌajol li rey David.— 43Li Jesús quixye reheb: —¿Cꞌaꞌut nak laj David quixye li cꞌaꞌru quirecꞌa saꞌ xchꞌo̱l xban li Santil Musikꞌej nak quixye “Ka̱cuaꞌ” re li Cristo? Quixye chi joꞌcaꞌin:

44Li Ka̱cuaꞌ Dios quixye re li Ka̱cuaꞌ laj Colol cue, cꞌojlan saꞌ lin nim ukꞌ toj tinqꞌueheb li xicꞌ nequeꞌiloc a̱cue rubel la̱ cuanquil, chan. (Sal. 110:1)

45Li rey David quixye “Ka̱cuaꞌ” re, usta aꞌan xcomoneb li ralal xcꞌajol.— 46Ut ma̱ jun chic quiru chi sume̱nc re li Jesús. Ut chalen saꞌ li cutan aꞌan, ma̱ ani chic quixcacuu xchꞌo̱l chi patzꞌoc re li Jesús.

Li Santil hu

© 2000, Wycliffe Bible Translators, Inc. All rights reserved. More Info | Version Index