Search form

San Mateo 28

Li Jesús quicuacli cuiꞌchic chi yoꞌyo saꞌ xya̱nkeb li camenak

1Nak ac xnumeꞌ li hiloba̱l cutan, sake̱uc re li xbe̱n cutan re li xama̱n, quicuulac lix María aj Magdala rochben lix María jun chic chirilbal li mukleba̱l. 2Toj ma̱jiꞌ ajcuiꞌ nequeꞌcuulac nak quicuan jun nimla hi̱c. Ut jun x-ángel li Ka̱cuaꞌ quicube chak saꞌ choxa ut quixbalkꞌusi li pec ut quicꞌojla saꞌ xbe̱n. 3Li riloba̱l nalemtzꞌun chanchan rakꞌ ca̱k ut li rakꞌ sak sak joꞌ li ratzꞌam que. 4Ut eb li yo̱queb chi cꞌacꞌale̱nc re li mukleba̱l nequeꞌsicsot xban xxiuheb chirilbal li quicꞌulman. Chanchan camenak queꞌcana. 5Ut nak queꞌcuulac li ixk, li ángel quixye reheb: —Mexxucuac la̱ex. La̱in ninnau nak yo̱quex chixsicꞌbal li Jesús li quicam chiru cruz. 6Ma̱ ani chic arin. Ac xcuacli chi yoꞌyo joꞌ quixye e̱re. Quimkex arin. Ilomak lix naꞌaj bar queꞌxqꞌue cuiꞌ li Ka̱cuaꞌ. 7Ayukex saꞌ junpa̱t ut yehomak reheb lix tzolom nak ac xcuacli chi yoꞌyo saꞌ xya̱nkeb li camenak. Ut anakcuan ta̱xic Galilea ut aꞌan xbe̱n cua ta̱cuulak che̱ru la̱ex. Aran toxe̱ril ru. Caꞌaj cuiꞌ aꞌin li tinye e̱re, chan li ángel. 8Teꞌxucuak li ixk nak queꞌel saꞌ li mukleba̱l. Abanan quisahoꞌ ajcuiꞌ saꞌ xchꞌo̱leb riqꞌuin li cꞌaꞌru queꞌrabi. Ut co̱eb saꞌ a̱nil chixyebal resil reheb lix tzolom li Jesús. 9Yo̱queb chi xic nak xaka̱mil li Jesús chiruheb ut quixqꞌue xsahileb xchꞌo̱l. Ut eb li ixk queꞌnachꞌoc riqꞌuin ut queꞌxcuikꞌib ribeb chiru. Queꞌxkꞌalu li rok ut queꞌxlokꞌoni. 10Li Jesús quixye reheb: —Mexxucuac. Ayukex ut yehomak resil reheb lin herma̱n re nak teꞌxic Galilea. Ut aran teꞌril cuu, chan.

Eb li xbe̱nil aj tij queꞌxtumina ruheb li soldado re nak teꞌxye li ticꞌtiꞌ

11Ut nak yo̱queb chi xic li ixk, cuanqueb laj cꞌacꞌalenel queꞌco̱eb saꞌ tenamit chixyebal resil reheb lix be̱nil aj tij chixjunil li cꞌaꞌak re ru quicꞌulman. 12Ut lix be̱nil aj tij queꞌxchꞌutub ribeb rochbeneb li nequeꞌcꞌamoc be saꞌ xya̱nkeb laj judío ut queꞌxcꞌu̱b ribeb nak teꞌxqꞌue nabal li tumin reheb li soldado. 13Ut queꞌxye reheb: —Joꞌcaꞌin te̱ye: “Eb lix tzolom queꞌcuulac chi kꞌek ut queꞌrelkꞌa li camenak nak yo̱co chi cua̱rc,” chaꞌkex. 14Ut queꞌxye cuiꞌchic reheb li soldado li queꞌcꞌacꞌalen re li mukleba̱l: —Cui ta̱rabi resil aꞌin li acuabej, la̱o to-oque̱nk che̱rix ut texkacol, chanqueb. 15Ut eb li soldado queꞌxcꞌul li tumin ut queꞌxba̱nu joꞌ queꞌyeheꞌ reheb. Ut li resil aꞌin quisutun saꞌ xya̱nkeb laj judío chalen toj saꞌ li cutan anakcuan.

Li Jesucristo quixcꞌutbesi rib chiruheb lix tzolom

16Ut lix tzolom junlaju co̱eb Galilea saꞌ xbe̱n li tzu̱l li queꞌyeheꞌ reheb xban li Jesús. 17Ut nak queꞌril ru li Jesús, queꞌxlokꞌoni. Abanan cuanqueb saꞌ xya̱nkeb lix tzolom li queꞌcuiban xchꞌo̱l chixpa̱banquil. 18Li Jesús quinachꞌoc riqꞌuineb ut quixye reheb: —Chixjunil li cuanquil qꞌuebil cue xban li Dios, joꞌ saꞌ choxa joꞌ saꞌ ruchichꞌochꞌ. 19Joꞌcan utan texxic saꞌ chixjunil li ruchichꞌochꞌ ut te̱chꞌolob lix ya̱lal chiruheb chixjunileb li tenamit re nak teꞌpa̱ba̱nk. Te̱cubsiheb xhaꞌ saꞌ xcꞌabaꞌ li Dios Acuabej, saꞌ xcꞌabaꞌ li Dios Cꞌajolbej ut saꞌ xcꞌabaꞌ li Dios Santil Musikꞌej. 20Te̱cꞌut chiruheb xpa̱banquil chixjunil li xinye chak e̱re. Chenauhak nak la̱in cua̱nkin e̱riqꞌuin chixjunil li cutan chalen toj saꞌ rosoꞌjic li ruchichꞌochꞌ. Joꞌcan taxak.

Li Santil hu

© 2000, Wycliffe Bible Translators, Inc. All rights reserved. More Info | Version Index