Search form

San Mateo 6

Li xya̱lal chirix xba̱nunquil usilal

1Cheqꞌuehak retal cꞌaꞌru nequeba̱nu. Cui la̱ex te̱ba̱nu li usilal yal re nak tex-ilekꞌ joꞌ nequeꞌxba̱nu eb laj fariseo, ma̱cꞌaꞌak le̱ kꞌajca̱munquil riqꞌuin le̱ Yucuaꞌ cuan saꞌ choxa. 2Ut nak ta̱si li cꞌaꞌak re ru re li ani ta̱raj tenkꞌa̱c, ma̱ba̱nu joꞌ nequeꞌxba̱nu laj caꞌ pacꞌal u. Eb aꞌan nequeꞌxic saꞌ li cab li nequeꞌxchꞌutub cuiꞌ ribeb laj judío ut saꞌ eb li cꞌayil chixyebal resil li usilal nequeꞌxba̱nu re nak teꞌqꞌuehekꞌ xlokꞌal xbaneb li cui̱nk. Relic chi ya̱l tinye e̱re nak eb aꞌan ac xeꞌxcꞌul lix kꞌajca̱munquil nak queꞌqꞌueheꞌ xlokꞌal xbaneb li cui̱nk. 3Li cꞌaꞌru ta̱si re li ma̱cꞌaꞌ cuan re, ma̱ ani aj e ta̱serakꞌi li cꞌaꞌru xasi, chi moco ta̱serakꞌi re li tzꞌakal a̱cuami̱g. 4Chaba̱nu ban chi mukmu ut la̱ yucuaꞌ li naxnau chixjunil li cꞌaꞌak re ru nacaba̱nu, aꞌan li ta̱kꞌajca̱mu̱nk a̱cue.

Li Jesús naxchꞌolob xya̱lal li tijoc

5Ut nak textijok moco joꞌcakex ta eb laj caꞌ pacꞌal u. Eb aꞌan nequeꞌxxakab chak ribeb chi tijoc saꞌ eb li cab li nequeꞌxchꞌutub cuiꞌ ribeb laj judío ut nequeꞌxxakab rib chi tijoc saꞌ xa̱la be yal re nak teꞌilekꞌ. Relic chi ya̱l tinye e̱re nak eb aꞌan ac xeꞌxcꞌul lix kꞌajca̱munquileb nak queꞌqꞌueheꞌ xlokꞌal xbaneb li cui̱nk. 6Ut nak textijok la̱ex, ocankex saꞌ le̱ rochoch, tzꞌapomak re li cab, ut tijonkex chiru le̱ Yucuaꞌ li incꞌaꞌ na-ilman ru. Ut le̱ Yucuaꞌ li naril chixjunil li cꞌaꞌru nequeba̱nu, aꞌan ta̱kꞌajca̱mu̱nk e̱re. 7Ut nak textijok, me̱ye qꞌuila a̱tin chi ma̱cꞌaꞌ rajbal joꞌ nequeꞌxba̱nu li incꞌaꞌ nequeꞌxpa̱b li Dios. Eb aꞌan nequeꞌxcꞌoxla nak riqꞌuin li qꞌuila a̱tin, teꞌabi̱k xban li Dios. 8Me̱juntakꞌe̱ta biꞌ e̱rib riqꞌuin eb aꞌan xban nak le̱ Yucuaꞌ naxnau cꞌaꞌru nacꞌanjelac e̱re chi toj ma̱jiꞌ nequetzꞌa̱ma chiru. 9Ut la̱ex joꞌcaꞌin nak textijok:

At Ka̱cuaꞌ, cuancat saꞌ li santil choxa, lokꞌoninbilak taxak la̱ santil cꞌabaꞌ.

10Chicha̱lk ta la̱ nimajcual cuanquilal. Chi-uxk ta li nacacuaj, joꞌ saꞌ choxa joꞌ ajcuiꞌ saꞌ ruchichꞌochꞌ.

11Chaqꞌue taxak ke li kacua kucꞌa chi cuulaj cuulaj.

12Ut chacuy chasach ta li kama̱c joꞌ nak nakacuyeb xma̱c li nequeꞌma̱cob chiku.

13Ut moa̱qꞌue taxak chi a̱le̱c. Choa̱col ban chiru li incꞌaꞌ us. A̱cue li nimajcual cuanquil, li lokꞌoni̱c ut li lokꞌal chi junelic kꞌe cutan. Joꞌcan taxak.

14Cui nequecuy xma̱queb le̱ ras e̱ri̱tzꞌin, tixcuy ajcuiꞌ e̱ma̱c la̱ex le̱ Yucuaꞌ cuan saꞌ choxa. 15Cui incꞌaꞌ nequecuy xma̱queb le̱ ras e̱ri̱tzꞌin, joꞌcan ajcuiꞌ la̱ex incꞌaꞌ ta̱cuyekꞌ e̱ma̱c xban le̱ Yucuaꞌ cuan saꞌ choxa.

Li Jesús quixchꞌolob xya̱lal li ayunic

16Ut nak te̱ba̱nu le̱ ayu̱n, me̱ba̱nu joꞌ nequeꞌxba̱nu laj caꞌ pacꞌal u. Eb aꞌan nequeꞌxba̱nu rib nak raheb saꞌ xchꞌo̱l yal re nak ta̱naꞌekꞌ nak yo̱queb xba̱nunquil lix ayu̱n. Relic chi ya̱l tinye e̱re nak eb aꞌan ac xeꞌxcꞌul lix kꞌajca̱munquil. 17Aꞌut la̱ex nak te̱ba̱nu le̱ ayu̱n, te̱chꞌaj le̱ ru ut te̱yi̱b e̱rib chi us, 18re nak incꞌaꞌ ta̱cꞌutu̱nk chiruheb le̱ ras e̱ri̱tzꞌin nak yo̱quex chi ayunic. Chicꞌutu̱nk ban chiru le̱ Yucuaꞌ li incꞌaꞌ na-ilman ru. Ut le̱ Yucuaꞌ li naxnau chixjunil li nequeba̱nu, aꞌan ta̱kꞌajca̱mu̱nk e̱re.

Li kabiomal saꞌ choxa

19Me̱qꞌue e̱chꞌo̱l chixcꞌu̱lanquil e̱biomal saꞌ ruchichꞌochꞌ bar cuiꞌ namaxen ut nakꞌolen ru ut bar cuiꞌ nequeꞌoc laj e̱lkꞌ chi elkꞌac. 20Qꞌuehomak ban e̱chꞌo̱l chirix le̱ biomal cuan saꞌ choxa bar cuiꞌ incꞌaꞌ namaxen chi moco nakꞌolen ru ut bar cuiꞌ incꞌaꞌ ta̱elkꞌa̱k. 21Joꞌcan nak chenauhak nak bar cuan cuiꞌ le̱ biomal, aran ajcuiꞌ cua̱nk le̱ cꞌaꞌux. 22Li xnakꞌ e̱ru chanchan jun li lámpara. Xban nak na-iloc li xnakꞌ e̱ru, cuanquex saꞌ cutan. Chanchan le̱ naꞌleb. Cui cha̱bil le̱ naꞌleb, cuanquex saꞌ cutan saken. 23Cui ut incꞌaꞌ saken na-iloc li xnakꞌ e̱ru, cuanquex saꞌ kꞌojyi̱n. Ut joꞌcan ajcuiꞌ le̱ naꞌleb. Cui incꞌaꞌ cha̱bil le̱ naꞌleb, cuanquex saꞌ xkꞌojyi̱nal ru li ma̱c. 24Ma̱ ani naru nacꞌanjelac chiru cuib chi patrón. Naru tixra li jun ut tixtzꞌekta̱na li jun chic malaj ut xicꞌ ta̱ril li jun ut tix-oxlokꞌi li jun chic. Joꞌcan nak ma̱ jokꞌe naru te̱cꞌoxla li Dios cui caꞌaj cuiꞌ le̱ biomal nequecꞌoxla.

Mexcꞌoxlac chirix chanru te̱numsi li cutan junju̱nk arin saꞌ ruchichꞌochꞌ

25Joꞌcan ut nak ninye e̱re: Mixic e̱chꞌo̱l chirix le̱ cua e̱rucꞌa chi moco chirix chanru te̱tikib e̱rib. ¿Ma incꞌaꞌ ta biꞌ kꞌaxal lokꞌ li kayuꞌam chiru li cꞌaꞌru takatzaca? ¿Ma incꞌaꞌ ta biꞌ kꞌaxal lokꞌ li kayuꞌam chiru li kakꞌ? 26Cheqꞌuehak retal li xul li nequeꞌrupupic chiru choxa. Eb aꞌan incꞌaꞌ nequeꞌau, chi moco nequeꞌkꞌoloc chi moco nequeꞌxxoc xtzacae̱mk saꞌ cꞌu̱leba̱l. Ut le̱ Yucuaꞌ cuan saꞌ choxa, aꞌan naqꞌuehoc xcuaheb. ¿Ma incꞌaꞌ ta biꞌ kꞌaxal raro̱quex la̱ex chiruheb aꞌan? 27¿Ani e̱re la̱ex ta̱ru̱k tixtik ru lix yuꞌam usta naxic xchꞌo̱l xcꞌoxlanquil? 28¿Cꞌaꞌut nak naxic e̱chꞌo̱l chi cꞌoxlac chirix le̱ rakꞌ? Qꞌuehomak retaleb li utzꞌuꞌuj saꞌ pim chanru nak nequeꞌqꞌui chi incꞌaꞌ nequeꞌcꞌanjelac chi moco nequeꞌquemoc. 29Aꞌut la̱in tinye e̱re, usta cꞌajoꞌ xchakꞌal ru lix tikibanquil laj Salomón, abanan incꞌaꞌ quixtau xchakꞌal ru li utzꞌuꞌuj aꞌin. 30La̱ex incꞌaꞌ nequexpa̱ban chi tzꞌakal. Ut cui li Dios naxqꞌue lix chꞌinaꞌusal li pim li cuan junpa̱t ajcuiꞌ ut cuulaj qꞌuebilak saꞌ xam, ¿ma tojaꞌ ta chic la̱ex incꞌaꞌ textikib? 31Joꞌcan ut nak moco yo̱kex ta chixyebal: ¿Cꞌaꞌru takatzaca anakcuan? chi moco, ¿cꞌaꞌru takatikib cuiꞌ kib? 32Li incꞌaꞌ nequeꞌxpa̱b li Dios nequeꞌxqꞌue xchꞌo̱l xcꞌoxlanquil aꞌan. Abanan le̱ Yucuaꞌ li cuan saꞌ choxa naxnau li cꞌaꞌru nequeraj ru. 33Li cꞌaꞌru li te̱sicꞌ xbe̱n cua, aꞌan lix nimajcual cuanquilal li Dios ut lix ti̱quilal, ut chixjunil li cꞌaꞌak re ru aꞌin talajqꞌuehekꞌ e̱re chokꞌ xtzꞌakob. 34Joꞌcan ut nak mexcꞌoxlac chirix li cutan re cuulaj xban nak aꞌan ta̱cꞌoxlama̱nk ajcuiꞌ cuulaj. Tzꞌakalak riqꞌuin li chꞌaꞌajquilal li naxcꞌam chak li junju̱nk chi cutan.

Li Santil hu

© 2000, Wycliffe Bible Translators, Inc. All rights reserved. More Info | Version Index