Search form

Romanos 2

Li Dios narakoc a̱tin saꞌ ti̱quilal

1¿Anihat la̱at nak tatrakok a̱tin saꞌ xbe̱neb la̱ cuas a̱cui̱tzꞌin? Cui nacarak a̱tin saꞌ xbe̱neb la̱ cuas a̱cui̱tzꞌin ut toj yo̱cat ajcuiꞌ chixba̱nunquil li incꞌaꞌ us la̱at joꞌ yo̱queb aꞌan, raylal ajcuiꞌ yo̱cat chixbokbal saꞌ a̱be̱n ut ta̱rakekꞌ a̱tin saꞌ a̱be̱n. 2Nakanau nak li Dios ti̱c xchꞌo̱l ut aꞌan ta̱rakok a̱tin chi tzꞌakal saꞌ xbe̱neb li nequeꞌba̱nun re li ma̱usilal. 3La̱at nacatrakoc a̱tin saꞌ xbe̱neb li nequeꞌba̱nun re li ma̱usilal ut nacaba̱nu ajcuiꞌ li ma̱usilal la̱at. ¿Cꞌaꞌru nacaye? ¿Ma incꞌaꞌ ta biꞌ tatxqꞌue li Dios chixtojbal rix a̱ma̱c la̱at? 4¿Ma ta̱tzꞌekta̱na lix nimal ruxta̱n li Dios? ¿Ma ta̱tzꞌekta̱na lix cuyum ut lix kꞌunil xchꞌo̱l? ¿Ma incꞌaꞌ nacaqꞌue retal nak xban lix nimal rusilal li Dios naraj nak ta̱yotꞌ a̱chꞌo̱l ta̱jal a̱cꞌaꞌux? 5Aban la̱at cau a̱chꞌo̱l. Joꞌcan nak incꞌaꞌ nacayotꞌ a̱chꞌo̱l incꞌaꞌ nacajal a̱cꞌaꞌux. Ut riqꞌuin aꞌan yo̱cat chixbokbal xjoskꞌil li Dios saꞌ a̱be̱n. Toxa̱cuil xjoskꞌil nak ta̱cuulak xkꞌehil nak li Dios ta̱rakok a̱tin saꞌ ti̱quilal. 6Saꞌ li cutan aꞌan li Dios tixqꞌue xkꞌajca̱munquil li junju̱nk aꞌ yal chanru lix yehom xba̱nuhomeb. 7Li Dios tixqꞌue xyuꞌam chi junelic li ani naxqꞌue xchꞌo̱l chixba̱nunquil li cha̱bilal li naraj li Dios re nak tixtau lix lokꞌal, lix nimanquil ru, ut lix yuꞌam chi junelic. 8Aban riqꞌuin xjoskꞌil li Dios tixqꞌueheb chixtojbal xma̱queb li nequeꞌxnimobresi rib ut incꞌaꞌ nequeꞌraj xpa̱banquil lix ya̱lal. Eb aꞌan caꞌaj cuiꞌ li incꞌaꞌ us nequeꞌxcꞌoxla. 9Raylal ut ra xi̱cꞌ ta̱cha̱lk saꞌ xbe̱neb chixjunileb li nequeꞌba̱nun re li incꞌaꞌ us. Xbe̱n cua ta̱cha̱lk saꞌ xbe̱neb laj judío ut ta̱cha̱lk ajcuiꞌ saꞌ xbe̱neb li ma̱cuaꞌeb aj judío. 10Aban li Dios tixqꞌue xcuanquil, xlokꞌal ut tuktu̱quil usilal reheb chixjunileb li nequeꞌba̱nun re li cha̱bilal. Tixqꞌue xbe̱n cua reheb laj judío ut tixqꞌue ajcuiꞌ reheb li ma̱cuaꞌeb aj judío. 11Li Dios incꞌaꞌ naxsicꞌ ru li junju̱nk. Junajo ban chiru. 12Li ani nequeꞌma̱cob chi incꞌaꞌ nequeꞌxnau li chakꞌrab li quiqꞌueheꞌ re laj Moisés xban li Dios, ta̱rakekꞌ a̱tin saꞌ xbe̱neb ut teꞌsachk usta incꞌaꞌ nequeꞌxnau li chakꞌrab. Ut chixjunileb li nequeꞌxnau li chakꞌrab ut nequeꞌma̱cob, ta̱rakekꞌ ajcuiꞌ a̱tin saꞌ xbe̱neb joꞌ naxye saꞌ li chakꞌrab. 13Chiru li Dios incꞌaꞌ ti̱c xchꞌo̱l junak yal riqꞌuin xnaubal li chakꞌrab. Aban li nequeꞌba̱nun re li naxye li chakꞌrab ti̱queb xchꞌo̱l chiru li Dios. 14Li ma̱cuaꞌeb aj judío incꞌaꞌ nequeꞌxnau li chakꞌrab li quiqꞌueheꞌ re laj Moisés. Abanan usta ma̱cꞌaꞌ li chakꞌrab, cuan ajcuiꞌ nak nequeꞌxba̱nu joꞌ naxye saꞌ li chakꞌrab xban nak nequeꞌrecꞌa saꞌ xchꞌo̱l cꞌaꞌru li us ut cꞌaꞌru li incꞌaꞌ us. 15Nacꞌutun riqꞌuin lix yehom xba̱nuhomeb nak ac nequeꞌxnau cꞌaꞌru naxye saꞌ li chakꞌrab usta ma̱ jun sut rabiomeb li chakꞌrab. Nequeꞌrecꞌa saꞌ xchꞌo̱leb ma us malaj incꞌaꞌ us li yo̱queb chixba̱nunquil. 16Xakabanbil li Jesucristo xban li Dios re ta̱rakok a̱tin saꞌ xbe̱neb chixjunileb nak ta̱cuulak xkꞌehil. Li Cristo naxnau chanru lix chꞌo̱l li junju̱nk usta mukmu chiku la̱o. Joꞌcan naxye resilal li colba-ib li ninjultica la̱in.

Eb laj judío ut lix chakꞌrab laj Moisés

17La̱at aj judío, ut riqꞌuin aꞌan nacanimobresi a̱cuib, ut nacaye nak li Dios aꞌan aj e̱chal a̱cue. Ut nacacꞌojob a̱chꞌo̱l riqꞌuin lix chakꞌrab laj Moisés. 18Xban nak xatzol li chakꞌrab, nacanau cꞌaꞌru naraj li Dios. Nacanau cꞌaꞌru li us ut nacanau cꞌaꞌru li incꞌaꞌ us. 19Nacaqꞌue a̱cuib joꞌ aj cꞌutul xbeheb li mutzꞌ. Nacaye nak la̱at xcutaneb li cuanqueb saꞌ kꞌojyi̱n. Nincꞌut lix ya̱lal chiruheb, chancat. 20Nacaye nak la̱at aj tzolol reheb li incꞌaꞌ tzolbileb ut li incꞌaꞌ nequeꞌxnau xya̱lal. Nacaye nak saꞌ li chakꞌrab nacatau a̱naꞌleb chi tzꞌakal ut aran nacatau xya̱lal. 21Cui la̱at nacatzoleb li jalan chic, ¿cꞌaꞌut nak incꞌaꞌ nacatzol a̱cuib la̱at? La̱at nacachꞌolob xya̱lal nak incꞌaꞌ us li elkꞌac. ¿Cꞌaꞌut nak toj yo̱cat ajcuiꞌ chi elkꞌac la̱at? 22La̱at nacaye nak incꞌaꞌ us li muxuc caxa̱r. ¿Cꞌaꞌut nak toj nacatmuxuc caxa̱r la̱at? Cui xicꞌ nacacuil eb li yi̱banbil dios, ¿cꞌaꞌut nak nacatxic chi elkꞌac saꞌ li rochocheb? 23Kꞌaxal nim a̱cuanquil nak nacacuecꞌa a̱cuib xban nak nacanau li chakꞌrab li quiqꞌueheꞌ re laj Moisés. Abanan nacatzꞌekta̱na li Dios riqꞌuin nak nacakꞌet lix chakꞌrab. 24Joꞌ naxye saꞌ li Santil Hu: Saꞌ e̱cꞌabaꞌ la̱ex aj judío, nequeꞌxmajecua li Dios li ma̱cuaꞌeb aj judío. (Isa. 52:5) 25Relic chi ya̱l li circuncisión cuan xya̱lal cui nacapa̱b li chakꞌrab li quiqꞌueheꞌ re laj Moisés xban li Dios. Aban cui nacakꞌet lix chakꞌrab ma̱cꞌaꞌ na-oc cuiꞌ nak xacꞌul li circuncisión. 26Cui junak cui̱nk ma̱cuaꞌ aj judío incꞌaꞌ naxcꞌul li circuncisión, aban naxpa̱b ut naxba̱nu li cꞌaꞌru naxye li chakꞌrab, li cui̱nk aꞌan ta̱qꞌuehekꞌ ajcuiꞌ saꞌ ajl saꞌ xya̱nkeb li queꞌxcꞌul li circuncisión. 27Usta incꞌaꞌ xcꞌul li circuncisión cui naxba̱nu tzꞌakal li tzꞌi̱banbil saꞌ li chakꞌrab, li cui̱nk aꞌan naxcꞌut a̱xuta̱n ut ta̱rakekꞌ a̱tin saꞌ a̱be̱n xban nak nacakꞌet li chakꞌrab. Ma̱cꞌaꞌ na-oc cuiꞌ a̱cue nak xacꞌul li circuncisión, chi moco nak nacanau li tzꞌi̱banbil saꞌ li chakꞌrab cui incꞌaꞌ nacaba̱nu li cꞌaꞌru naxye. 28Li tzꞌakal aj judío ma̱cuaꞌ aj judío yal xban xcꞌulbal li circuncisión. Riqꞌuin ban xpa̱banquil li chakꞌrab. Lix ya̱lal li circuncisión ma̱cuaꞌ caꞌaj cuiꞌ li na-ux riqꞌuin li tzꞌejcualej. 29Li tzꞌakal aj judío naxpa̱b chi tzꞌakal lix chakꞌrab li Dios. Ut li tzꞌakal circuncisión incꞌaꞌ nacꞌulman riqꞌuin xba̱nunquil li chakꞌrab. Aꞌan ban li naxba̱nu li Santil Musikꞌej saꞌ li ra̱m li junju̱nk. Ut lix lokꞌal laj pa̱banel incꞌaꞌ naqꞌueheꞌ xbaneb li cui̱nk. Li Dios ban naqꞌuehoc xlokꞌal.

Li Santil hu

© 2000, Wycliffe Bible Translators, Inc. All rights reserved. More Info | Version Index