Search form

Romanos 4

Xban nak cuan xpa̱ba̱l laj Abraham, joꞌcan nak quiti̱cobresi̱c xchꞌo̱l xban li Dios

1Anakcuan tina̱tinak chirix laj Abraham li kaxeꞌto̱nil yucuaꞌ. ¿Ma quiti̱cobresi̱c xchꞌo̱l chiru li Dios riqꞌuin lix yehom xba̱nuhom? Incꞌaꞌ. 2Cui ta riqꞌuin xyehom xba̱nuhom quiti̱cobresi̱c xchꞌo̱l laj Abraham, cuan raj cꞌaꞌru quixnimobresi cuiꞌ rib. Abanan ma̱cuaꞌ raj chiru li Dios. 3Tzꞌi̱banbil saꞌ li Santil Hu nak laj Abraham quixpa̱b li cꞌaꞌru quixye li Dios. Ut xban lix pa̱ba̱l, li Dios quixye nak laj Abraham aꞌan jun cui̱nk ti̱c xchꞌo̱l. (Gén. 15:6) 4Li ani natrabajic naxcꞌul xtojbal. Lix tojbal naxcꞌul aꞌan moco yal xma̱tan ta xban nak ac xtoj rix. 5Aban li colba-ib incꞌaꞌ natojman rix. Aꞌan yal jun ma̱tan naxqꞌue li Dios reheb laj ma̱c li nequeꞌpa̱ban re. Xban nak nequeꞌpa̱ban, ti̱cobresinbileb xchꞌo̱l xban li Dios. 6Laj David quixye nak us xak re li naxma̱tani xti̱quilal xchꞌo̱l riqꞌuin li Dios chi ma̱cuaꞌ xban xyehom xba̱nuhom. Yal chi ma̱tan ban naxcꞌul lix ti̱quilal xchꞌo̱l. 7Laj David quixye chi joꞌcaꞌin:

Us xak reheb li cuybil sachbil xma̱queb, xban nak incꞌaꞌ chic nanak saꞌ xchꞌo̱l li Dios lix ma̱usilaleb.

8Us xak reheb li incꞌaꞌ chic nequeꞌcꞌoxla̱c lix ma̱queb xban li Dios. (Sal. 32:1-2)

9¿Ut aniheb li teꞌcuyekꞌ teꞌsachekꞌ lix ma̱c? ¿Ma caꞌaj cuiꞌ li queꞌxcꞌul li circuncisión? Incꞌaꞌ. Reheb aj ban cuiꞌ li incꞌaꞌ queꞌxcꞌul li circuncisión. Ac xinye li cꞌaꞌru tzꞌi̱banbil saꞌ li Santil Hu chirix laj Abraham. Xban nak cuan xpa̱ba̱l laj Abraham, li Dios quixye nak aꞌan jun cui̱nk ti̱c xchꞌo̱l. (Gén. 15:6) 10Laj Abraham ma̱jiꞌ naxcꞌul li circuncisión nak li Dios quixye nak li cui̱nk aꞌan ti̱c xchꞌo̱l. 11Mokon chic laj Abraham quixcꞌul li circuncisión joꞌ retalil nak aꞌan jun cui̱nk ti̱c xchꞌo̱l chiru li Dios xban lix pa̱ba̱l. Laj Abraham quixpa̱b li Dios nak ma̱jiꞌ naxcꞌul li circuncisión. Joꞌcan nak nayeman nak laj Abraham aꞌan xyucuaꞌeb chixjunileb li nequeꞌxpa̱b li Dios ut nequeꞌqꞌueheꞌ saꞌ ajl saꞌ xya̱nkeb li ti̱queb xchꞌo̱l usta incꞌaꞌ nequeꞌxcꞌul li circuncisión. 12Ut laj Abraham xyucuaꞌeb ajcuiꞌ li queꞌxcꞌul li circuncisión. Ma̱cuaꞌ caꞌaj cuiꞌ xban nak queꞌxcꞌul li circuncisión. Xyucuaꞌeb aj ban cuiꞌ xban nak queꞌxpa̱b li Dios joꞌ nak quixpa̱b li Dios laj Abraham nak toj ma̱jiꞌ naxcꞌul li circuncisión.

Xban li pa̱ba̱l nacꞌulman li naxyechiꞌi li Dios

13Li Dios quixyechiꞌi re laj Abraham joꞌ ajcuiꞌ reheb li ralal xcꞌajol nak eb aꞌan teꞌe̱chani̱nk re li ruchichꞌochꞌ. Ma̱cuaꞌ riqꞌuin xba̱nunquil li naxye li chakꞌrab nak teꞌre̱chani. Quiyechiꞌi̱c ban reheb xban nak quipa̱ban laj Abraham ut li Dios quixye nak laj Abraham aꞌan jun cui̱nk ti̱c xchꞌo̱l. 14Cui ta caꞌaj cuiꞌ li cuanqueb rubel xcuanquil li najter chakꞌrab li teꞌe̱chani̱nk re li yechiꞌinbil xban li Dios, ma̱cꞌaꞌ raj na-oc cuiꞌ li kapa̱ba̱l. Ut ma̱cꞌaꞌ raj na-oc cuiꞌ li yechiꞌinbil xban li Dios. 15Nachal xjoskꞌil li Dios saꞌ xbe̱neb li nequeꞌkꞌetoc re li chakꞌrab. Xban nak cuan li chakꞌrab, cuan li kꞌetoc a̱tin. Cui ta ma̱cꞌaꞌ li chakꞌrab, ma̱cꞌaꞌ raj kꞌetoc a̱tin. 16Xban nak cuan xpa̱ba̱l laj Abraham, li Dios quixyechiꞌi li ma̱tan re xban xnimal rusilal. Ut quixyechiꞌi ajcuiꞌ reheb chixjunileb li ralal xcꞌajol. Li yechiꞌinbil ma̱cuaꞌ caꞌaj cuiꞌ reheb li cuanqueb rubel xcuanquil li chakꞌrab. Reheb aj ban cuiꞌ chixjunileb li nequeꞌpa̱ban joꞌ nak quipa̱ban laj Abraham. Joꞌcan nak nayeman nak laj Abraham aꞌan li kayucuaꞌ chikajunilo xban nak aꞌan laj cꞌamol be chiku saꞌ li kapa̱ba̱l. 17Tzꞌi̱banbil saꞌ li Santil Hu li quixye li Dios re laj Abraham: Xatinqꞌue chokꞌ xxeꞌto̱nil yucuaꞌ li qꞌuila tenamit. (Gén. 17:5)

Ut chiru li Dios toj cuan ajcuiꞌ xcuanquil li cꞌaꞌru quixyechiꞌi re laj Abraham. Laj Abraham quixpa̱b li Dios li nacuaclesin cuiꞌchic reheb li camenak chi yoꞌyo ut yal riqꞌuin ra̱tin naxyoꞌobtesiheb li cꞌaꞌak re ru toj ma̱cꞌaꞌ. 18Laj Abraham quixpa̱b li quixye li Dios ut quiroybeni li quiyechiꞌi̱c re usta incꞌaꞌ naxnau chanru nak ta̱qꞌuehekꞌ re li ralal xcꞌajol. Joꞌcan nak aꞌan xyucuaꞌeb li qꞌuila tenamit joꞌ quiyeheꞌ re xban li Dios, —Teꞌqꞌuia̱nk la̱ cualal a̱cꞌajol, chuꞌux re xban li Dios. (Gén. 15:5) 19Caꞌchꞌin chic ma̱ oꞌcꞌa̱l chihab cuan re laj Abraham. Aꞌan naxnau nak xban xti̱xilal incꞌaꞌ raj chic ta̱cua̱nk ralal xcꞌajol. Ut naxnau ajcuiꞌ nak lix Sara incꞌaꞌ naqꞌuiresin. Aban incꞌaꞌ quichꞌinan xchꞌo̱l laj Abraham. Quixpa̱b ban chi tzꞌakal nak ta̱cua̱nk ralal xcꞌajol. 20Incꞌaꞌ quixcuiba xchꞌo̱l chi moco quixcanab roybeninquil lix ma̱tan li quiyechiꞌi̱c re xban li Dios. Cacuu̱c ban chic quixba̱nu saꞌ lix pa̱ba̱l ut quixlokꞌoni li Dios. 21Laj Abraham quixpa̱b chi anchal xchꞌo̱l nak li Dios kꞌaxal nim xcuanquil ut tixqꞌue li cꞌaꞌru naxyechiꞌi. 22Ut xban lix pa̱ba̱l laj Abraham, li Dios quixye nak aꞌan jun cui̱nk ti̱c xchꞌo̱l. 23Ut moco caꞌaj cuiꞌ ta saꞌ xcꞌabaꞌ laj Abraham nak quitzꞌi̱ba̱c retalil nak ti̱c xchꞌo̱l xban lix pa̱ba̱l. 24Quitzꞌi̱ba̱c aj ban cuiꞌ saꞌ kacꞌabaꞌ la̱o. Li Dios naxye nak ti̱c ajcuiꞌ li kachꞌo̱l la̱o cui takapa̱b chi tzꞌakal li quicuaclesin re li Ka̱cuaꞌ Jesucristo chi yoꞌyo saꞌ xya̱nkeb li camenak. 25Li Jesucristo quixkꞌaxtesi rib chi ca̱mc xban li kama̱c ut quicuacli cuiꞌchic chi yoꞌyo saꞌ xya̱nkeb li camenak re xti̱cobresinquil li kachꞌo̱l chiru li Dios.

Li Santil hu

© 2000, Wycliffe Bible Translators, Inc. All rights reserved. More Info | Version Index