Search form

Gn 39

Laj José aran Ejiipt

1Naq laj José kik'ame'k Ejiipt, jun li winq, aj Putifar xk'ab'a', aj Ejiipt ajwi', aj tenq' ut aj jolominel reheb' laj k'aak'alehom re laj Parahón, kixloq' laj José rik'ineb' laj Ismael li ke'k'amok re aran. 2Li Qaawa' kixtenq'a laj José,a ut a'in us ki'elk rik'in chixjunil naq wank sa' rochoch laj eechal re aj Ejiipt. 3A'in kixk'e reetal naq li Qaawa' wank rik'in laj José ut natenq'ank re, re naq us taa'elq rik'in chixjunil li naxb'aanu. 4Jo'kan naq laj José kixtaw usilal chiru laj eechal re ut kixaqab'aak cho'q aj tenq' re ut aj jolominel re li xjunkab'al: jo'ch'inal jo'nimal li wank re laj Putifar kiq'axtesiik sa' ruq' laj José. 5Chalen naq kik'ehe'k chi rilb'al li xjunkab'al laj Putifar ut chixjunil li k'aru wank re, li Qaawa' kirosob'tesi laj Putifar sa' xk'ab'a' laj José, ut li rosob'tesihom li Qaawa' kihoye'k sa' xb'een chixjunil li rochoch ut li xk'aleb'aal. 6A'an kixkanab'atq chixjunil li k'aru re sa' ruq' laj José ut ink'a' chik naril li k'aru re, ka'aj chik li xtzekemq naril. Laj José k'ajo' xchaq'al ru ut ch'ina'us na'ilok.

Laj José ut li rixaqil laj Putifar

7Moqon chik kik'ulmank naq li rixaqil laj eechal re xkoho xch'ool chirix laj José ut kixye re: “Warin wik'in”. 8Ab'anan laj José ink'a' kiraj ut kixye re li ixaqilb'ej: “K'e reetal, laj eechal we xq'axtesi chixjunil sa' wuq' ut ink'a' nak'oxlak chirix li k'a'aq re ru li wank sa' rochoch, xb'aan wankin arin. 9Maajun nim xwankil chiwu sa' li kab'l a'in. Laj eechal we maak'a' k'a' re ru ink'a' ta xk'e we, ka'aj chik laa'at, xb'aan naq rixaqilat. Chan put ru naq tinb'aanu li nimla maa'usilal a'in ut tinmaakob'q chiru li Yos?”.

10Us ta li ixq rajlal kutan na'aatinak rik'in laj José, ab'an a'in ink'a' kixk'ul xch'ool li wark rik'in. 11Sa' jun kutan laj José ki'ok sa' rochoch laj Putifar re xb'aanunkil li xk'anjel ut maajun reheb' laj ilol kab'l wank chisa'. 12Toja' naq li ixq kixchap li raq' laj José ut kixye re: “Warin wik'in”. A'ut a'an kixkanab' li raq' sa' ruq' li ixq ut ki'elelik chirix kab'l. 13Naq li ixq kiril naq laj José kixkanab' li raq' sa' ruq' ut ki'elelik chirix kab'l, 14kixjap re chi xb'oqb'aleb' laj k'anjel chiru ut kixye reheb': “Ilomaq! Linb'eelom xk'am chaq qik'in jun aj Hebreo yal re xk'utb'al qaxutaan. Xchalk arin re wark wik'in, a'ut laa'in xinjap we, 15ut naq xinrab'i chi xjapb'al we chi b'oqok, xkanab' li raq' chink'atq ut x'elelik chirix kab'l”.

16Li ixq kixsoq'ob' li raq' laj José chi xk'atq toj reetal kisutq'iik chaq li xb'eelom sa' kab'l. 17Toja' naq kixye re: “Laj k'anjel chawu aj Hebreo li xak'am chaq qik'in x'ok chaq arin yal re inmuxb'al. 18Ab'an naq laa'in xinjap we chi b'oqok, a'an xkanab' li raq' chink'atq ut x'elelik chirix kab'l”.

19Naq li b'eelomej kirab'i li kiyehe'k re xb'aan li rixaqil (“A'an a'in li xb'aanu we laj k'anjel chawu”), k'ajo' naq kijosq'o'k. 20Toja' naq laj eechal re laj José kixtaqla xchapb'al ut xk'eeb'al sa' tz'alam, sa' li na'ajej wankeb' wi' li xpreex li awab'ej.

Laj José sa' tz'alam

Aran kikanaak laj José. 21Ab'an li Qaawa' kixtenq'a laj Joséb ut kiruxtaana ru: kixk'e chi xtawb'al usilal chiru li xb'eenil aj k'aak'alenel tz'alam. 22Jo'kan naq li xb'eenil aj k'aak'alenel tz'alam kixq'axtesi sa' ruq' laj José chixjunileb' li tz'aptz'ookeb' sa' tz'alam: chixjunil li na'uxmank aran, a' chik laj José nab'aanunk re. 23Li xb'eenil aj k'aak'alenel tz'alam tik ink'a' nak'oxlak chirix li k'aru q'axtesinb'il sa' ruq' laj José, xb'aan naq li Qaawa' wank rik'in ut natenq'ank re chi elk chi chaab'il rik'in chixjunil li nalajxb'aanu.